«استانالىق ساياباقتا» حالىقارالىق «شاتتىق» جاس دارىندار فەستيۆالى وتۋدە. ءۇش كۇن بويى 600-گە جۋىق بالا ۆوكال, حورەوگرافيا, اسپاپتا ويناۋ, بىرەگەي جانرلار مەن ءسان تەاترى اتالىمى بويىنشا ءوزارا سىنعا تۇسەدى.
بايقاۋ اياسىندا ءار وبلىس ونەرپازدارىنىڭ 30 مينۋتتىق باعدارلاما قويۋعا مۇمكىندىكتەرى بار. وسى ۋاقىت ىشىندە كەمىندە ءۇش نوميناتسياعا سايكەس ونەر كورسەتىلۋى ءتيىس. ال, باعدارلاما تاقىرىبى باس شاھاردى جان-جاقتى اسپەتتەۋ كەرەك.
ەلوردانىڭ ءداستۇرلى ونەر سايىسىنا اينالعان «شاتتىق» فەستيۆالى استانا قالاسى اكىمدىگىنىڭ قولداۋىمەن وسىمەن جەتىنشى رەت ۇيىمداستىرىلىپ وتىر. استانانىڭ تۋعان كۇنىنە ارنالعان مەرەكەلىك شارا بۇعان دەيىن «جاستار» سارايى, «بايتەرەك» مونۋمەنتى, «قازاق ەلى» الاڭدارىندا وتكەن ەدى. بيىلعى ساحنانىڭ پاركتە قۇرىلۋى تەگىن ەمەس. سەبەبى «استانالىق ساياباق» – ناعىز بالالىقتىڭ مەكەنى.
– «شاتتىق» فەستيۆالىنىڭ اۋقىمى كەڭ. وعان قازاقستاننىڭ ونەرپازدارى عانا ەمەس, ارمەنيا, بەلارۋس, بولگاريا, گەرمانيا, گرۋزيا, يتاليا, قىتاي, قىرعىزستان, لاتۆيا, ليتۆا, مولدوۆا, ساحا رەسپۋبليكاسى, رەسەي, تۇركيا, وزبەكستان سىندى تاياۋ جانە قيىر شەتەلدىڭ جاس جۇلدىزدارى قاتىسادى. ال, بىلىكتى ونەر مايتالماندارىنان قۇرىلعان قازىلار القاسىنىڭ ءتورايىمى جىلداعىداي – كسرو حالىق ءارتىسى, مەملەكەتتىك سىيلىقتىڭ لاۋرەاتى بيبىگۇل تولەگەنوۆا, – دەيدى «شاتتىق» فەستيۆالىنىڭ اۆتورى قارلىعاش ابدىكارىموۆا.
قالا تۇرعىندارى مەن قوناقتارى ءار ءوڭىر ۇزدىكتەرىنىڭ تالانتىن تاماشالاي الادى. ال ەرتەڭ دارىندىلار ىشىنەن دارا شىققان كوللەكتيۆتەردىڭ ەسىمى انىقتالىپ, گالا-كونتسەرت قويىلادى.
ءمادينا جاقىپ
