سينگاپۋردا وتكەن First Lego League Challenge روبوتوتەحنيكادان حالىقارالىق چەمپيونات اياقتالدى. وعان وڭتۇستىك كورەيا, مالايزيا, پولشا, يندونەزيا جانە قىتايدان 100-دەن استام وقۋشى قاتىستى. اتالعان دودادا قازاقستاندىق وقۋشىلار الەمنىڭ جاس ينجەنەرلەرىمەن باسەكەگە ءتۇستى. ءۇش كۇنگە سوزىلعان جارىس قورىتىندىسى بويىنشا قازاقستاندىقتار ەڭ جوعارى ماراپاتتارعا يە بولىپ, رەكورد ورناتتى, دەپ حابارلايدى astana-akshamy.kz.
«روبوتتار ويىنىندا تاپقىرلىق تانىتىپ قانا قويماي, كوماندانىڭ ۇيىمشىلدىعىن, نەگىزگى قۇندىلىقتارىن تانىتۋ كەرەك بولدى. ءبىز يننوۆاتسيالىق جوبامىزدى كورسەتتىك. بۇل كەرەمەت تاجىريبە بولدى, ەلىمىزدىڭ بىزگە ءۇمىت ارتىپ وتىرعانىن بىلگەندىكتەن, جەڭىس ءۇشىن بار كۇش-جىگەرىمىزدى سالدىق. ناتيجەسىندە الەمنىڭ وزىق ەلدەرىنىڭ اراسىنان سۋىرىلىپ شىعىپ, رەكورد ورناتتىق», – دەيدى قۋانىشىمەن بولىسكەن وقۋشىلار.
ەلىمىزدىڭ نامىسىن «Ro alemi» كومانداسىنىڭ قۇرامىندا سەمەي قالاسىنىڭ ءبىلىم-يننوۆاتسيا جانە №22 ورتا مەكتەبىنىڭ وقۋشىلارى ارىستان يبراگيم, جانارىس ارداحوۆ, دارحان ماماديلوۆ, ايدمۇحامەد تاباراكوۆ, ءادىلجان قابىكەنوۆ, ازات ساپارالى جانە جانىبەك ابدىكارىموۆ قورعادى. ولار چەمپيوناتتا ىقتيمال 550 ۇپايدان 540 ۇپاي جيناپ, رەكورد ورناتتى جانە «Robot Design» نوميناتسياسىن جەڭىپ الدى. سونىمەن قاتار, بارلىق ءتورت باعىت بويىنشا جوعارى ناتيجە كورسەتكەنى ءۇشىن «Champions Award» باس نوميناتسياسىندا باس جۇلدەنى قانجىعالادى. سونداي-اق قازاقستاندىق Tamos Éducation مەكتەبىنىڭ «QSTEM-TAMOS Stars» كومانداسىنىڭ قۇرامىندا ونەر كورسەتكەن ماديار نامازالى, ءنۇرالى ساتىبالدى, راشيد احمەدجانوۆ جانە اڭسار بايازەروۆ چەمپيوناتتىڭ بارلىق ءتورت باعىتى بويىنشا جوعارى كورسەتكىشتەرگە قول جەتكىزىپ «Champions Award» نوميناتسياسىندا I ورىن الدى. اتىراۋ قالاسىنىڭ ءبىلىم-يننوۆاتسيا ليتسەيىنىڭ وقۋشىلارى «Pioneers» كومانداسىنىڭ قۇرامىندا مالىك يسلام, نۇريسلام بەرىكۇلى, بەكاسىل نۇرىمجان, ەراسىل نۇرىمجان, الماز ابزال, الماس ەرلانۇلى, الديار شامار جانە الىشەر دانيلوۆ ونەر كورسەتتى. ولار يننوۆاتسيالىق جوبانى تابىستى جۇزەگە اسىرعانى ءۇشىن «Innovation Project» نوميناتسياسىنىڭ فيناليستەرى اتاندى.
ەسكە سالا كەتەيىك, وقۋشىلار حالىقارالىق چەمپيوناتقا جولدامانى قر وقۋ-اعارتۋ مينيسترلىگىنىڭ قولداۋىمەن دارىن رعپو جانە USTEM Foundation قوعامدىق قورى ۇيىمداستىرعان FIRST Central Asia ورتالىق ازيا ويىندارىندا جەڭىپ العان بولاتىن
