سارىارقاداعى قوبىز سارىنى
استانادا قورقىت اتىنداعى تۇركى تىلدەس مەملەكەتتەردىڭ ءداستۇرلى ورىنداۋشىلىق ونەر فەستيۆالى شىمىلدىعىن ءتۇردى. قازاق ۇلتتىق ونەر ۋنيۆەرسيتەتىندە «استانا – تۇركى الەمىنىڭ مادەني استاناسى» جىلى اياسىندا قر مادەنيەت جانە اقپارات مينيسترلىگى مەن تۇركيا ەلشىلىگىنىڭ «يۋنۋس ەمرە» مادەني ورتالىعى وسىنداي شارانى ۇيىمداستىرۋعا مۇرىندىق بولىپ وتىر.
فەستيۆالگە 60-تان استام ءداستۇرلى مۋزىكانىڭ وتاندىق جانە شەتەلدىك ورىنداۋشىلارى قاتىسۋعا نيەت بىلدىرگەن. استاناداعى بايقاۋعا قاتىسۋعا ءازىربايجان, وزبەكستان, قازاقستان, قىرعىزستان جانە قاراقالپاقستان ەلدەرىنەن جاس ورىنداۋشىلار كەلىپ وتىر. ويتكەنى, فەستيۆالگە 16 مەن 30 جاس ارالىعىنداعى مۋزىكانتتار عانا قاتىسا الادى. فەستيۆال ءۇش نوميناتسيا بويىنشا جۇرەدى. ونىڭ العاشقىسى قوبىز, سودان كەيىن ۇرمەلى جانە ىشەكتى اسپاپتار, ودان كەيىن «ىسقىشتى» اسپاپتار بويىنشا ۇزدىك ورىنداۋشىلار انىقتالادى. اتالمىش بايقاۋدىڭ باستى مەيماندارى, ياعني قازىلار القاسىندا قر كومپوزيتورلار وداعىنىڭ مۇشەسى ەدىل قۇسايىنوۆ, قر ەڭبەك سىڭىرگەن ءارتىسى, پروفەسسور مەرۋەرت قالەنباەۆا, قر مادەنيەت قايراتكەرى, قوبىزشى بازارحان قوسباساروۆ, قر مادەنيەت قايراتكەرى بايعارا سادۋاقاسوۆ, سايان اقمولدا, تالعات مۇقىشەۆ, قىرعىزستاننان كەلگەن ءجۇسىپ ايساەۆ, ازەربايجاننان لالا گۋسەينوۆا جانە ت.ب كوپتەگەن ونەرپازدار بار.
«قوبىز» اتالىمىنداعى قازىلار القاسىنىڭ توراعاسى القۋات قازاقباەۆتىڭ ايتۋىنشا, قورقىت اتىنداعى فەستيۆال استانادا تۇڭعىش رەت وتكىزىلۋدە. جوبانىڭ ءبىر ەرەكشەلىگى, مۇندا تەك ءداستۇرلى مۋزىكا عانا ورىندالادى. ەۋروپالىق اۋەندەر كىرىكتىرىلمەپتى. باستى تالاپ – قورقىت كۇيلەرىنىڭ ءبىرىن فورتەپيانونىڭ سۇيەمەلدەۋىمەن ورىنداپ شىعۋ.
«ءداستۇرلى مۋزىكانىڭ ورىنداۋشىلارى بۇل وقيعانى كوپتەن بەرى كۇتتى. بۇرىندارى قورقىت فەستيۆالى باسقا قالالاردا, نەگىزىنەن, وزگە وڭىرلەردە وتكىزىلگەن. كەلەسى جىلى بۇل فەستيۆالدى تۇركيادا ۇيىمداستىرۋدى جوسپارلاپ وتىرمىز», – دەيدى قر پرەزيدەنتى سىيلىعىنىڭ يەگەرى ءا.قازاقباەۆ.
ونىڭ اتاپ وتكەنىندەي, فەستيۆالدىڭ جۇلدە قورى 11 ملن تەڭگەنى قۇرايدى. لاۋرەاتتاردى ماراپاتتاۋ جانە فەستيۆالدىڭ قورىتىندى گالا-كونتسەرتى بۇگىن قازاق ۇلتتىق ونەر ۋنيۆەرسيتەتىنىڭ جامبىل اتىنداعى كونتسەرتتىك زالىندا.
شىنار ءابىلدا