پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ۇلتتىق جوبالار قارالدى. ولاردى بيىل 24 قىركۇيەكتە رەفورمالار جونىندەگى جوعارى كەڭەس وتىرىسىندا مەملەكەت باسشىسى تۇجىرىمدامالىق تۇرعىدان ماقۇلدادى.
ۇلتتىق ەكونوميكا ءمينيسترى اسەت ەرعاليەۆ, اۋىل شارۋاشىلىعى ءمينيسترى ەربول قاراشوكەەۆ, ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, ءبىلىم جانە عىلىم ءمينيسترى اسحات ايماعامبەتوۆ, دەنساۋلىق ساقتاۋ ءمينيسترى الەكسەي تسوي, اقپارات جانە قوعامدىق دامۋ ءمينيسترى ايدا بالاەۆا, ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى قايرات كەلىمبەتوۆ بايانداما جاسادى.
«مەملەكەت باسشىسى قاسىم-جومارت توقاەۆ 2020 جىلعى 1 قىركۇيەكتەگى قازاقستان حالقىنا جولداۋىندا مەملەكەتتىك باعدارلامالاردان ۇلتتىق جوبالارعا كوشۋدى قامتاماسىز ەتۋدى تاپسىردى. مەملەكەتتىك جوسپارلاۋدىڭ جاڭا جۇيەسىن ىسكە اسىرۋ اياسىندا ۇلكەن جۇمىس اتقارىلدى» دەدى ا.مامين. «تۇراقتى ەكونوميكالىق ءوسۋ», «كاسىپكەرلىكتى دامىتۋ», «قۋاتتى وڭىرلەر – ەل دامۋىنىڭ درايۆەرى» ۇلتتىق جوبالارى, 2021-2025 جىلدارعا ارنالعان اگروونەركاسىپتىك كەشەندى دامىتۋ جونىندەگى ۇلتتىق جوبا, «جاسىل قازاقستان», «تسيفرلاندىرۋ, يننوۆاتسيالار جانە عىلىم ەسەبىنەن تەحنولوگيالىق سەرپىلىس», «ءبىلىمدى ۇلت» ساپالى ءبىلىم بەرۋ», «سالاماتتى ۇلت» ءار ازامات ءۇشىن ساپالى جانە قولجەتىمدى دەنساۋلىق ساقتاۋ», «ۇلتتىق رۋحاني جاڭعىرۋ» ۇلتتىق جوبالارى بيىل قابىلدانعان جالپىۇلتتىق باسىمدىقتاردى, ۇلتتىق دامۋ جوسپارى مەن ۇلتتىق قاۋىپسىزدىك ستراتەگياسىن ىسكە اسىرۋ ءۇشىن ازىرلەندى.
پرەمەر-مينيستر ۇلتتىق جوبالاردا كوزدەلگەن ءىس-شارالار مەملەكەت باسشىسىنىڭ تاپسىرمالارىنا جانە Nur Otan پارتياسىنىڭ سايلاۋالدى باعدارلاماسىندا قويىلعان مىندەتتەرگە تولىق سايكەس كەلەتىنىن اتاپ ءوتتى. ۇلتتىق جوبالاردى ىسكە اسىرۋ ەكونوميكانىڭ ورنىقتىلىعى مەن باسەكەگە قابىلەتتىلىگىن ودان ءارى ارتتىرۋدىڭ, قازاقستاندىقتاردىڭ ءومىر ءسۇرۋ ساپاسىن جاقسارتۋدىڭ فاكتورىنا اينالادى. قويىلعان مىندەتتەرگە قول جەتكىزۋ ماقساتىندا ۇلتتىق جوبالاردى بيۋدجەت قاراجاتى جانە جەكە ينۆەستيتسيالار ەسەبىنەن باسىم قارجىلاندىرۋ كوزدەلگەن. ۇكىمەت باسشىسى جوبالىق تاسىلدەردى قولدانا وتىرىپ, ۇلتتىق جوبالاردى ساپالى ىسكە اسىرۋدى قامتاماسىز ەتۋدى تاپسىردى.
