كەشە استانا قالاسىنىڭ اكىمى ادىلبەك جاقسىبەكوۆ وتكىزگەن كەزەكتى اپپارات ماجىلىسىندە دەمالىس كۇندەرى تولاسسىز جاۋعان جاۋىن سالدارىن جويۋ ماسەلەلەرى مەن ەلورداداعى سانيتاريالىق-ەپيدەميولوگيالىق جاعداي تالقىلاندى دەپ حابارلايدى قالا اكىمىنىڭ ءباسپاسوز قىزمەتى.
نوسەر سالدارىنان 16-17 مامىر كۇندەرى ەلوردانىڭ ون ەكى ۋچاسكەسىن سۋ باسىپ, كولىك قوزعالىسى شەكتەلدى. «قازگيدرومەتتىڭ» مالىمەتى بويىنشا, جاۋىن-شاشىننىڭ ايلىق ءمولشەرى 34 مم بولسا, سول كۇنى ءبىر تاۋلىك ىشىندە 38,5 مم ىلعال تۇسكەن. سينوپتيكتەر ەلوردادا الداعى كۇندەرى دە كوشپەلى بۇلت شىعىپ, جاڭبىر جاۋاتىنىن ەسكەرتەدى.
– جاڭبىر جاۋى قالىپتى ءمولشەردەن اسىپ كەتتى جانە سينوپتيكتەردىڭ بولجامىنشا, مۇنداي جاعداي الداعى ۋاقىتتا دا قايتالانۋى مۇمكىن. سوندىقتان, بۇل كۇندەرى بارلىق تەحنيكانى جۇمىلدىرىپ, كۇن سايىن كەزەكشىلىك ۇيىمداستىرۋ قاجەت. قاۋىپتى جەرلەرگە سۋ سورۋ قۇرىلعىلارىن ورناتۋ كەرەك, – دەدى اكىم.
قالانىڭ كوممۋنالدىق قىزمەتتەرى كۇشەيتىلگەن تارتىپپەن جۇمىس ىستەۋدە. استانا قالاسىندا دەمالىس كۇندەرى 10 مىڭ تەكشە مەتردەن اسا جاڭبىر سۋى سورىلدى.
قالا باسشىسى ەلوردانىڭ سانيتاريالىق-ەپيدەميولوگيالىق جاعدايىنا توقتالا كەلىپ, تۇرعىنداردىڭ جاپپاي ۋلانۋى قوعامدىق تاماقتانۋ ورىندارىندا ءتيىستى سانيتاريالىق تالاپتاردىڭ, ازىق-تۇلىكتى ساقتاۋ ەرەجەلەرىنىڭ ساقتالماۋىنان ەكەندىگىن اتاپ ءوتتى.
– ازىق-تۇلىكتىڭ دۇرىس ساقتال-
ماۋى, تازالىق تالاپتارىنىڭ ورىندالماۋى, تاعامنىڭ اينالاسىندا جۇرگەن قىزمەتكەرلەرىنىڭ كاسىبي دەڭگەيىنىڭ تومەندىگى, باقىلاۋدىڭ جوقتىعى – وسىنىڭ بارلىعى, تۇپتەپ كەلگەندە, قالاداعى تۇيتكىلدى ماسەلەگە اينالىپ وتىر. ءدامحانالار مەن اسحانالاردىڭ جۇمىسى باقىلانبايدى. بۇل ماسەلەلەردى شەشۋ ءۇشىن قالانىڭ بارلىق قۇزىرەتتى قىزمەتتەرى جۇمىلدىرىلىپ, ارناۋلى رەيدتەر وتكىزىپ, باقىلاۋدى كۇشەيتۋى قاجەت. قالا اكىمى 10 ماۋسىمعا دەيىن استانانىڭ بار-لىق قوعامدىق تاماقتانۋ مەكەمەلەرىندەگى سانيتاريالىق جاعدايدى تەكسەرىپ شىعۋدى تاپسىردى.
