سولاي دەۋگە دە بولادى. ءتىپتى, مەكتەپكە بارىپ, مۇعالىم الدىن كورمەگەن بالانىڭ قولىنا قالامىن ۇستاتىپ, تاقپاعىن جاتتاتقىزىپ بەرەدى. تەك, اقىسىن تولەسەڭىز بولدى. بۇل بيزنەستىڭ بولاشاعىن ەلىمىزدىڭ ءبىلىم بەرۋ جۇيەسىندەگى رەفورمالار ايقىنداۋى مۇمكىن.
الايدا, ءدال وسى كۇنى بيزنەستىڭ بۇل ءتۇرى وركەندەپ تۇر. تاڭسىق ەمەس ءىس دەرسىز. بي بيلەپ, سۋرەت سالۋ قولىڭىزدان كەلە مە؟ دومبىرا تارتىپ, ءاۋ دەپ ءان سالاتىنىڭىز بار ما؟ وندا تالانتىڭىزدى قوسىمشا اقشا تابۋدىڭ كوزىنە اينالدىرىڭىز. بۇل – بۇرىننان كەلە جاتقان ءۇردىس. ويتكەنى, ونەرلىدەن ونەگە الاتىن ءداستۇرىمىز بار.
ءبىزدىڭ ايتپاعىمىز – باسقا بيزنەس, بالا وقىتۋ بيزنەسى. ونى رەپەتيتورلىق دەپ تۇسىنىگىمىزگە قولايلاپ الدىق. نەمىسشە «Repetitor», فرانتسۋزشا «répétiteur», «répéter» – قايتالاۋ دەگەن ۇعىمدى بىلدىرەدى. بىراق, مەكتەپتەن العان ءبىلىمدى ۇيدە قايتالاۋ ەمەس, «بالانى اقىلى وقىتۋ» تۇسىنىككە ءدال كەلەدى. مۇعالىم جالداپ, بالانى مەكتەپتەن تىس قوسىمشا وقىتۋعا نەگە قۇمار بولدىق. ەگەر ولاردىڭ بالا وقىتۋداعى جۇمىسى جەمىستى بولسا, وندا ولاردىڭ ءبىلىم بەرۋ ءادىسىن نەگە جاپپاي قولدانباسقا؟!
استانالىقتارعا جاقسى تانىس «دوستىق» ءبىلىم بەرۋ ورتالىعى بالانىڭ ءبىلىمىن مىنا ادىستەرمەن ۇشتايدى ەكەن. ءوز قىزمەتىن ۇبت قورىتىندىسىندا جوعارى ۇپاي الۋعا باعىتتاعان ورتالىق تۇلەكتەردىڭ ءبىلىم گرانتىنا يە بولۋىنا, وقۋشىنىڭ ءبىلىم دەڭگەيىن كوتەرۋىنە كومەكتەسەدى. ىزدەگەنگە تابىلعانى وسى ەمەس پە؟! وقۋشىنىڭ ءبىلىمىن ءبىر جىلدىڭ ىشىندە وسىنشاما دارەجەگە جەتكىزەتىن جۇيەنىڭ ەرەكشەلىگى نەدە؟ ءبىر قاراعاندا, الىپ بارا جاتقان جاڭالىعى جوق. الدىمەن بالالاردى دەڭگەيىنە قاراي توپتارعا بولەدى. قاجەتتى كىتاپتارمەن, تەست جيناقتارىمەن قامتاماسىز ەتىپ, ءبىلىمىن اپتا, اي سايىن قاداعالاپ وتىرادى. قوسىمشا ساباقتار مەن تەستىلەر وتكىزىپ, ودان قالدى وقۋشىنىڭ قاتەمەن جۇمىس جاساۋىنا مۇمكىنشىلىك بەرەدى. پسيحولوگيالىق ترەنينگتەر وتكىزىلەدى. سوڭعى ەكەۋىنىڭ جاڭالىعى بولسا دا, قالعاندارى – ەجەلدەن قالىپتاسقان ءبىلىم بەرۋ ءادىسى. تۇلەكتەردى ۇبت-عا دايارلاۋدا مەكتەپتەردىڭ بارلىعى دەرلىك وسى ادىستەردى قولدانادى. ايىرماسى اقىسىندا عانا بولار. اقىسىنا قاراي, ۇستازدىڭ دا ىقىلاسى وزگەرەتىن سياقتى.
جاقسى رەپەتيتور تابۋ دا وڭاي ءىس ەمەس. جالپى, بارلىق قالاداعى وقىتۋ ورتالىقتارى ءوز ادىستەرىن جاريا ەتىپ قويسا جاقسى عوي. وسىندايدا عالامتورعا ۇڭىلەمىز. «ءسىزدىڭ رەپەتيتورىڭىز», «جوعارى بالل», تاعى باسقا كوز سۇرىندىرەر ورتالىقتار مەنمۇندالاپ تۇر. جەكە وقىتۋشىلاردىڭ دا جارناماسى ءورىپ ءجۇر. اراسىندا «قازاق تىلىنە ۇيرەتەم» دەۋشىلەردى دە تاۋىپ الدىق. بايقاعانىمىز, ينتەرنەتتەن سايت اشىپ الىپ, كەزدەسىپ, سويلەسەيىك دەگەنگە كونبەيتىندەر دە بار. ويتكەنى, ونداي ورتالىقتىڭ بەلگىلى ءبىر تۇراعى, ناقتى كەڭسەسى جوق. دەمەك, مۇنداي ورتالىقتاردىڭ كەپىلدى ءبىلىم بەرەتىنىنە دە كۇدىگىمىز بار.
ەلىمىزدە ءبىلىم بەرۋ سالاسىنداعى رەپەتيتورلىق قىزمەت ليتسەنزيالاۋعا جاتپايدى. زاڭ الدىندا بەتىڭىز اشىق بولسىن دەسەڭىز, جەكە كاسىپكەرلىك اشىپ الۋعا بولادى. زاڭنامانى ەسكە سالعانىم, بۇل دا قىزمەت كورسەتۋدىڭ ءبىر ءتۇرى بولىپ كەلەدى. ەگەر ولاردىڭ قىزمەتىنە جۇگىنسەك, وندا تۇتىنۋشىنىڭ ساپالى قىزمەت الۋعا قاقى بار. وقۋشى ءتيىستى كورسەتكىشكە جەتە الماسا, تەككە كەتكەن ۋاقىتتىڭ سۇراۋىن كىمنەن الامىز. قىزمەتكە تولەنگەن اقىسىن ءوندىرۋدى ايتىپ تۇرعان جوقپىن. ال باسقا دا سەبەپتەرمەن وسى كەزەڭدە بالانىڭ پسيحولوگياسىندا, دەنساۋلىعىندا وزگەرىستەر بولسا كىمگە جۇگىنەمىز؟ قالاي دالەلدەيمىز؟ بۇل اتا-انالاردى ويلاندىرۋى كەرەك. مەنىڭشە, ەڭ جامانى, قوعامنىڭ وسى قىزمەتتى قابىلداپ, داعدىعا اينالدىرۋىندا. سودان دا ۇستاز ساباعىن وتكىزگەندە, شاكىرت ساباققا دايىندالعاندا, اتا-اناسى بالانىڭ وقۋىن قاداعالاعان ساتىندە سانالى تۇردە بالانىڭ بىلىمىندە ءتورتىنشى تۇلعانىڭ – رەپەتيتوردىڭ ارالاسۋىنا سىنا قالدىرامىز. شىن مانىندە, «رەپەتيتور» دەگەن ءسوزدىڭ ماعىناسى قايتالاۋ ەكەنىن ەستەن شىعارىپ جاتامىز.
