ۇلتتىق ەكونوميكانىڭ ۇپايى تۇگەندەلەدى
قر ۇلتتىق ەكونوميكا ءمينيسترى ەربولات دوساەۆ «نۇرلى جول – بولاشاققا باستار جول» اتتى ەلباسىنىڭ جولداۋىنا ارنالعان ۆەدومستۆو القاسىنىڭ وتىرىسىندا مينيسترلىكتىڭ الدا اتقاراتىن قىزمەتتەرىنە توقتالدى. ونىڭ ايتۋىنشا, جاقىن ۋاقىتتا قر ۇلتتىق ەكونوميكا مينيسترلىگى 2015-2019 جىلدارعا ارنالعان ينفراقۇرىلىمدىق دامۋ جونىندەگى مەملەكەتتىك باعدارلاما جوباسىن ازىرلەپ, مەملەكەت باسشىسىنىڭ قاراۋىنا جىبەرەتىن بولدى.
مينيستر ۇجىم الدىندا جاساعان بايانداماسىندا جولداۋداعى ناقتى جوبالار جانە ولارعا قاجەتتى كولەمدەگى قاراجات كوزدەرى بەلگىلەنگەنىن ايتىپ, جاڭا ەكونوميكالىق ساياسات كونترتسيكلدى بولاتىنىن جەتكىزدى. ياعني, بۇل دەگەنىمىز – ەكونوميكالىق باياۋلاۋ كەزەڭدەرىندە مەملەكەتتىك شىعىستاردى ءوسىرۋدى جانە جوعارى ەكونوميكالىق بەلسەندىلىك كەزەڭدەرىندە مەملەكەتتىك شىعىستاردى تەجەۋ.
«جاڭا ەكونوميكالىق ساياسات ەكونوميكامىزداعى قۇرىلىمدىق رەفورمالاردى جالعاستىرۋعا باعىتتالاتىن بولادى. بۇل باسەكەگە قابىلەتتىلىكتى, ونىمدىلىكتى ارتتىرۋ, ەكونوميكانىڭ قۇرىلىمىن جانە ونىڭ جاڭا تاۋارلار شىعارۋ مەن قىزمەتتەر ۇسىنۋ قابىلەتىن جاقسارتۋدى بىلدىرەدى. سوندىقتان, ۇلتتىق قوردىڭ جاڭا ينۆەستيتسيالارى ەكونوميكانى ودان ءارى جاڭارتۋعا باعىتتالادى. ەڭ الدىمەن, بۇل – كولىك, ەنەرگەتيكا, يندۋستريالىق جانە الەۋمەتتىك ينفراقۇرىلىمدى, شاعىن جانە ورتا بيزنەستى دامىتۋ» دەپ ءتۇسىندىردى ەربولات دوساەۆ.
سونىمەن قاتار, ول قر ۇلتتىق ەكونوميكا مينيسترلىگى ەلباسىنىڭ «نۇرلى جول – بولاشاققا باستار جول» جولداۋىن مەرزىمىندە ىسكە اسىرۋ ماقساتىندا 25 شارادان تۇراتىن جالپىۇلتتىق جوسپار دايىنداعاندىعى جونىندە مالىمدەدى.
«بۇل قۇجات جولداۋدى ىسكە اسىرۋ بويىنشا العىشارتتاردى قابىلداۋدى قاراستىرادى. ونىڭ ىشىندە 2015-2019 جىلدارعا ارنالعان ينفراقۇرىلىمدىق دامۋدىڭ مەملەكەتتىك باعدارلاماسىن دايىنداۋ جاعى وزەكتى تاقىرىپ بولماق. ول مينيسترلىك تاراپىنان دايىندالۋى ءتيىس» دەدى مينيستر.
ۆەدومستۆونىڭ مالىمەتىنشە, مەملەكەتتىك باعدارلاما مەملەكەت باسشىسىنىڭ جولداۋىندا ايتىلعان نەگىزگى 7 باعىتتى قامتىعان. ولاردىڭ ىشىنە ەلدىڭ كولىكتىك-لوگيستيكالىق, يندۋستريالدىق جانە تۋريزم, ەنەرگەتيكالىق ينفراقۇرىلىمدارىن دامىتۋمەن قاتار تۇرعىن-ءۇي كوممۋنالدىق شارۋاشىلىعىن, سۋ جانە جىلۋمەن قامتاماسىز ەتۋ جەلىلەرىن جاڭعىرتۋ, تۇرعىن-ءۇي ينفراقۇرىلىمىن نىعايتۋ,
الەۋمەتتىك ينفراقۇرىلىمدى دامىتۋ, شاعىن جانە ورتا بيزنەستى, سونداي-اق, ىسكەرلىك بەلسەندىلىكتى قولداۋ كىرەدى.
ۇلتتىق ەكونوميكا ءمينيسترىنىڭ ايتۋىنشا, ءاربىر باعىت بويىنشا مەملەكەتتىك باعدارلاما جوباسىندا ارنايى بولىمدەر مەن ولاردىڭ نەگىزگى تەتىكتەرى, قارجى ينسترۋمەنتتەرى جانە جوبالاردىڭ ىسكە اسىرىلۋ مەرزىمدەرى ناقتىلانعان. ال مەملەكەتتىك باعدارلاما جوباسى وسى ايدىڭ سوڭىنا دەيىن ەلباسىنىڭ قاراۋىنا جىبەرىلەدى.
«نۇرلى جول» جاڭا ەكونوميكالىق ساياساتىن ىسكە اسىرۋ ءۇشىن 2015 جىلدان باستاپ 2017 جىلدارى ارالىعىندا ۇلتتىق قوردان جىل سايىن 3 ميللارد دوللار بولىنەدى.
نۇريسلام قۇسپانعالي