«ەكسپو-2017» قارساڭىندا حالىقارالىق كورمەگە كەلۋشىلەر استانا جايلى كوپ نارسە بىلگىسى كەلەتىنى ءسوزسىز. بۇل رەتتە جۋىردا اشىلعان 3D.astana.kz سايتى قالا قوناقتارىنا ەلوردانىڭ الەۋەتى مەن كۇندەلىكتى تىرشىلىگىن تانىستىرىپ قانا قويماي, باس قالانىڭ تۇكپىر-تۇكپىرىنە دەيىن ۆيرتۋالدى سەرۋەندەۋگە مۇمكىندىك بەرەدى.
سايتتا قالانىڭ تاريحى, قوناقۇيلەر, سونىمەن قاتار, اۋەجاي جانە تەمىرجول تۋرالى اقپاراتتار كەڭىنەن ورنالاستىرىلعان. ەرەكشەلىگى – قالانىڭ ءار بۇرىشىنا ساياحات جاساۋعا بولادى. ياعني, پايدالانۋشىلار قالا كوشەلەرى, قوناقۇي عيماراتتارى, مۋزەيلەر, ۋنيۆەرسيتەتتەر, رەستوراندار, تەاترلار, ساۋدا ويىن-ساۋىق ورتالىقتارى, ەسكەرتكىشتەر جانە باسقا دا كورىكتى جەرلەرمەن جاقىنىراق تانىسادى. ماسەلەن, «بايتەرەك» مونۋمەنتىن, «حان شاتىر», «كەرۋەن» ساۋدا, ويىن-ساۋىق ورتالىقتارىن, قالا مەشىتتەرىن, «قازاقستان» كونتسەرت زالىن, وقۋشىلار سارايىن, «سارىارقا» ۆەلوترەگىن, نازارباەۆ ۋنيۆەرسيتەتىن كورۋگە, ءتىپتى, ولاردى «ارالاۋعا» مۇمكىندىك بار.
سوڭعى تەحنولوگيانىڭ ارقاسىندا, ەكران الدىندا وتىرىپ-اق, گيگاپيكسەلدى پانورامالار ارقىلى بەينەسۋرەتتەردى ۇلكەيتىپ, قالانىڭ ءاربىر بۇرىشى پەن قۋىسىن قىزىقتاۋعا بولادى. ال, جاڭالىقتار ايدارىندا ءدال قازىر ەلوردادا قانداي ءىس-شارالار بولىپ جاتقانى جاريالانىپ تۇرادى.
قوناقتارعا بەس جۇلدىزدى مەيرامحانالاردان باستاپ, حوستەلدەرگە دەيىن تاڭداۋ كورسەتىلگەن. قولايلى قوناق ءۇيدى تاۋىپ, باعاسىمەن كەلىسۋگە بولادى.
جالپى, پورتال سۇلۋلىقتى سۇيەتىن, قالانىڭ تاريحى مەن مادەنيەتىن بىلگىسى كەلەتىن قاۋىمعا ارنالعان.
گۇلميرا شارحانقىزى
