ەلوردا اكىمى التاي كولگىنوۆ وقۋ ورىندارى ديرەكتورلارىمەن كەزدەسىپ, ءبىلىم سالاسىنداعى وزەكتى ماسەلەلەردى تالقىلادى. كەزدەسۋ بارىسىندا اكىم ۇستازدار ەڭبەگىنىڭ زور ەكەنىن باسا ايتىپ, استانامىزدىڭ ءبىلىم سالاسىنداعى جوسپارلارىمەن ءبولىستى.
21:38:ء53بىرىنشى كەزەكتە جىل سايىن تۇرعىندار سانى ارتىپ كەلە جاتقان ەلوردامىزداعى وقۋ ورىندارىنىڭ قۇرىلىسى ءسوز بولدى. مۇعالىمدەر ءبىلىم ساپاسىن عانا ويلاۋى ءۇشىن وقۋ ورىندارىن جۇيەلى تۇردە سالۋ كەرەك. بيىل مەكتەپ قۇرىلىسى قارقىنىنىڭ ارتۋىنا بايلانىستى ءۇش اۋىسىمدى مەكتەپتەر سانىن 8-دەن 4-كە دەيىن, تولى رەجيمدەگى مەكتەپتەر 22-دەن 14-كە دەيىن ازايعان. 5 جىلدىق كەزەڭگە ارنالعان كەشەندى جوسپار اياسىندا 50 مەملەكەتتىك مەكتەپ قۇرىلىسى جوسپارلانعان. بۇعان قوسا, قوسىمشا وقۋ ورىندارى جەكەمەنشىك ينۆەستيتسيالار ەسەبىنەن سالىنىپ جاتىر. قالا اكىمدىگى شاعىن مەكتەپتەر سالۋدان باس تارتىپ, ءىرى مەكتەپتەر سالۋعا كوشكەن.
ەلوردا اكىمىنىڭ ايتقان ەكىنشى ماسەلەسى – مۇعالىمدەردىڭ باسپانا جاعدايى مەن ەڭبەكاقىلارىن ارتتىرۋ جاعى. «مەملەكەت باسشىسى «پەداگوگ مارتەبەسى تۋرالى» زاڭ قابىلدادى. بيىلعى 1 قاڭتاردان باستاپ مۇعالىمدەردىڭ جالاقىسى 25 پايىزعا ءوستى, الداعى جىلدارى دا ەڭبەكاقى ارتادى. تۇرعىن ءۇي سەرتيفيكاتتارى تەگىن بەرىلەدى. «قازاقستان يپوتەكا كومپانياسىمەن» بىرلەسىپ, ءبىر مىڭ الەۋمەتتىك پاتەر تاپسىرامىز. ولاردى الۋشىلار قاتارىندا ءبىلىم سالاسىنىڭ ماماندارى دا بار. 2019 جىلى مۇعالىمدەرگە جاتاقحانا سالىپ بەردىك. بيىلعى كۇزدە «نۇر-سۇلتان قالاسىنىڭ قۇرمەتتى پەداگوگى» مەدالى يەگەرلەرىنە دە العاش رەت اقشالاي تولەمدەر ەنگىزدىك. ءار يەگەرگە 830 مىڭ تەڭگەدەن استام قارجى بەرىلەدى» دەدى قالا باسشىسى.
«مۇعالىم» ماماندىعى بويىنشا گرانتتار سانىن كوبەيتۋ مەن بىلىكتىلىك ارتتىرۋ ماسەلەسى دە نازاردان تىس قالعان جوق. بيىل تەگىن بىلىمگە شامامەن 900 گرانت ءبولىندى. «ونداعان مەكتەپ سالۋعا بولادى, بىراق بالالاردى قابىرعا ەمەس, ءوزىمىزدىڭ پەداگوگتار وقىتادى. بىلىكتىلىكتى ارتتىرىپ, تاجىريبە الماسۋ ءۇشىن سەمينار, شەبەرلىك ساباقتارىن وتكىزەمىز. كەمبريدج ۋنيۆەرسيتەتىمەن بىرلەسىپ, بەس مەكتەپتە «Share» باعدارلاماسىن ىسكە قوستىق. مۇعالىمدەر بۇل باعدارلاما بويىنشا شەتەلدە دە جاڭا قاجەتتى بىلىممەن سۋسىنداۋعا مۇمكىندىك الدى. باعدارلامانى كەلەسى جىلى دا جالعاستىرامىز» دەدى التاي كولگىنوۆ.
بيىل پەداگوگتار ءۇشىن وڭاي بولعان جوق. مۇعالىمدەر ونلاين ءبىلىم بەرۋدىڭ جاڭا ءادىس-تاسىلدەرىن مەڭگەرۋ ءۇشىن بار كۇشىن سالدى. ايتا كەتەيىك, 9-11-سىنىپ وقۋشىلارى مەكتەپ بىتىرەتىندىكتەن, 3-توقساننان باستاپ ارالاس وقىتۋ فورماتىنا كوشەدى.
