سوپرانو ساندۋFاشى
سول كۇنى جۋرناليستەر مەرەكەلىك كونتسەرتتەن بۇرىن جينالعان بولاتىن. ەسىكتەن ەنىپ, ەنتىگىمىزدى باسقان كەزدە الاكولەڭكە بولىپ تۇرعان ۆەستيبيۋلدىڭ باستى شامى جانعاندا, اينالا سامالاداي جارقىراپ سالا بەردى.
«استانا وپەرانىڭ» سالتاناتتى ءتورىندە ۇلكەن قاربالاس. الەمنىڭ اتى وزعان وپەرا تەاترلارى ءوز قويىلىمدارىنداعى باستى پارتيانى ورىنداۋعا اتتاي قالاپ الاتىن بەلگىلى سوپرانو, كلاسسيكالىق مۋزىكا الەمىنىڭ تانىمال ءانشىسى اننا نەترەبكو كونتسەرت الدىندا رەپەتيتسيا جاساپ جاتىر. اپىراي, الەمدىك سىنشىلاردى قايران قالدىرىپ, داۋسىنىڭ ساف تازالىعىنا, كۇش-قۋاتى مەن ەرەكشە اۋەزىنە قوسا, ساحناداعى كەربەزدىگىنە قاراپ, «ءان ايتاتىن ودري حيوپبەرن» اتانعان ءانشى قايدا دەپ توڭىرەككە كوز سالدىق. تىزەسىنەن كەلەتىن كەڭ كويلەك كيگەن, بۇرىمىن جەلكەسىنە بۋىپ قويعان اننا وركەستردىڭ سازىنا قۇلاق ءتۇرىپ, اراسىندا «مەنى دە تىڭدا» دەگەندەي كومەيدەن شىققان كۇمىس ءانىن توگىپ جىبەرىپ, الىسقا شاباتىن جۇيرىكتەي اتقاقتاپ تۇرعانداي اسەر قالدىردى. كەۋدەدە تولقىعان سەزىمدى شىعارعىسى كەلگەندەي ءانشى ەكى قولىن اسەم تەربەپ, بۇكىل جان-تانىمەن ءان سالىپ تۇرعانداي. قۇلاعىمىزدان ەنىپ, بويىمىزدى شىمىرلاتقان اۋەن الىسقا جەتەلەيدى, كوزىمىز – اننادا. وسىنشاما قۇدىرەت تالدىرماش جاننىڭ بويىندا قالاي جينالعان؟ انشىگە قوس قانات ءبىتكەندەي ساحنا تورىندە قالىقتاپ, قايتا قونعانداي. كەنەت ادەمى اۋەن كىلت ءۇزىلىپ, اننا دايارلىعىن اياقتاپ, اسىعىس باسىپ ساحنا سىرتىنا بەت الدى. ءتاتتى ەلەستەن ايىرىلىپ قالعان بىزدەرگە بۇرىلىپ ءبىر قارادى. ىزىنەن ەرىكسىز ەردىك.
اننا كوپ كۇتتىرگەن جوق. زەرلى كويلەگىن كيىپ, شاشىن ادەمىلەپ ءتۇيىپ جۋرناليستەرمەن كەزدەسۋگە قايتا شىقتى. كونتسەرت باستالۋىنا از عانا ۋاقىت قالدى. وسىندايدا كوپ ساۋال قويا سالاسىڭ با؟! دەگەنمەن, اننانىڭ استاناعا العاشقى ساپارىنان العان اسەرىن ءبىلىپ الدىق. كەرەمەت! ال «استانا وپەرا» عيماراتىنىڭ سالتاناتى, ۇزدىك اكۋستيكاسى ءانشىنى تاڭ قالدىرىپتى. جايدارى مىنەزدى استانالىقتارعا, تەاتردىڭ قۇراق ۇشقان قىزمەتكەرلەرىنە العىسى ەرەكشە ەكەن. اننادان پلاسيدو دومينگو, دميتري حۆوروستوۆسكيمەن بىرگە جانە جەكە بەرگەن كونتسەرتتەرى جايلى, ءوزى تۇراقتى قوناعى بولىپ تابىلاتىن زالتسبۋرگ ونەر فەستيۆالى تۋرالى, نەمىستىڭ «دويچە گرامموفون» ستۋدياسىندا جازعان سوڭعى البومى مەن الەمنىڭ بىرنەشە ەلىندەگى حيت-پارادتاردىڭ شىڭىنا شىعارعان كلاسسيكالىق مۋزىكا البومدارى تۋرالى بىلگىمىز كەلدى…
سونىمەن, سوڭعى قوڭىراۋ سوعىلىپ, استانا كۇنى قۇرمەتىنە ارنالعان الەم جۇلدىزدارىنىڭ گالا-كونتسەرتى باستالىپ تا كەتتى.
بۇل كۇن جۇلدىزدار جاۋعان كۇن بولدى. كونتسەرتتىڭ العاشقى بولىمدە اننا نەترەبكو مەن تەنور احمەد اگادي كەزەكپە-كەزەك ونەر كورسەتىپ, بەلگىلى وپەرالاردان اريا ورىندادى. كەلەسى بولىمدە فرانتسيا ادەبيەتى مەن ونەرى وردەنىنىڭ يەگەرى ۆاديم رەپين ءحۇىىى-ءححى عاسىرلاردا سكريپكاعا ارنالىپ جازىلعان شىعارمالاردى ورىندادى. ايتا كەتەتىنى, مىقتىلاردىڭ ەڭ مىقتىسىنا كورسەتىلەتىن قۇرمەت ۆاديم رەپينگە كورسەتىلگەن ەكەن. ول 1736 جىلى جاسالعان گۆارنەري دەل دجەزۋدىڭ «Lafont» سكريپكاسىندا ويناۋ قۇرمەتىنە يە بولعان.