استانا قالاسى اكىمدىگىنىڭ قولداۋىمەن Qazaqstan جەڭىل اتلەتيكا كەشەنىندە «قاجىمۇقان جولى – student cup» كوپسايىسى ءوتتى. قاجىمۇقاننىڭ شەبەرلىگى مەن ەرلىگىن ونەگە تۇتقان قارا كۇش يەلەرى باق سىنادى. سالاۋاتتى ءومىر سالتى مەن سپورتتىڭ قۇندىلىعىن ناسيحاتتاعان ءىس-شارا كوپشىلىكتىڭ كوڭىلىنەن شىقتى.
اشىلۋ سالتاناتىنا ۇلتتىق وليمپيادا كوميتەتىنىڭ ۆيتسە-پرەزيدەنتى سەرىك ساپيەۆ, «قازاقستان سپورتشىلار وداعى» قوعامدىق بىرلەستىگىنىڭ توراعاسى ازامات قارلىعاشەۆ جانە اۋىر اتلەتيكادان الەم چەمپيونى يليا يلين قاتىسىپ, تولاعايلارعا ساتتىلىك تىلەدى. جوبا اۆتورى جانە گيننەستىڭ رەكوردتار كىتابىنىڭ رەكوردشىسى سەرگەي تسىرۋلنيكوۆ شارا بارىسىندا بولات تەمىردى مايىستىرىپ, جينالعان جۇرتشىلىقتى تاڭداي قاقتىردى.
جارىس جولىنا 11 ۋنيۆەرسيتەتتىڭ 22 ستۋدەنتتى قاتىسىپ, ەپتىلىگى مەن كۇش-قايراتىن دالەلدەيتىن جاتتىعۋ تۇرلەرىن ورىندادى. ءبىرىنشى سايىستا سپورتشىلار 2 مينۋتتا 60 كەلىلىك قاپتى باسىنان اسىرا كوتەرسە, ەكىنشى جاتتىعۋدا شىنجىرعا بايلانعان 24 كەلى بولاتىن گىر تاسىن 2 كوماندا ۇزاق ۇستاپ تۇرۋ ارقىلى جارىستى. ءۇشىنشى كەزەڭدە ۇزىندىعى 60 سانتيمەتردى قۇرايتىن ارماتۋرانى ۋاقىت جىلدامدىعىمەن مايىستىردى. ال ءتورتىنشى راۋندتا سالماعى 80 كەلى قاپشىقتى 2 مينۋت ىشىندە 1,2 مەتر كەدەرگىدەن مەيلىنشە كوپ اسىرۋعا تىرىستى. قورىتىندى سايىستا كوماندالار ارقان تارتۋدا سىنعا ءتۇستى.
قاتىسۋشىلار اراسىندا اۋىر اتلەتيكادان جاسوسپىرىمدەر اراسىندا الەم چەمپيونى ەدىگە ەمبەردى, ارمرەستلينگتەن ازيا چەمپيونى ستانيسلاۆ سلوبوديان دا بار.
تۋرنير قورىتىندىسى بويىنشا 1-ورىندى – س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى, 2-ورىندى – Astana IT University, 3-ورىندى سپورت اكادەمياسى يەلەندى.
