تۇعىرى بيىك تاۋتۇلعا
تۇعىرى بيىك تۇلعانى تەرەڭ زەرتتەۋ كەزىندە قانداي تىڭ دەرەكتەر تابىلدى؟ ۇلتىنىڭ باعىنا تۋعان ازاماتتىڭ قايراتكەرلىگىن قالاي باعالادىق؟ ەل مەن جەر تاريحىندا تاشەنەۆتىڭ الار ورنى قانداي؟ ارتىندا قالعان ۇرپاقتارى امان با؟ وسى جونىندە كىتاپ اۆتورلارىمەن اڭگىمەلەسكەن ەدىك.
جەر تاعدىرى تارتىسقا تۇسكەن قيىن كەزەڭدە تەكتى ەلدىڭ ۇرپاعى ەكەنىن تانىتقان تۇلعا – جۇمابەك تاشەنەۆ. ونىڭ ەسىمى اڭىزعا اينالىپ, حالىق جادىندا ساقتالعانىمەن, رەسمي تاريح عىلىمىندا ءالى جان-جاقتى زەرتتەلە قويماعان بولاتىن.وسى ولقىلىقتىڭ ورنىن تولتىرۋ ماقساتىندا مەملەكەت تاريحى ينستيتۋتىنىڭ عالىمدارى, پەداگوگيكا عىلىمدارىنىڭ كانديداتى سەيىتقالي دۇيسەن مەن تاريح عىلىمدارىنىڭ كانديداتى قانات ەڭسەنوۆ «جۇمابەك تاشەنەۆ» اتتى عىلىمي-زەرتتەۋ ەڭبەگىن جازىپ شىقتى.
قازاقستاننىڭ باعىنا تۋعان
ءتىلشى: شىنىن ايتۋ كەرەك, ءوزىمىز مەكتەپتە وقىعان جىلدارى تاريح وقۋلىعىندا تاشەنەۆ تۋرالى ەستىمەدىك. ۇلت جاناشىرىن ۇلىقتاۋ قاي كەزدەن باستالدى؟ وسى ۋاقىتقا دەيىن ايتۋلى تۇلعا تۋرالى زەرتتەگەن عالىمدار بار ما؟ بۇل ەڭبەكتى جازۋعا نە تۇرتكى بولدى؟
سەيىتقالي دۇيسەن:
– جۇمابەك تاشەنەۆتىڭ زامانى قازاق ەلىنىڭ اۋمالى-توكپەلى كەزەڭدەرىمەن تۇسپا-تۇس كەلدى. بۇل ۋاقىتتا ساياسي قۋعىن-سۇرگىن, سوعىس, حالىق شارۋاشىلىعىن قالپىنا كەلتىرۋ, تىڭ يگەرۋ سياقتى ناۋقاندار جۇرگىزىلىپ جاتقان. ول كىسى وسى ناۋقانداردىڭ بارىنە بەلسەندى قاتىسقان. سىن ساعاتتا قاسقايىپ تۇرىپ, قارا جەرگە قورعان بولدى, قايراتكەرلىك تانىتتى.
وسى ۋاقىتقا دەيىن تاشەنەۆ جايلى زەرتتەۋ ەڭبەكتىڭ جازىلماي كەلگەندىگى ويلانارلىق جاعداي. تەك ەلىمىز تاۋەلسىزدىك العاننان كەيىن عانا ول جونىندە كوز كورگەن كىسىلەردىڭ ەستەلىكتەرى مەن گازەتتىك شاعىن ماقالالاردان قۇرالعان بىرنەشە جيناق جارىق كوردى. الايدا ونىڭ ءبارى بىردەي مۇراعات دەرەكتەرىنە نەگىزدەلمەگەن ءارى عىلىمي ناقتىلىعى شامالى دۇنيەلەر ەدى. سوندىقتان دا ءبىز قايراتكەردىڭ ءومىرى مەن قىزمەتىنە قاتىستى بۇكىل مۇراعاتتاردى اقتارا وتىرىپ, قازاقستان جەرىنىڭ تۇتاستىعىن ساقتاپ قالۋ جولىنداعى كۇرەسىن ەڭ باستى ەڭبەك دەپ باعالادىق.
قانات ەڭسەنوۆ:
– جۇمابەك تاشەنەۆتىڭ قوعامدىق-ساياسي قىزمەتى تۋرالى دىنمۇحامەد قوناەۆتىڭ ەستەلىگىندە ايتىلادى. ودان كەيىن ەل ارداقتىلارىنىڭ ءبىرى بايكەن ءاشىموۆ ەلىمىزدىڭ وڭتۇستىك جانە سولتۇستىك وڭىرلەرىندەگى جەر ءۇشىن بولعان تارتىسقا بەلسەنە ارالاسىپ, سوڭىندا قىزمەتتەن قۋىلعانى تۋرالى تەرەڭ تولعانىسپەن جازعان. تاشەنەۆ تۋرالى العاشقىلاردىڭ ءبىرى بولىپ قالام تارتقان جازۋشى ءادي ءشارىپوۆ بولدى. ال پروفەسسور بەيىمبەت ەرمۇحانوۆ بولسا ءوزىنىڭ زەرتتەۋ ماقالاسىندا 1960 جىلدارى قازاقستاننىڭ بەس وبلىسىن الىپ قالۋعا, حالىقتىڭ باعىنا قاراي ەر مىنەزدى قايراتكەر جۇمابەك تاشەنەۆ شىقتى دەپ جازادى. وسىنداي ءبىراز تانىمال كىسىلەردىڭ ەستەلىكتەرىندە تۇلعانىڭ اڭىزعا بەرگىسىز ىستەرى ايتىلادى.
ءتىلشى: تاشەنەۆ ءوزى تۋرالى وسىنداي باعانى كوزى تىرىسىندە ەستىدى مە؟
سەيىتقالي دۇيسەن:
– تاشەنەۆ تۋرالى العاشقى ەستەلىكتەر مەن ماقالالاردىڭ, نەگىزىنەن, ول دۇنيەدەن وتكەن سوڭ عانا جاريالانا باستاعانىن اتاپ وتكەن ءجون. بۇل ءىستى ەڭ الدىمەن تاشەنەۆ 25 جىل قىزمەت ەتكەن, حالقىنىڭ سۇيىسپەنشىلىگىنە بولەنگەن شىمكەنت وڭىرىندەگى وزىمەن قىزمەتتەس بولعاندار, اقىن-جازۋشىلار مەن جۋرناليستەر باستادى.
جالپى, ايتۋلى تۇلعانىڭ ەرلىگىن ناسيحاتتاپ جۇرگەندەردىڭ قاتارىندا حايدار ارىستانبەكوۆ, ساعادات نۇرماعامبەتوۆ, ساعىندىق كەنجەباەۆ, عاراي ساعىمباەۆ, كەرىمبەك سىزدىقوۆ, كارىشال اسانوۆ, سابىر قاسىموۆ, ۇلىقپان باشەنوۆ, امانتاي كاكەن, مەيرام بايعازين, جولدىباي بازاروۆ, ەرىكبولات قابىلدين جانە تاعى باسقا عالىمدار مەن زەرتتەۋشىلەر بارشىلىق. وسى ۇلتجاندى ازاماتتاردىڭ ارالاسۋىمەن «قازاقستان» ۇلتتىق ەنتسيكلوپەدياسىنا ءومىربايانى ەنگىزىلدى.
ەسىمى 2009 جىلى وقۋلىقتان ورىن الدى
ءتىلشى: جۇمابەك تاشەنەۆكە قاتىستى دەرەكتەر بولا تۇرا نە سەبەپتى ءجوندى عىلىمي-زەرتتەۋ جاريالانباعان؟
قانات ەڭسەنوۆ:
– كەڭەستىك داۋىردە جانە تاۋەلسىزدىكتەن كەيىنگى ۋاقىتتاردا وسى دەرەكتەرگە نەگىزدەلگەن تولىققاندى ەڭبەك جازىلماي كەلدى. ولاي بولۋىنىڭ وزىندىك سەبەپتەرى بار. سول كەزدەگى جۇيە باسشىلارى ءوز ايتقاندارىنا كونبەگەندەردى جوعارى قىزمەتتەن شەتتەتىپ, تۇقىرتىپ تاستاۋعا دايىن تۇردى. ولار تۋرالى جازۋعا, ايتۋعا, ءتىپتى اتىن اتاۋعا تىيىم سالىندى.
تەك ەلىمىز تاۋەلسىزدىككە قول جەتكىزگەننەن كەيىن عانا عالىمدار, جازۋشىلار, قوعام قايراتكەرلەرى ول تۋرالى ەستەلىكتەر مەن ماقالالار جاريالاي باستادى.
ءتىلشى: جۇمابەك تاشەنەۆ تۋرالى مەكتەپ وقۋلىعىنا قاشان ەنگىزىلدى؟
سەيىتقالي دۇيسەن:
– قازاقستاننىڭ تاۋەلسىزدىگى كەزەڭىندە تاشەنەۆ ەسىمىن العاش رەت مەكتەپ وقۋلىعىنا, ياعني 2009 جىلى ەنگىزگەن تاريحشى عالىم بۇركىتباي اياعان بولدى. سول جىلى «قازاقستاننىڭ قازىرگى زامان تاريحى» اتتى 9-سىنىپقا ارنالعان, وڭدەلىپ, تولىقتىرىلعان ەكىنشى باسىلىمىندا ول: «بەلگىلى مەملەكەت جانە قوعام قايراتكەرى 1955-1961 جىلدارى قازاق كسر-ءى جوعارعى كەڭەسى, مينيسترلەر كەڭەسى توراعاسى قىزمەتىن اتقارعان جۇمابەك تاشەنەۆ قازاق جەرىنىڭ اۋماقتىق تۇتاستىعىنىڭ ساقتالۋىنا كوپ ەڭبەك ءسىڭىردى» دەپ جازدى.
ءتىلشى: تاشەنەۆتىڭ اقمولا ءوڭىرىنىڭ تۋماسى ەكەنىن جاقسى بىلەمىز. جالپى, كەڭەس داۋىرىندە قانداي قىزمەتتەر اتقاردى؟
قانات ەڭسەنوۆ:
– جۇمابەك تاشەنەۆ 1915 جىلى قازىرگى اقمولا وبلىسىنىڭ ارشالى اۋدانىندا دۇنيەگە كەلىپ, ءبىلىم الىپ, ەڭبەككە ارالاسقان. 1938-1951 جىلدارى سولتۇستىك قازاقستان وبلىسىندا شارۋاشىلىق, كەڭەستىك پارتيا جۇمىستارىندا بولدى. 1952-1955 جىلدارى اقتوبە وبلىسىن باسقاردى. 1955-1960 جىلدارى قازاق كسر جوعارعى كەڭەسى تورالقاسىنىڭ توراعاسى, ال 1960-1961 جىلدارى قازاق كسر مينيسترلەر كەڭەسىنىڭ توراعاسى قىزمەتىن اتقاردى.
سەيىتقالي دۇيسەن:
– كەڭەس ەلىن ن.حرۋششەۆ باسقارعان 1953-1964 جىلدارى قازاقستاندى بىرنەشە ولكەگە ءبولىپ باسقارۋعا, تۇبىندە قازاق رەسپۋبليكاسىن جويۋعا باعىت ۇستاعانى تاريحتان بەلگىلى. قازاقستاننىڭ جەرىن جىرىمداپ, وزبەكستانعا, تۇركىمەنستانعا, رەسەي فەدەراتسياسىنا ءبولىپ بەرمەكشى بولدى. وڭتۇستىك قازاقستان وبلىسىنىڭ بوستاندىق اۋدانىن 1956 جىلى وزبەكستانعا بەرىپ تە ۇلگەردى. قازاق رەسپۋبليكاسىنىڭ باسشىلىعى جەر بەرۋگە قارسى ەكەنىن بىلدىرگەنىمەن, كسرو-نىڭ كەۋدەمسوق باسشىسى ولاردى تىڭدامادى. كەلەسى كەزەكتە 1960 جىلدىڭ سوڭىندا قازاقستاننىڭ سولتۇستىگىندەگى 5 وبلىسىن (سولتۇستىك قازاقستان, كوكشەتاۋ, قوستاناي, اقمولا, پاۆلودار) رەسەي فەدەراتسياسىنا بەرۋدى تالاپ ەتەدى. سول كەزدە قازاقستاننىڭ پرەمەر-ءمينيسترى قىزمەتىن اتقارعان جۇمابەك تاشەنەۆ بۇل كسرو مەن قازاق رەسپۋبليكاسى كونستيتۋتسياسىنىڭ باپتارىن بۇزعاندىق, حالىق ەركىمەن ساناسپاعاندىق ەكەنىن, ەگەر جەردى زاڭسىز بەرەتىن بولسا, قازاقستان باسشىلىعى حالىقارالىق ۇيىمدارعا شاعىمداناتىنىن ەسكەرتىپ, حرۋششەۆتى شەگىنۋگە ءماجبۇر ەتەدى. وسى قارسىلىعى ءۇشىن ونى قىزمەتىنەن كەتىرەدى.
قانات ەڭسەنوۆ:
– ول – ەلىنىڭ, جەرىنىڭ تۇتاستىعى ءۇشىن باسىن بايگەگە تىككەن ۇلتجاندى, باتىر قايراتكەر. سول قايراتكەردىڭ ەرلىگى بولماعاندا, قازاقستاننىڭ بەستەن ءبىرى 1960 جىلى رەسەيگە بەرىلگەندە رەسپۋبليكامىز تاۋەلسىزدىك العاندا ول جەرلەر قايتارىلماي قالىپ قويار ەدى. قازىرگى استانا قالاسى دا بولمايتىن ەدى. سوندىقتان تاشەنەۆتىڭ ەرلىگى – كەيىنگى ۇرپاققا ۇلگى-ونەگە. ونىڭ ەرلىگىن جاستارعا ناسيحاتتاۋ – بۇگىنگى عالىمداردىڭ پارىزى.
ءتىلشى: تاشەنەۆ 37 جاسىندا اقتوبەگە ءبىرىنشى باسشى بولىپ كەلگەن ەكەن. ول كەزدەگى احۋال قانداي ەدى؟
سەيىتقالي دۇيسەن:
– اقتوبە وبلىسىنا جەتەكشىلىك ەتكەن جىلدارى بۇل ايماقتا قارا مەتاللۋرگيا, مۇناي-حيميا, تاماق جانە جەڭىل ونەركاسىپ سالالارى دامىدى. وبلىستا الەمدەگى ەڭ ۇلكەن فوسفور كەندەرىنىڭ ءبىرى ورنالاستى. العا ستانتسياسىندا ءىرى حيميا كومبيناتى جۇمىس ىستەدى. كەمپىرسايدا نيكەل, نوۆورەسەي اۋدانىنىڭ ءدوڭ اۋىلى ماڭىندا حروم كەن ورىندارى بولدى. بەرشوگىردە كومىر, جاقسىماي مەن شۇبارقۇدىقتا مۇناي ءوندىرىسى جۇمىس ىستەدى. ەلىمىزدە اڭ تەرىسىنەن جاسالعان سىرتقى كيىمدەردىڭ جارتىسىنان استامى اقتوبە كاسىپورىندارىنىڭ ۇلەسىنە ءتيدى. تاماق ونەركاسىبى سالاسىندا جىلدان-جىلعا ەت جانە ەت ونىمدەرىن ءوندىرۋ ارتا ءتۇستى. ياعني, مىقتى ۇيىمداستىرۋشىلىق قابىلەتىمەن تانىلعانى ءالى كۇنگە دەيىن ايتىلىپ ءجۇر.
كىناسىز ادامدى قۇتقارعان
ءتىلشى: ول كىسىنىڭ ادىلدىگى تۋرالى كوپ ايتىلادى. ءتىپتى, كەزىندە «ءولىم جازاسىنا» كەسىلگەن ءبىر عالىمدى اقتاپ العان دەسەدى. وسى تۋرالى تولىعىراق ايتىپ بەرسەڭىزدەر…
قانات ەڭسەنوۆ:
– قايراتكەر تاشەنەۆ ەشكىمدى ۇلتىنا قاراپ الالاماعان. ارقاشان ادىلدىكتى جاقتاعان. ءسىز ايتقان مىسالمەن زەرتتەۋ بارىسىندا ءبىز دە تانىستىق. ماسكەۋدەگى كەزەكتى توراعالىق قىزمەتىن اتقارۋ كەزىندە ۋكرايندىق ءبىر عالىمنىڭ «قىلمىستى ءىسى» الدىنا كەلەدى. قارت عالىمعا ءبىر جاۋاپتى قىزمەتكەردى ءولتىردى دەگەن ايىپ تاعىلىپ, ءولىم جازاسىنا كەسىلىپتى. كەشىرىم جاساۋ تۋرالى ءوتىنىشى دە قابىلدانباپتى. ماسكەۋلىك توراعا ك.ە.ۆوروشيلوۆ دەگەن كىسى دەمالىستا بولعاندىقتان, ونىڭ ورىنباسارى تاشەنەۆ قول قويۋعا ءتيىستى بولعان ەكەن. جوعارعى كەڭەس قىزمەتكەرلەرىنىڭ بۇل ماسەلە ك.ە.ۆوروشيلوۆپەن كەلىسىلگەن دەگەن قارسىلىقتارىنا قاراماستان, ادام تاعدىرى بولعاندىقتان, ول ءولىم جازاسى تۋرالى ۇكىمگە قول قويماي, تۇرمەگە ءوزى بارىپ, قارت عالىمعا جولىعادى. كىناسىز ەكەنىنە كوزى جەتكەن سوڭ, ءىستى قايتا تەرگەۋگە جىبەرتىپ, اقتاپ قالادى. كەيىن كىسى ولتىرگەن قىلمىسكەر دە انىقتالىپ, جازاسىن تارتقانى تۋرالى دەرەكتەر بار.
ءتىلشى: تاشەنەۆ پەن قوناەۆتى ءبىر-بىرىنە ايداپ سالعاندار بولدى دەگەن ءپىكىرلەر جوق ەمەس. بۇل قانشالىقتى شىندىققا جاناسادى؟
سەيىتقالي دۇيسەن:
– دىنمۇحامەد قوناەۆ پەن جۇمابەك تاشەنەۆ سياقتى ەكى ءىرى تۇلعانىڭ سىيلاسىپ, ىنتىماقتاسا جۇمىس جاساۋىنا تاعدىر جازبادى. ەكى ازاماتتىڭ ەل يگىلىگى ءۇشىن جاراسىمدى جۇمىس ىستەۋىنە جەكە باستارىنىڭ پەندەشىلىكتەرىمەن قاتار, سول كەزدەگى «كۇنشىل قازاقتاردان» تۇسەتىن «دومالاق ارىزداردى» كرەمل بيلەۋشىلەرى ولارعا قارسى شەبەر پايدالاندى. ءبىر-بىرىنە قارسى ايداپ سالۋعا تىرىسقان. بۇل وتارشىلداردىڭ ەرتەدەن كەلە جاتقان «ءبولىپ ال دا, بيلەي بەر» ءادىسى بولاتىن. 50-60 جىلدارى قىزمەتتەس بولعان زامانداستارىنىڭ ەستەلىكتەرىنە زەردەلەپ قاراساق, قوناەۆ پەن تاشەنەۆتىڭ جۇمىس ىستەۋ, باسقارۋ ستيلدەرىندە ايىرماشىلىق بولعان. قوناەۆ سىپايى, سابىرلى, بارلىق ءىستى اسىقپاي, بايىپتاپ شەشۋگە ۇمتىلاتىنى كورىنىپ تۇرادى. ال تاشەنەۆ مىنەزى تىك, شاپشاڭ, قىزبالاۋ, وزىنە قاتىستى ماسەلەنى كەيىنگە قالدىرماي, سول ۋاقىتىندا شەشۋگە ۇمتىلاتىن بولعان. اسكەر قاتارىندا بولماسا دا, بۇل جاعىنان اسكەري تارتىپكە داعدىلانعان ادامعا ۇقسايدى.
«شىنجىرداعى دالا جولبارىسى»
ءتىلشى: ايتۋلى تۇلعانىڭ اتى بەرىلگەن وقۋ ورداسى بار ما؟
قانات ەڭسەنوۆ:
– استانا قالاسىندا جۇمابەك تاشەنەۆ كوشەسى بار. 2009 جىلدان بەرى قاراي ۇسىنىستار جاسالىپ, قالالىق اقساقالدار كەڭەسى, قوعامدىق ۇيىمدار, مەكتەپ ۇجىمى جانە اتا-انالار ىنتالى بولعانىمەن, №10 مەكتەپ-گيمنازياعا اتى ءالى بەرىلمەي كەلەدى. تاعى ءبىر ايتا كەتەرلىگى, ەلوردادا قازاق حالقىنىڭ قايراتكەر تۇلعاسىنىڭ ەڭسەلى ەسكەرتكىشى جوق. بۇل – ويلاندىراتىن ماسەلە.
قازىرگى جاھاندىق جاعدايدا ەلدىكتى ساقتاپ, تاۋەلسىزدىكتى باياندى ەتۋىمىز ءۇشىن تاريحي تۇلعالارىمىزدىڭ ءومىر جولى مەن ونەگەلى ىستەرىن جاس ۇرپاققا نەگە ناسيحاتتاماسقا؟! بىلتىر 2015 جىلى تۇلعانىڭ 100 جىلدىعى اتالىپ ءوتتى. بىرقاتار ۇسىنىستار جاسالدى. بىراق جۇزەگە اسپاي كەلەدى. كەزىندە ەل باسىنا كۇن تۋعاندا استىنداعى تاعىنان دا باس تارتىپ, تۋعان جەرى مەن ەلى ءۇشىن قۇرباندىققا بارعان ايتۋلى تۇلعانىڭ رۋحىنا تاعزىم ەتىپ, قولدان كەلگەننىڭ بارلىعىن جاساۋىمىز كەرەك قوي.
ءتىلشى: تاشەنەۆ تۋرالى زەرتتەۋ ءۇشىن ەلىمىزدىڭ بۇكىل وبلىسىنا بارىپ, مۇراعات قۇجاتتارىمەن تانىسىپ, كوز كورگەن جاندارمەن پىكىرلەسىپ, قۇندى دەرەكتەر جينادىڭىزدار. تاشەنەۆ تاعىلىمىن قالاي باعالايسىزدار؟
قانات ەڭسەنوۆ:
– ساياساتتى جاساۋشى ادامدى ساياساتكەر دەيمىز. تاشەنەۆتى كەڭەستىك زامانداعى ۇلتجاندى قازاق ساياساتكەرى دەپ باعالاۋعا بولادى. بىرىنشىدەن, ول سول ۋاقىتتا «ۇلتشىل» دەگەن جالادان قورىقپاي, جوعارى باسشىلىقتا قازاق ۇلتىنان باسشى كادرلار قالىپتاستىرۋدى باتىل قولعا الدى. «قازاقتاندىرۋعا» كۇش سالدى. ەكىنشىدەن, اۋىل شارۋاشىلىعى ەكونوميكاسى سالاسىنىڭ بىلگىر مامانى. وسى سالا بويىنشا ەكى رەت ديسسەرتاتسيا جازعان عالىم. اسىرەسە, جەر وڭدەۋ تەحنولوگياسىن قاتاڭ ساقتاۋدى جاقتاۋشى بولدى. ۇشىنشىدەن, قازاق ونەرى مەن مادەنيەتىنىڭ ۇلكەن جاناشىرى جانە ۇيىمداستىرۋشىسى بولدى. ول باسشىلىق ەتكەن جىلدارى قازاق قالامگەرلەرىنە ەرەكشە قامقورلىق تانىتتى.
سەيىتقالي دۇيسەن:
– ول زاماندا بەتبۇرىس كەزەڭدەرگە بايلانىستى باسشىلىق قىزمەتتە جۇرگەن مەملەكەت قايراتكەرلەرىنە دەگەن كوزقاراس ۇنەمى قۇبىلىپ وتىردى. بۇعان قازاقستانداعى ساياسي وقيعالار ناقتى دالەل. كەڭەس ۇكىمەتىنىڭ باسشىلارى ۇلتجاندى جۇمابەك تاشەنەۆتى ءبىر وبلىستا وقشاۋلاپ ۇستادى. ءاربىر قادامى باقىلاۋدا بولدى. سوندىقتان عالىم كارىشال اسان اتانىڭ تاشەنەۆتى «شىنجىرداعى دالا جولبارىسىنا» تەڭەۋى وتە ورىندى باعا.
ءتىلشى: جۇمابەك تاشەنەۆتىڭ ۇرپاقتارى كىمدەر؟
قانات ەڭسەنوۆ:
– جۇمابەك تاشەنەۆتەن سايان, سايات, بولات, مۇرات جانە اللا دەگەن ءتورت ۇل, ءبىر قىز وربىگەن. سايات دەگەن بالاسىنان باسقالارى ومىردە بار. الماتىدا جانە شىمكەنت قالالارىندا تۇرادى. ءبارى كەزىندە ءبىلىم, عىلىم سالاسىندا ەڭبەك ەتكەن جانە قازىرگى كۇندە زەينەتكە شىققان.
ءتىلشى: تۇلعا جايلى تاعىلىمدى اڭگىمەلەرىڭىزگە راقمەت!
اڭگىمەلەسكەن:
گۇلميرا ايماعانبەت