استانادا ۇلتىمىزدىڭ ءبىرتۋار ۇلدارىنىڭ ءبىرى, كومپوزيتور ءشامشى قالداياقوۆ اندەرىنىڭ «مەنىڭ قازاقستانىم» فەستيۆالى شىمىلدىعىن ءتۇردى. بەس كۇنگە سوزىلاتىن اۋقىمدى شارا جايىندا بىزگە مادەنيەت جانە سپورت مينيسترلىگىنىڭ دەپارتامەنت ديرەكتورى اقتوتى رايىمقۇلوۆا ايتىپ بەردى.
– فەستيۆالدى وتكىزۋدىڭ ماقساتى قانداي?
– ءشامشى – قازاق ءان ونەرىنىڭ دامۋىنا ۇلكەن ۇلەسىن قوسىپ كەتكەن تۇلعا. ونىڭ اتىنداعى فەستيۆال ۇلتتىق ءانىمىزدى ودان ءارى دە ىلگەرىلەتۋ ماقساتىندا ۇيىمداستىرىلىپ وتىر. سونداي-اق, وسى شارا ارقىلى دارىندى جاس انشىلەردى قولداۋدى دا كوزدەپ وتىرمىز. فەستيۆال ءشامشىنىڭ جارىققا شىعۋىن كۇتىپ وتىرعان جاڭا اندەرىنىڭ دە حالىققا تانىلۋىنا سەپتىگىن تيگىزەدى دەپ ويلايمىز.
– فەستيۆالگە قاتىسۋعا قاي ەلدەردەن انشىلەر كەلدى؟
ول سۇراققا جاۋاپ بەرمەس بۇرىن مىنانى ايتا كەتەيىك: شامشىگە ناسيحاتتىڭ قاجەتى جوق, ونىڭ اندەرى حالقىمىزدىڭ جۇرەگىنە بەرىك ۇيالاعان. دەسەك تە, وزگە ەلدەردەن كەلەتىن انشىلەرگە ونىڭ اندەرىن ايتقىزىپ, ءشامشىنى باسقا مەملەكەتتەرگە دە تانىتا الامىز. ءتىكەلەي سۇراعىڭىزعا كەلسەك, بيىل فەستيۆالگە قاتىسۋعا قىتاي, وزبەكستان, قىرعىز رەسپۋبليكاسى مەن ءوز ەلىمىزدىڭ انشىلەرى دە نيەت ءبىلدىردى. قاتىسۋشىنىڭ ارقايسىسى ءشامشىنىڭ ءتورت ءانىن ورىنداۋى ءتيىس. ايتا كەتەيىك, ول ءۇشىن انشىلەرگە ەكى كەزەڭ بەرىلگەن.
– ادەتتە مۇنداي فەستيۆالدەر ۇلكەن گالا-كونتسەرتپەن اياقتالاتىن…
– ءيا, ونداي ءداستۇر بار. ءشامشى قالداياقوۆ اندەرىنىڭ فەستيۆالى دە 24 قازان كۇنى گالا-كونتسەرتپەن جابىلادى. بۇل كۇنى «قازاقستان» ورتالىق كونتسەرت زالىندا وتەتىن كونتسەرتكە قازاق ساحناسىنىڭ مايتالماندارى بيبىگۇل تولەگەنوۆا مەن نۇرعالي ءنۇسىپجانوۆ, قازاقستاننىڭ ەڭبەك سىڭىرگەن قايراتكەرلەرى جەڭىس سەيدوللاۇلى, التىناي جوراباەۆا, ازامات جىلتىركوزوۆ, ءجاميلا جارقىنباەۆا, سونداي-اق, وسى فەستيۆالدىڭ بىلتىرعى جەڭىمپازى نۇربولات ابدۋللين قاتىسىپ, ءان سالادى.
امانعالي شميتۇلى
