بيىلعى «جىل مۇعالىمى-2016» قالالىق بايقاۋىندا ەلورداداعى دارىندى بالالارعا ارنالعان №9 «زەردە» مەكتەبىنىڭ بيولوگيا ءپانى مۇعالىمى ءلازىم قاسىموۆا جەڭىمپاز اتاندى.
ول جاس كۇنىنەن ۇلاعاتتى ۇستاز بولۋدى ارمانداپتى. وعان مەكتەپتە وقىپ جۇرگەندە سىنىپ جەتەكشىسى, گەوگرافيا پانىنەن ساباق بەرگەن ايتجان ۋاليەۆانىڭ اسەرى مول بولىپتى. ءوزى دە ءتۇر-تۇلعاسى كەلىستى, سىمباتتى كىسى ەكەن. ءار ساباقتى وزگەشە وتكىزىپ, بالالاردىڭ شىنايى باعبانىنا اينالعان. سونىڭ ءبارى ءسۇيىكتى وقۋشىسىنىڭ ارمانىن ءالديلەپتى. بيىككە سامعاۋعا قاناتتاندىرىپتى. ءلازىمنىڭ تۋعان اپالارى دا پەداگوگتىك جولدى قالاعان مايتالمان مۇعالىمدەر سانالادى.
ءبىزدىڭ كەيىپكەرىمىز بالا كەزىنەن اكەسىنىڭ ەركە قىزى اتانىپتى. ونى پاپاسى باسقالاردان ەرەكشە جاقسى كورگەنى سونداي, بەتىنەن قاقپاي وسىرگەن. «اينالايىن, سەنىڭ قولىڭنان ءبارى كەلەدى. سەن ۇلكەن عالىم بولاسىڭ. ول ءۇشىن ساباقتى جاقسى وقىپ, ۇلگىلى ادام بولۋ كەرەك!» دەپ دەمەۋ بەرىپ قويادى ەكەن. امال نەشىك, وعان قىزىنىڭ جەتىستىگىن كورۋدى جازباپتى.
ءسابيت مۇقانوۆ, عابيت مۇسىرەپوۆ سەكىلدى ادەبيەت الىپتارى دۇنيەگە كەلگەن قىزىلجار ولكەسىندە ءومىر ەسىگىن اشقان ول شوقان ءۋاليحانوۆ اتىنداعى كوكشەتاۋ پەداگوگيكالىق ۋنيۆەرسيتەتىن ءتامامدايدى. ودان كەيىن تۋعان اۋىلىندا ەڭبەك جولىن باستايدى. ءبىلىمى مولايىپ, ءتاجىريبەسى جەتىلە تۇسەدى. 2007 جىلى وتباسىمەن استاناعا قونىس اۋدارادى. سودان بەرى قالاداعى دارىندى بالالارعا ارنالعان №9 «زەردە» مەكتەبىندە جۇمىس ىستەيدى. باس قالاعا كەلگەننەن كەيىن جاس ۇستازدىڭ ءبىلىم جولى كەڭەيەدى.
مەكتەپتەگى جۇمىسىمەن قاتار, 2012-2014 جىلدار ارالىعىندا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى جاراتىلىستانۋ فاكۋلتەتىنىڭ ماگيستراتۋراسىن بىتىرەدى. چەحيا مەملەكەتىنىڭ پراگا قالاسىنداعى بوگەما ورتالىق ۋنيۆەرسيتەتىندە حالىقارالىق تاعىلىمدامادان وتەدى. عىلىمي ديسسەرتاتسياسىن جوعارى دەڭگەيدە قورعاپ, پەداگوگيكا عىلىمدارىنىڭ ماگيسترى اتاعىن الادى. 2013 جىلى بيولوگيا ءپانى بويىنشا مۇعالىمدەرگە ارنالعان رەسپۋبليكالىق قاشىقتىق وليمپياداسىنىڭ ءبىرىنشى ورىن يەگەرى اتانادى. وسى ماراپاتتى ول قاتارىنان ەكى رەت يەلەنەدى.
– «جىل مۇعالىمى-2016» قالالىق بايقاۋىنىڭ باس ءجۇلدەسىن العاندا قاتتى تولقىدىم. قۋانىشتان كوزىمە جاس كەلدى. ارينە, بۇل – ءبىر جاعىنان جالعىز مەنىڭ عانا ەڭبەگىم ەمەس. وعان مەكتەپ ۇجىمى مەن وقۋشىلار جانە اتا-انالار دا سەبەپكەر بولدى. اسىرەسە, «زەردە» مەكتەبىنىڭ العاشقى ديرەكتورى ايتجان شاياحمەتوۆانىڭ تالابى مەن شىعارماشىلىق جۇمىس جاساۋعا باعىتتاۋى ماعان سەرپىلىس بەردى. وقۋشىلاردى ءتۇرلى زياتكەرلىك سايىستارعا دايىنداۋ كەزىندە ءوزىم دە ولارمەن بىرگە ءوستىم. ودان كەيىن ەكىنشى ديرەكتور بولعان قۇرالاي امانگەلدىقىزى مەنى ءبىلىمدەگى جاڭا يننوۆاتسيالىق يدەيالارىمەن ساباق بەرۋدىڭ جاڭاشىل تəسىلدەرىن مەڭگەرۋگە ماشىقتاندىردى. بۇگىنگى مەكتەپ باسشىسى ءاليا سەكسەنوۆانىڭ ىستەگەن جۇمىسىڭدى باعالاۋىنا ەرەكشە رازىمىن. وسى ىستىق ىقىلاستىڭ بارلىعى ماعان قولداۋ بولدى, – دەيدى دارىندى پەداگوگ.
ارينە, كەز كەلگەن ۇستاز ءوز شاكىرتىمەن بيىك كورىنەدى. ونىڭ رەسپۋبليكالىق, قالالىق وليمپيادالاردا وزا شاۋىپ جۇرگەن تالانتتى شاكىرتتەرى كوپ. ءبىلىم سايىستارىندا بيولوگيا ءپانى بويىنشا بىرنەشە رەت قاتارىنان جەڭىمپاز بولعان وقۋشىلار بار. سونىڭ بارلىعى جاڭاشىل پەداگوگتىڭ جاڭا ءورىس ىزدەي بىلەتىن ىزدەنىمپازدىعى دەپ ايتۋعا بولادى.
ونى بۇگىنگى ۇستازداردىڭ جانكەشتى جۇمىسى دا الاڭداتادى. «پەداگوگتەردىڭ اۋىر ەڭبەگى باعالانسا ەكەن دەپ ويلايمىن. قانشاما ۇستاز شəكىرتتەرگە ءبىلىم بەرىپ, ەلىمىزدىڭ بولاشاعىن تəربيەلەپ كەلەدى. قازىرگى تاڭدا مۇعالىمنىڭ مəرتەبەسى قاتتى قىنجىلتادى. اتا-انالار دا بالاسىنىڭ بولاشاعىنا ۇلەس قوسىپ جاتقان ۇستازدارعا سىيلاستىقپەن, ءتۇسىنىستىكپەن قاراسا!» دەپ سالماقتى وي وربىتەدى.
ايتپاقشى, ءلازىم قاسىموۆا – ۇزدىك پەداگوگ قانا ەمەس, ءتورت بالا تاربيەلەپ وتىرعان اسىل انا.
ازامات ەسەنجول
