ەلىمىزدە مۇلىك پەن كاپيتالدى جاريا ەتۋ اكتسياسىمەن قاتار, مەملەكەتتىڭ قاتىسۋىنداعى كوممۋنالدىق مەنشىكتى جەكەشەلەندىرۋ جۇمىستارى دا ءجۇرىپ جاتىر.
وسىدان ەكى جىلداي بۇرىن ەلباسى ءوز جولداۋىندا ەلىمىزدەگى ستراتەگيالىق ەمەس نىسانداردى جەكەشەلەندىرىپ, باسەكەلى ورتاعا تاپسىرۋ جونىندە تاپسىرما بەرگەنى بەلگىلى. بۇل باعىتتاعى جۇمىستار استانا قالاسىندا دا جۇرگىزىلۋدە.
وسىعان بايلانىستى ەلوردادا كوممۋنالدىق زاڭدى تۇلعالاردى جەكەشەلەندىرۋ جۇمىستارى ءارى قاراي جالعاسىپ جاتىر.
استانا قالاسى قارجى باسقارماسىنىڭ مالىمەتىنە سۇيەنسەك, قازىردىڭ وزىندە باسەكەلى ورتاعا 11 كوممۋنالدىق مەنشىكتەگى زاڭدى تۇلعا بەرىلىپ ۇلگەرگەن. كاسىبي ەمەس اكتيۆتەردى ساتۋ جونىندەگى جۇمىستاردى قارقىندى ءارى ءتيىمدى جۇزەگە اسىرۋ ءۇشىن باس قالادا 2014-2016 جىلدارعا ارنالعان جەكەشەلەندىرۋدىڭ كەشەندى جوسپارى بەكىتىلگەن.
قارجى باسقارماسىنىڭ اقپاراتى بويىنشا اتالعان جوسپارعا سايكەس, استانا بويىنشا 38 زاڭدى تۇلعا جەكەشەلەندىرۋگە جاتادى. ولاردىڭ ىشىندە 11-ءى – 2014 جىلى, 7-ەۋى – 2015 جىلى, 20-سى 2016 جىلى جەكەشەلەندىرىلەدى دەپ جوسپارلانۋدا.
بۇدان وزگە, كەشەندى جوسپارلاردى ورىنداۋ ماقساتىندا استانا قالاسى كاسىپكەرلەر پالاتاسى وكىلدەرىنىڭ قاتىسۋىمەن كۆازيمەملەكەتتىك سەكتور سۋبەكتىلەرى مەن مەملەكەتتىك جىلجىمايتىن مۇلىك نىساندارىن وڭتايلاندىرۋ بويىنشا كوميسسيا قۇرىلعان. بۇل كوميسسيا كوممۋنالدىق مەنشىكتەگى نىسانداردى ءتيىمدى پايدالانۋعا جان-جاقتى ساراپتاما جۇرگىزىپ, جەكەشەلەندىرۋگە جاتاتىن باسقا دا كۆازيمەملەكەتتىك كاسىپورىنداردى انىقتايتىن بولادى.
قارجى باسقارماسىنىڭ ءمالىمەتىنشە, كەڭ اۋقىمدى قامتيتىن جەكەشەلەندىرۋ ۇدەرىسى مىناداي ناتيجەلەرگە الىپ كەلمەك: بىرىنشىدەن, جەرگىلىكتى اتقارۋشى ورگاندار كاسىبي ەمەس اكتيۆتەر مەن ءوزىنىڭ قىزمەتىنەن تىس جۇمىستاردان بوساپ, كوممۋنالدىق زاڭدى تۇلعالار سانى وڭتايلاندىرىلاتىن بولادى. بۇل جەرگىلىكتى مەملەكەتتىك مەكەمەلەردىڭ قىزمەت ساپاسىن ارتتىرا تۇسپەك.
ەكىنشىدەن, قالا ەكونوميكاسىنداعى وسىعان دەيىن مەملەكەتتىڭ قاتىسۋىمەن قۇرىلعان كاسىپورىنداردىڭ ورنى بوساپ, شاعىن جانە ورتا بيزنەستىڭ دامۋىنا قوسىمشا سەرپىن بەرەدى. سونىمەن قاتار, مەملەكەتتىك مۇلىكتى ساتۋدان بيۋدجەتكە قوسىمشا قارجى تۇسەتىنى ايتپاسا دا تۇسىنىكتى.
ەستە ۇستايتىن جايت, جەكەشەلەندىرۋ نىساندارىن ساتۋ جونىندەگى ەرەجەلەر بويىنشا, ولاردى ساتۋ مەملەكەتتىك مۇلىكتى جەكەشەلەندىرۋ بويىنشا اۋكتسيون جانە تەندەر تۇرىندە www.gosreestr.kz. ۆەب-پورتالى ارقىلى ەلەكتروندىق سيپاتتا وتكىزىلەدى. اتالعان سايتتىڭ ەلەكتروندىق ساتۋ بولىمىندە جەكەشەلەندىرۋگە شىعارىلعان مەملەكەتتىك نىساندار جونىندە كەڭىنەن تانىسىپ, تولىققاندى ماعلۇمات الۋعا بولادى.
