تۇتىنۋشىلاردىڭ قۇقىعىن قورعاۋ اگەنتتىگى جۇمىسىنىڭ نەگىزگى التى باعىتى ايقىندالدى. ول جونىندە ورتالىق كوممۋنيكاتسيالار قىزمەتىنىڭ بريفينگى بارىسىندا اگەنتتىك توراعاسى بولاتبەك قۋاندىقوۆ مالىمدەدى.
ونىڭ ايتۋىنشا, ەڭ الدىمەن تۇتىنۋشىلاردىڭ قۇقىعىن قورعاۋعا باعىتتالعان جاڭا مودەل ءازىرلەندى. سالاعا قاتىستى زاڭدا شيكىلىكتەر انىقتالعاندىقتان, اگەنتتىك ماماندارى جاڭا زاڭدى دايىنداۋعا كىرىسكەن. «قازىردە ەلىمىزدەگى 172 قوعامدىق بىرلەستىكتەن 50-ءى عانا ناقتى جۇمىس ىستەيدى. سوندىقتان جاڭا زاڭدا مەملەكەتتىك قولداۋ تەتىكتەرى دە قاراستىرىلىپ وتىر» دەدى اگەنتتىك توراعاسى.
تۇتىنۋشىلاردىڭ شاعىمدارى نەگىزىنەن تۇرعىن ءۇي-كوممۋنالدىق شارۋاشىلىق, قوعامدىق كولىك, قۇرىلىس سالالارىنىڭ جۇمىسىنا قاتىستى ءتۇسىپ جاتاتىن كورىنەدى. جاڭا زاڭدا وسىنىڭ ءبارى رەتتەلمەك.
سونىمەن بىرگە, ەپيدەميولوگيالىق قاداعالاۋ جۇيەسى دە جەتىلدىرىلەتىن بولادى. ونىڭ ىشىندە سانيتاريالىق تالاپتاردى قايتا قاراۋ كوزدەلۋدە. بولاتبەك بايانۇلىنىڭ سوزىنشە, جاقىندا استاناداعى ءبىر مەكتەپتە ورىن العان جاعداي سونى كورسەتىپ وتىر. رۇقسات بەرۋ قۇجاتتار سانىن قىسقارتۋ دا جوسپارلانۋدا.
ونىمدەردىڭ قاۋىپسىزدىگىنە ايرىقشا نازار بولىنبەك. الدىمەن بەلگىلى ءبىر ءونىم الدىمەن زەرتحانالىق زەرتتەۋدەن وتكىزىلەدى. ونىڭ زيانى انىقتالماسا عانا ساۋداعا شىعارىلادى. قازىردىڭ وزىندە, ماسەلەن, ناۋرىز ايىندا بىرقاتار ازىق-تۇلىك تەكسەرىلىپ, ەلىمىزگە رەسەي جانە بەلارۋستەن كەلەتىن قۇس ەتى مەن ۋكراينادا وندىرىلەتىن ءىرىمشىك ءونىمدەرىن كىرگىزۋگە تىيىم سالىنعان.
سونىمەن بىرگە, اگەنتتىك ءبىرىڭعاي اقپاراتتىق جۇيە قۇرماقشى. ارنايى پورتالدا ساپاسىز تاۋارلار اتاۋى ورنالاستىرىپ, تۇتىنۋشى نەنى الۋ, نەنى الماۋ كەرەكتىگىنەن حابار الادى.
امانعالي شميتۇلى
