كەشە استانا قالاسىندا قازاقتىڭ داڭقتى ۇلى, ەكى مارتە كەڭەس وداعىنىڭ باتىرى اتانعان ۇشقىش تالعات بيگەلدينوۆ تۋرالى دەرەكتى ءفيلمنىڭ تانىستىرىلىمى ءوتتى. سالتاناتتى شاراعا ەلوردالىق ارداگەرلەر قاتىسىپ, پىكىرلەرى مەن لەبىزدەرىن ءبىلدىردى.
«پودنياتسيا ۆ ۆوزدۋح» اتتى تەلەتۋىندىنىڭ تۇسىرىلىمىنە «ارداگەرلەر كەڭەسى» رەسپۋبليكالىق بىرلەستىگى باستاماشى بولسا, «نۇر وتان» پارتياسى مەن «التىن قىران» قايىرىمدىلىق قورى دەمەۋشىلىك تانىتىپ, قولداۋ كورسەتكەن. ءفيلمنىڭ جەلىسىن قازاقستاننىڭ مادەنيەت قايراتكەرى لاۆرەنتي سون جازدى. قويۋشى رەجيسسەرى – ەرگەن توقمۇرزين. باتىردىڭ جاستىق شاعىن جاس اكتەر ءازىمحان احمەت سومدايدى.
ءۇش جۇزدەن اسا اسكەري تاپسىرمامەن اۋەگە كوتەرىلگەن اۆياتسيا گەنەرال-مايورى ت.بيگەلدينوۆ تۋرالى دەرەكتى ءفيلمنىڭ ءتۇسىرىلە باستاعانىنا ءبىر جىلداي بولعان. ۇلى وتان سوعىسىنىڭ سۇراپىل جىلدارىندا ەل قورعاۋعا شاقىرىلعان ون توعىز جاستاعى جىگىتتىڭ تاعدىرى, اسىرەسە, اسپان ايقاستارىنداعى ەرلىكتى ساتتەرى ەشكىمدى بەيجاي قالدىرمايدى. دۇشپاندارى «ۇشقىش تانك» اتاپ كەتكەن باتىر «يل-2» ۇشاعىمەن العاشقىلاردىڭ قاتارىندا بەرليندى, كاۆكاز بەن ۋكراينانى ازات ەتتى.
ۇشقىش-شابۋىلداۋشىنىڭ 1966 جىلى قالامىنان تۋعان «يلى اتاكۋيۋت» كىتابىنداعى كەيبىر ەستەلىكتەر فيلمگە ارقاۋ بولعان. سونىمەن قاتار, قازاق قىرانىنىڭ اۋە شايقاستارى, جاۋ قورشاۋىن بۇزۋ ۇرىستارى سوڭعى تەحنولوگيانىڭ كومەگىمەن اسەرلى ۇسىنىلعان. تەلەتۋىندىدان كينوشەجىرەنىڭ سيرەك كادرلارىن دا كورۋگە بولادى.
سالتاناتتى راسىمدە «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك, گەنەرالدار كەڭەسىنىڭ توراعاسى رۇستەم قايداروۆ ءسوز سويلەدى. ولار قارت جاۋىنگەرلەردىڭ ورلىگى مەن ەرلىگى قاي ۇرپاققا دا ۇلگى بولىپ قالۋ كەرەك ەكەنىن شەگەلەي ايتتى.
كوپشىلىك باسقوسۋدا تاماشالاپ, جوعارى باعاسىن بەرگەن ءفيلمدى كورەرمەن 9 مامىر كۇنى 13.10-دا «استانا», 17.15-تە «حابار» تەلەارنالارىنان كورە الادى.
اسحات رايقۇل
