«استانا وپەرا» تەاترى كورەرمەندەرگە ۇلكەن قۋانىش سىيلادى
مەرەكە اتى – «جىبەك جولى» ءى حالىقارالىق فەستيۆالى. فەستيۆال باعدارلاماسى قوماقتى. كوپشىلىك سۇيە تاماشالايتىن, الەمدە ەڭ ءجيى قويىلاتىن چايكوۆسكيدىڭ «اققۋ كولى», پروكوفەۆتىڭ «رومەو مەن دجۋلەتتاسى», حاچاتۋرياننىڭ «سپارتاگى»… بۇرىن قازاقستاندا قويىلماعان ۆاگنەردىڭ «رەين التىنى» مەن «ۆالكيرياسى». وعان مۇقان تولەباەۆتىڭ «ءبىرجان-ساراسى» مەن ءپۋچچينيدىڭ قوس وپەراسى – «توسكا» مەن «بوگەمانى» قوسىڭىز. تەنور ءۇشىن دە, سوپرانو ءۇشىن دە ءپۋچچينيدى ورىنداۋ اسا قيىن ەكەنىن كوزى قاراقتى كورەرمەن بىلەدى. ال, ب.ەيفماننىڭ «قىزىل جيزەلى» – بولەك اڭگىمە. بۇل – قازىرگى بالەت الەمىندەگى ەڭ شوقتىعى بيىك دۇنيەنىڭ بىرەگەيى. وسىنىڭ بارىنە ءان ونەرىنىڭ پاديشاسى بيبىگۇل تولەگەنوۆانىڭ جانە قىتاي ونەراپازدارىنىڭ كونتسەرتىن قوسىڭىز. ال, فەستيۆالگە قاتىسۋشىلار كىمدەر دەيسىز عوي؟ باعدارلامادان بايقاعانىڭىزداي, ءوزىمىزدىڭ قوس تەاتردان بولەك فەستيۆالگە لا سكالا تەاترى مەن ماريا تەاترى كەلگەنىن قۋانىشپەن ايتۋعا بولادى. ولار ءۇشىن سوناۋ ميلان مەن سانكت-پەتەربۋرگكە ۇشاقپەن دە بارىپ كەلۋگە بولادى. «استانا وپەرانىڭ» ارقاسىندا اتاقتى تەاترلاردىڭ ايگىلى قويىلىمدارىن ۇيدە وتىرىپ-اق كورۋگە مۇمكىندىك بار.
كۇنى كەشە نيۋ-يوركتە پلاسيدو دومينگو وتكىزەتىن «وپەراليا» فەستيۆالىندە ءبىرىنشى ورىن العان ماريو چانگ: «گۆاتەمالادان كەتۋ قيىنعا سوقتى. سەبەبى, مەنىڭ وتانىمدا وپەرا تەاترى جوق» دەپ اعىنان جارىلدى. تاڭعاجايىپ تالانت يەسى ماريو چانگتىڭ جانىندا ءبىزدىڭ ونەرپازدار, شىنىندا, باقىتتى.
ادەتتە تەاترلاردىڭ ءىشى قاڭىراپ بوس تۇرادى دەگەنگە ۇيرەنىپ قالعان جۇرت «استانا وپەراعا» بيلەت تاپپاي جاتادى. راسىندا, تەاتر تابالدىرىعىنان اتتاي بەرە باسقا ءبىر الەمگە تاپ بولاسىڭ. قويىلىمدارىنىڭ قاي-قايسىسى دا دەڭگەيلى. دەكوراتسيالارى باي, ارزان-قۇرزاننىڭ ءيىسى دە جوق. ادامداردىڭ ءبارى سۇلۋ كيىنگەن, ادەپپەن سويلەيدى, قاتتى كۇلمەيدى, كورىنگەن بۇرىشتا سۋرەتكە تۇسەدى. راس, «استانا وپەراعا» بارۋ ترەند بولدى. ءبىز وعان قۋانباساق, قىنجىلمايمىز. ويتكەنى, تەاتر ادامعا ارمان سىيلاۋى كەرەك.
ءبىرىنشى كۇن. دج. پۋچچيني, «توسكا»
وپەراداعى جاعىمسىز كەيىپكەرلەر نەگە تەنور داۋىستى بولمايدى؟ ويتكەنى, ماسسيمو دجوردانو سياقتى جان-دۇنيەڭدى باۋراپ, جۇرەگىڭدى سۋىرىپ الاتىن داۋسى بار ادام جامان بولا المايتىن سياقتى. قازاقتا تەنور ساناۋلى. سوندىقتان فەستيۆالگە قاتىساتىن ءۇش وپەراداعى ءتورت ورىنداۋشى – شەتتەن شاقىرىلعان تەنورلار. لا سكالا تەاترىنىڭ پرەمەرى ماسسيمو دجوردانو – قازىر الەمدەگى ەڭ سۇرانىستاعى انشىلەردىڭ ءبىرى. ونى تىڭداپ وتىرعاندا وپەرا ونەرىنىڭ ءدال سول يتاليادا پايدا بولۋىن زاڭدىلىق سياقتى قابىلدايسىز.
ول ايتادى: «وپەرادا سەزىمدەرىڭدى ىركىلمەي بىلدىرۋگە بولاتىنى ۇنايدى». اسىرەسە, ءپۋچچينيدىڭ شىعارمالارىنداعى سەزىمدەر ايۆازوۆسكيدىڭ «توعىزىنشى ۆالىنداعى» سياقتى, كەمەرىنەن تاسىپ جاتادى ەمەس پە؟ دجوردانونىڭ ارقاسىندا تانىس وپەرانىڭ بەيتانىس سازدارىن ەستىگەندەي بولدىق.
كەزىندە ءبىر جۋرناليست «توسكا» دەگەندى «ساعىنىش» دەپ اۋدارىپ جىبەرىپتى عوي. وپەرا كەيىپكەرىنىڭ ەسىمىن ورىس ءسوزى ەكەن دەپ قالسا كەرەك. سول ايتقان فلوريا توسكانىڭ پارتياسىن دا يتاليالىق ءانشى اننا پيروتستسي ورىندادى. جالپى, ەكسپرەسسياعا باي پۋچچيني شىعارمالارىنا «ەتتى», «ۋلترادرامالىق» داۋىستار كەرەك. ءوزىمىزدىڭ گۇلزات داۋىرباەۆا سياقتى. قويىلىمنىڭ ءماسسيۆتى دەكوراتسيالارى سۋرەتشىنىڭ تاماشا جۇمىسىن دا اتاپ وتكەن ءجون. بىراق سول ادەمىلىككە راحاتتانۋعا كەدەرگى كەلتىرگەن ءبىر نارسە بولدى. ول – ساحنا ماڭدايىنداعى اۋدارما. كوزىمىزگە كورىنگەن نارسەنىڭ ءبارىن وقىپ ۇيرەنىپ قالعان ءبىز ماڭدايشاعا قاراعان سايىن جۇيكەمىز توزدى. «سوزۋعا بولمايدى, مۇندا قاتەرلى, توسكا!», «بۇل قاجەتتى زات» («ۆوت ەتو كستاتي» دەگەنى), «مەن ازاپتىمىن, ول باسقانىڭ قۇشاعىندا مەنى مازاق ەتۋدە!» دەيدى. تاعى بىردە «مەنى شات كوڭىل كۇتىپ تۇر» دەپ قۋانادى. ال, اننانىڭ داۋسى, اسىرەسە, «بۇل سايتانعا كەلىسەتىن ءوتىرىك» («لوج, دوستوينايا دياۆولا» دەگەنى), «قانشا سەن قورلىق كوردىڭ», «سەن بەرگەن ازاپ ءبىتتى» دەگەن جەرلەردە شىرقاۋ شەگىنە جەتىپ, زالدى سىلكىندىرىپ جاتقان ەدى. «ءيا, ساتقىن دەلىنەمىن, اقشانى جاقسى كورەمىن» دەگەن سكارپياعا دا (باريتون البەرتو گازالە) سەنەيىن دەپ قالعانىمىز راس.
شالاجانسار اۋدارمانى ەسەپكە الماعاندا, «توسكا» ادەمى اسەر قالدىردى. وركەستردىڭ ءبىر دەممەن, ءبىرتۇتاس اعزا سياقتى ويناعانى – ءوز الدىنا بولەك اڭگىمە. ديريجەر – رەنات سالاۆاتوۆتى ءبىزدىڭ كورەرمەنگە تانىستىرۋ دا, شەبەرلىگىن ايتىپ جاتۋ دا ارتىق بولادى .
ەكىنشى كۇن. س.پروكوفەۆ, «رومەو مەن دجۋلەتتا»
بۇل شىعارمانى كورگەندە اڭگىمە ايتۋ, وقيعانى بايانداۋ, كىسى بولمىسىن جەتكىزۋ, نە سۋرەت سالۋ ءۇشىن ەڭ ءتيىمدى قۇرال ادامنىڭ ءتانى ەكەنىن تۇسىنەسىڭ.
پروكوفەۆ بالەت تاريحىنداعى ەڭ درامالىق شىعارمالاردىڭ ءبىرىن جازدى. ادام جانىنىڭ ەڭ نازىك پسيحولوگيالىق تولعانىستارىن, شەكسپير ءتىلىنىڭ بايلىعىن جەتكىزە بىلگەن مۋزىكانى ورىنداۋشىلاردىڭ ونەرى دە پوەتيكالىق بيىككە, مىنەز ەرەكشەلىگىنە باي ەدى. رومەو مەن دجۋلەتتا (رومان ميحالەۆ, ءمادينا باسپاەۆا) ماحابباتىنىڭ نازىكتىگى, مەركۋتسيونىڭ (ارمان ورازوۆ) كوڭىلدى تەنتەكتىگى, ەنەنىڭ (سەرينا سۋناگاۆا) اڭقاۋلىعى مەن اقكوڭىلدىلىگى, پادرە لورەنتسونىڭ (ي.شاكيرزيانوۆ) دانالىعى, ءتيبالدتىڭ (سەرجان قاۋىقوۆ) قاتالدىعى مەن قاتىگەزدىگى كەرەمەت جەتكىزىلدى. ءمادينا باسپاەۆانىڭ ورىنداۋىندا دجۋلەتتانىڭ پسيحولوگيالىق ءوسۋى, ەركە شولجاڭ قىزدان, ماحابباتقا لايىق كورىكتى بويجەتكەنگە, ودان سول ماحابباتى ءۇشىن قۇرباندىققا بارا الاتىن اياۋلى كەيىپكەرگە اينالعانداعى ىشكى ترانسفورماتسياسىن كورەمىز. يتاليا كوشەلەرىنىڭ شات-شادىمان كوڭىل-كۇيى, تاڭ شاپاعىنىڭ نازىكتىگى مەن ءولىم ساحنالارىنىڭ ءدراماتيزمى – ءبارى دە اسقان شەبەرلىكپەن ورىندالدى. ول ءۇشىن ديريجەر ايدار ابجاحانوۆقا ايرىقشا العىس ايتۋعا بولادى. بالەتتى قويۋشى حورەوگراف شارل ءجيۋدتى تەاتردىڭ باس بالەتمەيستەرى تۇرسىنبەك نۇرقاليەۆ ارنايى شاقىرتىپتى. ال, ستسەنوگرافيا مەن كوستيۋمدەر يتاليالىق شەبەرلەر ەتسيو فريدجەريو مەن فرانكا سكۋارچاپينونىكى.
ءۇشىنشى كۇن: م.تولەباەۆ, «ءبىرجان-سارا»
فەستيۆالگە قاتىسقان بىردەن-ءبىر قازاق اۆتورىنىڭ شىعارماسى – «ءبىرجان-سارا». سارا پارتياسىن بارشاعا سۇيىكتى ليريكالىق سوپرانو نۇرجامال ۇسەنباەۆا ورىندادى. ال, ءبىرجان پارتياسىنا ماريا تەاترىنىڭ ءسوليسى احمەت اعادي شاقىرىلعان. وسىدان ون ءتورت جىل بۇرىن ك.بايسەيىتوۆا اتىنداعى وپەرا جانە بالەت تەاترىنىڭ بەتاشارىندا ءدال وسى «ءبىرجان-سارادا», وسى جۇپ ونەر كورسەتكەن. نۇرجامال ۇسەنباەۆانىڭ جەكە كونتسەرتىندە دە ونىڭ سەرىكتەسى احمەت اعادي بولعانى ەسىمىزدە. اسەرلى دە قىزبا, ءارى ليريكالىق داۋىستى اعاديدى وپەرا جاناشىرلارى ءبىرجان پارتياسىن ەڭ تاماشا ورىنداۋشىلاردىڭ ءبىرى دەپ بىلەدى. كەيبىرى, مىسالى, تەاتر ديرەكتورى تولەگەن مۇحامەدجانوۆ «ەڭ ۇزدىگى» دەپ باعالايتىنىن جاسىرمايدى.
انالىق پارتياسىن – كۇشتى داۋىستىڭ يەسى دينا حامزينا ورىندادى. بىلتىر «استانا وپەرانىڭ» ماريا تەاترىنداعى گاسترولى كەزىندە پەتەربۋرگتىك گازەتتەر: «ءبىرجاننىڭ اناسىن عاجاپ ويناعان ەرەكشە كونترالتو يەسى دينا حامزينانىڭ جوقتاۋى, شىنايى سەزىمى ەسەڭگىرەتتى» دەپ جازعانى ەستە. قارا نيەت جانبوتانى جانات شىبىقباەۆ, كەكشىل التىنايدى جانات باقتاي, ەستايدى بەيىمبەت تانارىقوۆ جەرىنە جەتكىزە ورىندادى.
ەسكە سالساق, سوناۋ 1946 جىلعى پرەمەراسىنان بەرى «ءبىرجان-سارا» ساحنادان تۇسكەن ەمەس. بىراق يۋ.الەكساندروۆ ساحنالاعان شىعارمانىڭ بۇل نۇسقاسى بۇرىنعىدان وزگەرەك. شەشىم وزگەرگەن, كوزقاراس وزگەرگەن. ەكىنشى اكتىدەگى ءبىرجان مەن سارا دۋەتى قويىلىمنىڭ سوڭىنا ويىسىپتى. ياعني, «نە ءومىر, نە دومبىرا تاڭداۋىڭدا!» دەگەن ءسوز لەيتموتيۆ بولعان باسەكەدە ونەر جەڭىپ شىعادى. ويتكەنى, ءبىرجاننىڭ ءوزى دۇنيەدەن وتكەنىمەن, ونەرى ماڭگى جاسايدى. فينال – بۇرىنعىداي قايعىلى ەمەس, جارقىن. «ولگەن» ءبىرجان سارامەن قول ۇستاسىپ ساحناعا قايتا شىعادى, ءسويتىپ «ءبىرجان-سارا» ەسىل كەتكەن اقىندى جوقتاۋ ەمەس, ماڭگىلىك ونەردى ۇلىقتاۋ بولىپ شىعادى. «مەن مۋزىكالىق تەاترداعى ءولىم دەگەندى قابىلداي المايمىن» دەيدى قويۋشى-رەجيسسەر. جانە دۇرىس جاسايدى. كوبىندە شەت ەلدەن كەلگەن رەجيسسەرلەردىڭ كومەگىنە نەگە جۇگىندىك دەپ قىنجىلاتىن جاعدايلار بولادى. بۇل قويىلىمدا باسقاشا. يۋ.الەكساندروۆ وپەرانى بارىنشا تىڭدارمانعا جاقىنداتىپ, باس كەيىپكەرلەردىڭ وبرازدارىن, پسيحولوگيالىق پورترەتتەرىن, ولاردىڭ درامالىق تارتىسىن تەرەڭدەتە جەتكىزگەندەي. جانبوتا مەن ءبىرجاننىڭ تەكەتىرەسى تۇسىندا ساحنانىڭ اياق استىنان تۇنەرە قالۋى, ال سالتاناتتى توي بولىپ جاتقاندا, التى قانات اق وردانىڭ شاڭىراعىنان نايزاعايدىڭ جارقىلداۋى – وسىنىڭ ءبارى الەكساندروۆ مىرزانىڭ ۇتىمدى شەشىمدەرىندەي اسەر ەتتى.
ءتورتىنشى كۇن: ب.ەيفمان. «قىزىل جيزەل»
بوريس ەيفماندى قازىرگى الەمدىك بالەتتىڭ ماڭدايداعى جۇلدىزى, باس حورەوگرافى دەپ بىلەدى. ءوز شىعارمالارىنا مۋزىكانى ءوزى جازاتىن (قۇراستىراتىن), بالەتكە ءوز ستيلىمەن, ءوز مەكتەبىمەن كەلگەن ونىڭ اباي اتىنداعى وپەرا جانە بالەت تەاترىندا جۇمىس ىستەۋگە كەلىسكەنى – ۇلكەن تابىس. فەستيۆالگە قاتىسقان «قىزىل جيزەل» – ماەسترونىڭ ەڭ شوقتىعى بيىك تۋىندىسى دەپ باعالانىپ ءجۇر. چايكوۆسكي, شنيتكە, بيزە شىعارمالارىنان قۇرالعان مۋزىكالىق قويىلىمنىڭ ديناميكاسى, بۇكىل ءون بويىمەن ورىلگەن قۇشتارلىق ەنەرگياسى ساناڭدا سىلكىنىس جاساماي قويمايدى. ەيفماننان كەيىن, «قىزىل جيزەلدەن» كەيىن ءداستۇرلى بالەتتىڭ ءداستۇرلى قويىلىمدارىنا باسقا بيىكتەن قارايسىڭ.
بالەتتەگى وقيعاعا, ىشكى يمپۋلسكە كوبىرەك ءمان بەرەتىن ول «قىزىل جيزەلدە» رەسەيدەن جىراقتاپ, پسيحيكالىق اۋرۋحانادا قايتىس بولعان بالەرينا ولگا سپەسيۆتسەۆانىڭ تاعدىرىن باياندايدى. كەلەسى ءبىر ءماتىن اراسىنداعى ماعىنا – ايەل مەن ەر ادامنىڭ قارىم-قاتىناسى جايلى. ءبىرىنشى اكتىدە تالاپشىل ۇستاز نۇرلان بايبوسىنوۆ تا, قاتىگەز چەكيست ازامات اسقاروۆ تا ايەلدى ادام دەپ بىلمەي, ونى قالاي باسىپ-جانشۋعا, قالاي قورلاۋعا بولاتىنىن كورسەتتى. ەكى جىگىتتىڭ دە قيمىلى – نىق, قادامى – سەنىمدى. ەسەسىنە ەكىنشى اكتى باستالىسىمەن فارحاد بۋريەۆ ايەلدى قالاي ايالاۋعا بولاتىنىن كورسەتتى. فارحاد تا – قاي پارتيانى دا تەحنيكالىق ءمىنسىز ورىندايتىن, سونىمەن بىرگە, اسا ليريكالىق ءبيشى. شىعارماعا ارى قاراي ۇڭىلسەك, كەڭەس وداعىنىڭ جابايى كوزقاراسى ونەردى تۇنشىقتىرعانى, شىن تالانتتاردىڭ جانشىلۋى كورسەتىلەدى. الدىمەن زۇلىم چەكيستىڭ قۇربانى بولعان, ودان قاشىپ فرانتسياعا جەتكەندە, ساحنالاسىن شىن سۇيگەندە ونىڭ ساتقىندىعىن كوتەرە الماعان, شەكسىز كەڭ دۇنيەدە ۇلتاراقتاي ورىن تاپپاي الاسۇرعان ءبيشىنىڭ قاسىرەتىن اينۇر ابىلعازينا بارىنشا جەتكىزۋگە تىرىستى. اينۇردىڭ درامالىق تالانتىنا دا بارىنشا ءتانتى بولدىق. قويىلىمنىڭ كوپشىلىك ساحناسىنداعى بيشىلەردىڭ ونەرىن ەرەكشە اتاپ ايتقان ءجون. توڭكەرىسكە دەيىنگى پەتەربۋرگتەگى ماڭعاز بيشىلەر, توڭكەرىستەن كەيىنگى «ۋرالاپ» شاپقان جۇمىسشىلار, ءداۋىر تەكسىزدىگى, فرانتسۋز بالەتىندەگى مەنمەن ونەرپازدار, دجاز مۋزىكاسىنىڭ ىرعاعىمەن جەڭىل قوزعالعان مۇڭسىز فرانتسۋزدار… وسىلاردىڭ قاي-قايسىن دا سومداۋداعى كاردەبالەت بيشىلەرىنىڭ كاسىبي دالدىگىن جانە اكتەرلىك شەبەرلىگىن اتاپ وتكەن ءجون. قويۋشى-سۋرەتشى مارتينس ۆيلكارسيس تە اداسپاعان بولۋ كەرەك, كوستيۋم سۋرەتشىسى, قازاقستاندا تۇراقتى جۇمىس ىستەپ كەلە جاتقان ۆياچەسلاۆ وكۋنەۆكە «براۆو» دەۋگە نەگىز بار. ال, اينۇر ابىلعازينا شىعارماداعى نەگىزگى بي – «قىزىل جيزەلدى» قالاي شەبەرلىكپەن ورىنداسا, شىعارمانىڭ سوڭىنا دەيىن سول بيىكتىڭ ۇدەسىنەن شىعا ءبىلدى. ونىڭ چەكيسپەن بيلەيتىن قۇشتارلىق ءبيى دە, سەرىكتەسىمەن بيلەيتىن نازىك ءبيى دە, دجاز الەمىندەگى شاتتىعى دا, ەڭ سوڭىندا چەكيستىڭ باسىمەن بيلەگەن ەسسىز ءبيى مەن اينالار اراسىنا ءسىڭىپ, اينانىڭ ارعى جاعىندا قالۋى دا اسەرلى بولدى. راسىندا, ەيفمان بالەتتى جاڭا بەلەسكە شىعاردى دەگەنگە كەلىسپەۋگە شاراڭ جوق. شىن تەاتر وسىنداي جارقىن بولۋ كەرەك جانە وسىلاي ەستە قالۋ كەرەك.
بەسىنشى كۇن. ا.حاچاتۋريان, «سپارتاك»
«سپارتاك» – ەڭ الدىمەن تاقىرىبىمەن قىزىقتى شىعارما. قۇلداردىڭ كوتەرىلىسى مەن ماحاببات حيكاياسى, تاق تاقىرىبى مەن قىزعانىش لەيتموتيۆى قاتار ورىلگەن دۇنيە قىزىق بولماعاندا قايتسىن؟! ايتەۋىر ءىش پىستىراتىن «سپارتاكتى» كورەمىز دەگەن ءۇش ۇيىقتاساق تۇسىمىزگە كىرمەپتى. وكىنىشكە قاراي, ءدال وسى قويىلىمدا ديناميكا, رۋح پەن جىگەر جەتىسپەدى. ورىنداۋشىلاردىڭ قيمىل-قوزعالىستارىنىڭ ءبارى شەكتەۋلى, كوبىندە دەمونستراتسيالى تۇردە قولىن سەرمەپ, موينىن سوزىپ جۇرەتىن دە قوياتىن سياقتى. سپارتاك-باحتيار الدامجانعا, فريگيا-ءمادينا باسپاەۆاعا, رەسەيدىڭ ۇلكەن تەاترىنان ارنايى كەلگەن كراسس-الەكساندر ۆولچكوۆ پەن ەگينا-ەكاتەرينا شيپۋليناعا ايتار سىنىمىز جوق. ولار اسەم عانا ەمەس, بارىنشا قىزىقتى شىعارما ۇسىنۋعا تىرىسىپ-اق ءجۇر. بىراق حورەگورافتىڭ تاپسىرمالارى جاس ارتىستەردىڭ ەنەرگياسىنا ىلەسە المايتىن سياقتى. ءۇشىنشى پەردەنىڭ 11-كورىنىسى (ەگينانىڭ ساتقىندار قوسىنىنداعى لاڭى) قويىلىمنان ەستە قالعان وقيعا وسى بولدى. 12-كورىنىس, رەكۆيەم – فريگيانىڭ سپارتاكپەن قوشتاسۋى اسەرلى شىقتى. قويۋشى-حورەوگراف – اتى اڭىزعا اينالعان يۋري گريگوروۆيچ. بىراق رەسەي سىنشىلارى سوڭعى كەزدە مەتردى «قۇلدىراۋ ءداۋىرىن باستان كەشىپ جاتىر» دەپ ايتىپ ءجۇر. بالكىم, وسى پىكىرمەن دە كەلىسۋگە بولاتىن شىعار. ايتپەسە, كوستيۋمدەر مەن دەكوراتسياعا دا, وركەستر مەن ديريجەر ايدار ابجاحانوۆقا دا العىستان باسقا ايتارىمىز جوق.
P.S: فەستيۆالدىڭ قىزىقتارى مۇنىمەن تۇگەسىلمەيدى. الدا ءالى قىتاي ونەرپازدارىنىڭ كونتسەرتى, «اققۋ كولى» مەن «بوگەما», ماريا تەاترىنىڭ قوس قويىلىمى بار. گەرگيەۆ كۇندە كەلمەيدى, بارماي قالۋعا بولمايدى. بيىك ونەردىڭ مارتەبەلى سالتاناتى جالعاسا بەرەدى دەگەن دامەمىز دە جوق ەمەس.
Copyright © Astana Opera, 2014 فوتو اۆتورى: Karla Nur
