استانا قالاسىندا قۋىرشاق تەاترى عيماراتىنىڭ اشىلۋ ءراسىمى ءوتتى. شاراعا ەلوردالىق ونەر ۇجىمدارى مەن ماڭعىستاۋ وبلىستىق قۋىرشاق تەاترىنىڭ وكىلدەرى قاتىستى.
وسىدان سەگىز جىل بۇرىن استانادا شاعىن ءبولىمى اشىلعان ونەر ورداسى 2010 جىلى ەلوردا باسشىسىنىڭ وكىمىمەن استانا قالاسى اكىمدىگىنىڭ قۋىرشاق تەاترى بولىپ قايتا قۇرىلدى. وسى كۇنگە دەيىن اتالمىش تەاتردىڭ جەكەمەنشىك عيماراتى مەن ساحناسى بولمادى. سوندىقتان ءتۇرلى تاقىرىپتاعى قويىلىمداردى بالاباقشا, مەكتەپ پەن مادەني مەكەمەلەردىڭ عيماراتتارىندا قويىپ كەلدى.
– بۇگىن تەاتر ۇجىمى ءوز عيماراتىنا قول جەتكىزىپ, مەرەيىمىز ۇستەم بولىپ وتىر. سونىڭ قۇرمەتىنە ءوز ساحنامىزدا كىشكەنتاي بۇلدىرشىندەرگە «قاڭباق شال» ەرتەگىسىنىڭ جەلىسى بويىنشا جاڭاشالانعان قويىلىمدى ساحنالايمىز. سالتاناتتاردى قازاق, ورىس, اعىلشىن تىلدەرىندە قويامىز. ءبىزدىڭ ونەر ورداسى – يتاليانىڭ «ماريونەتتە» مەن ستامبۇلداعى «قاراكوز» تەاترىمەن كەلىسىمگە وتىرعان قازاقستانداعى جالعىز قۋىرشاق تەاترى, – دەدى تەاتر ديرەكتورى توعجان حاسانعاليەۆا.
ايتا كەتەيىك, 29 ماۋسىم مەن 2 شىلدە ارالىعىندا ق.قۋانىشباەۆ اتىنداعى تەاتردا قازاقستاننىڭ ەڭبەك سىڭىرگەن ءارتىسى, قازاق قۋىرشاق تەاترىنىڭ تۇڭعىش كاسىبي رەجيسسەرى قۇرالاي ەشمۇراتوۆانىڭ 70 جاسقا تولۋىنا مەرەيتويىنا وراي, ءى حالىقارالىق «قۇرالاي» قۋىرشاق فەستيۆالى وتەدى. فەستيۆالگە ەۋروپا, ازيا, تمد ەلدەرىنىڭ ايگىلى قۋىرشاق تەاترلارى قاتىسادى.
كۇنايىم ساكەن
