استانادا ۇلتتىق ناقىشتاعى ەكسكليۋزيۆتى كەزدەمە بۇيىمدارىن جاساۋمەن اينالىساتىن شەبەرحانا بار. ءۇي توقىماسى, ويۋلانعان, كەستەلەنگەن جابدىقتار, جاستىق, دوربا, سەبەت, بالالارعا ارنالعان بۇيىمدار, جورگەك, كۇندەلىكتىڭ تىسى, ءتىنتۋىر توسەمەسى, پاننو جاسالاتىن بۇل شەبەرحانا «Omir art studio» دەپ اتالادى.
«بىزدەگى بارلىق دۇنيەلەر تۇتىنۋشىلاردىڭ تاپسىرىسىمەن پايدا بولدى. ماسەلەن, قۇربىم قىزىنىڭ تۇساۋكەسەرىنە ارنالعان «اق جول» ويۋلى توسەگىشىن جاساپ بەرۋدى ءوتىندى. «ينستاگرام» الەۋمەتتىك جەلىسىنە سالعاننان كەيىن باسقا دا ادامداردان سۇرانىس ءتۇستى. بۇيىمداردىڭ ەشبىر ءتۇرىن ارنايى ويلاپ تاپقان جوقپىن. بارلىعى تۇتىنۋشىلارىمىزدىڭ تاپسىرىس-تىلەكتەرىنەن تۋىندادى. سونىمەن بىرگە جاڭا تۋعان ءسابيدى پەرزەنتحانادان الىپ شىعۋعا ارنالعان جورگەكتەرگە سۇرانىس كوپ. ءتىپتى, نارەستەنىڭ ەسىمىن كەستەلەپ تىگىپ, ويۋلارمەن ورنەكتەۋدى سۇرايتىندار دا بار. ءبىر كىسى ءتىپتى ءسابيدىڭ رۋى, تۋعان كۇنى, ۋاقىتى, بويى, سالماعىنا دەيىن كەستەلەپ بەرۋدى ءوتىندى. ۇزاتىلاتىن قىزداردىڭ جاساۋىنا ارنالعان جاستىق, كورپەشەلەرگە جاس جۇبايلاردىڭ ەسىمدەرىن جازدىق. بۇل ءداستۇرىمىزدىڭ جاندانىپ, دارىپتەلۋى دەپ بىلەمىن. سونىمەن قاتار, كۇندەلىكتىڭ تىسى, پاننو سياقتى بۇيىمدارعا دا يەسىنىڭ ەسىمىن كەستەلەپ, تاپسىرىسپەن ارنايى سىيلىق رەتىندە تىگىپ ءجۇرمىز. تاپسىرىستى قايتالاماۋعا, ءاردايىم جاڭا تۇرلەرىن ويلاپ تابۋعا تىرىسامىن. قازىر جۇرتتىڭ تالعامى جوعارى. ماقساتىم – تابىس تابۋ ەمەس, جاستار اراسىندا ۇلتتىق بۇيىمدارىمىزدى ناسيحاتتاۋ» دەيدى شەبەرحانا باسشىسى ەۆگەنيا جاندارباەۆا.
بۇل كاسىپتى ول العاش رەت 2012 جىلدىڭ كۇزىندە قۇربىسىمەن بىرگە باستاعان بولاتىن. بۇگىندە شاعىن شەبەرحانادا ونىڭ ەكى كومەكشىسى بار. مۇندا ارنايى جارناما جاسالمايدى, قولونەر بۇيىمدارى تۋرالى اۋىزدان-اۋىزعا تاراپ, كليەنتتەردىڭ وزدەرى حابارلاسادى. كوبىنە عالامتور ارقىلى كولەمى, تۇسىنە بايلانىستى تاپسىرىس بەرەدى. ءسويتىپ ديزاينىن ويلاستىرىپ, جەتىلدىرىپ تەلەفون ارقىلى كەلىسەدى. قولدان جاسالعان بۇيىمداردىڭ ءبىرشاما ۋاقىت الاتىنى بەلگىلى. دەگەنمەن, ەڭبەگىنىڭ راحاتى دا جوق ەمەس. تاپسىرىس بەرۋشىلەرى دە ءارتۇرلى. ءالى ەسىندە, پاريجدە تۇراتىن قانداس ءبىر اعاي استاناعا كەلگەندە پاننو قابىرعا كەسكىندەمەلىك تۋىندىسىنا جەتى اتاسىن كەستەلەتىپ جازدىرۋعا تاپسىرىس بەرىپتى. اراسىنا ويۋلاردان باسقا جىلقىنى كوبىرەك سۋرەتتەۋدى تىلەك ەتىپتى. بۇل شىققان تەگىن ءبىلۋ, اتا-باباسىنا قۇرمەت كورسەتۋ دەپ تۇسىنەدى ەكەن ءوزى.
– كەيىنگى كەزدە «شەجىرە» جەتى اتانىڭ ەسىمى جازىلعان پاننولارعا تاپسىرىس ارتتى. بۇل كەيىنگىلەرگە جاقسى ۇلگى ەمەس پە؟! كوز الدىڭدا كونەنىڭ كوزى, وتكەننىڭ بەلگىسىندەي مۇرالار تۇرسا, بالالارىمىز دا جاۋاپكەرشىلىكتى سەزىنە بىلەر ەدى عوي دەپ ويلايمىن. سوندىقتان ءار اشەكەيگە وسىنداي شەجىرە شەرتىپ, تاريحقا تارتاتىن ورنەك سالۋدى جاقسى ادەتكە اينالدىرعىم كەلەدى, – دەيدى ەۆگەنيا.
شىراق بايكەنوۆا,
ل.گۋميلەۆ اتىنداعى ەۇۋ
جۋرناليستيكا جانە ساياساتتانۋ فاكۋلتەتىنىڭ ستۋدەنتى
