قالا تۇرعىندارى ءۇشىن «Smart Astana» اتتى موبيلدىك قوسىمشا قولدانىسقا ەنگەلى پايدالانۋشىلار سانى 70 مىڭعا جۋىقتادى. ونى كەز كەلگەن ادام ۇيالى بايلانىس تەلەفونىنا «Apple Store» جانە «Play Market» ارقىلى تەگىن جۇكتەي الادى.
بار بولعانى ءبىر-اق قوسىمشادا قالالىق اۆتوبۋستاردىڭ بارلىق قوزعالىسىن ونلاين رەجيمدە باقىلاۋعا بولادى. جول قوزعالىسى ەرەجەلەرى ايىپپۇلدارىن تەكسەرۋ, ينتەللەكتۋالدىق بايلانىس ورتالىعىنا ءوتىنىش ءبىلدىرۋ, حالىقارالىق جانە ىشكى اۋە رەيستەرىنىڭ ۇشۋ جانە ۇشىپ كەلۋ ۋاقىتىن, سونداي-اق, پويىز, ەلەكتريچكا جانە قالاارالىق اۆتوبۋستاردىڭ كەستەسىن كورۋگە مۇمكىندىك قاراستىرىلعان. ونداعى «Smart tickets» ايدارىندا «بايتەرەك», «اتامەكەن قازاقستان كارتاسى» ەتنو-مەموريالدىق كەشەنى, جاستار سارايى, س.سەيفۋللين اتىنداعى مۋزەي, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى, مەملەكەتتىك اكادەميالىق فيلارمونيا, قۋىرشاق تەاترى, جاستار تەاترى سەكىلدى تاعى باسقا مادەني ورىنداردا وتەتىن ءىس-شارالارعا بيلەتتى ونلاين ارقىلى ساتىپ الۋعا بولادى. ال, جۋىردا سپورتتىق شارالارعا دا بيلەت ساتىپ الۋ مۇمكىندىگى ۇسىنىلماق. قوسىمشا, سونداي-اق, مەكتەپتەردەگى ساباقتاردىڭ بولماۋى, تاس جولداردىڭ جابىلۋى مەن اشىلۋى جانە قالاداعى جايسىز اۋا رايى تۋرالى push-حابارلامالاردى لەزدە الۋ فۋنكتسياسىمەن ىڭعايلى.
گۇلميرا ايماعانبەت
