ءاز ناۋرىزدا ەلوردادا ەرتىستىڭ سىلدىرى ەستىلگەن. شىعىسقازاقستاندىق جاس اقىندار قۇرالاي ومار مەن ازامات تاسقارا استانالىقتاردى اسەم جىرلارىمەن ءسۇيسىنتىپ, بولەكشە سازىمەن تەربەتكەن-ءتىن. ساۋىردە سوناۋ تارازدىڭ شايىرلارى باس شاھاردىڭ تابالدىرىعىن جاسقانباي اتتاپ, جىرسۇيەر قاۋىمدى ءدۇلدۇل ولەڭنىڭ بۋىنا مالعان. كوركەم ليريكانىڭ تۇڭعيىعىنا سۇڭگىتىپ, مەيىرلەرىن قاندىرعان. ەندى ءتۇۋ باتىستان اتىراۋلىق جاس اقىندار, سوسىن الماتىنىڭ ءسوز زەرگەرلەرى اسەم قالاعا ات باسىن بۇرماق. بۇل شارالاردى ۇيىمداستىرۋشى – قر ۇلتتىق اكادەميالىق كىتاپحاناسى جانىنان قۇرىلعان «جانسۋسار» جاس قالامگەرلەر كلۋبى. جۇرتشىلىق ويىنان شىققان يگى ءىستىڭ جالعاسىن بىلمەككە كلۋب جەتەكشىسى ازامات ەسالىنى اڭگىمەگە تارتتىق.
– جوعارىدا اتالعان شارالار لەگى قانداي ماقساتتا قولعا الىندى؟
– بيىل, بارىمىزگە بەلگىلى, «استانا – تۇركىتىلدەس ەلدەر مادەنيەتىنىڭ استاناسى» جىلى. وسى جىل اياسىندا ەلىمىزدىڭ بارلىق وبلىسىنداعى جاس اقىنداردىڭ ءۇنىن ەلوردالىقتارعا ەستىرتۋ, تىڭداتۋ ماقساتىندا ولاردىڭ كەشتەرىن ۇيىمداستىرۋدامىز. باستامامىزدىڭ باعىتى قۋانتادى. ءاربىر اقىن ۇلكەن دايىندىقپەن كەلىپ, استانالىق اعايىندى جىر كاۋسارىنا بولەۋدە.
– ءوزىڭىز جەتەكشىلىك ەتىپ وتىرعان كلۋب وسىعان دەيىن نەندەي ىستەردى اتقارىپ ۇلگەردى؟
– اشىلعانىمىزعا كوپ تە بولعان جوق. بار-جوعى ءبىر جىل. كلۋب مۇشەلەرى ءجيى باس قوسىپ, شىعارمالارىن تالداۋدى جۇيەلى جولعا قويعان. ەڭ باستىسى, ءبىزدىڭ ۇيىتقى بولۋىمىزبەن جاقىندا «التىن قىران» حالىقارالىق قورى قۇلتولەۋ مۇقاش, تاناگوز تولقىنقىزى, اسىلزات ارىستانبەك, ەرلان ءجۇنىس, ميراس اسان, سەرىك ساعىنتاي سىندى جاس اقىن-جازۋشىلار كىتاپتارىن شىعاردى. سالتاناتتى تۇردە ولاردىڭ تۇساۋكەسەرىن وتكىزدىك. مۇنىمەن توقتالماي, تالداۋ كەشتەرىن ۇيىمداستىردىق. ماسەلەن, ە.ءجۇنىستىڭ شىعارماشىلىعىن بەلگىلى اقىن ج.اسكەربەكقىزى, م.اساننىڭ كىتابىن ادەبيەت سىنشىسى ا.كەڭشىلىكۇلى, ا.ارىستانبەكتىڭ ولەڭدەرىن ب.بەرىكۇلى تالدادى.
– ەندىگى جوسپارلارىڭىزبەن بولىسسەڭىز…
نەگىزىنەن, جوسپار كوپ. بەلدىسىن ايتسام, جاقىن ارادا ۇلكەن ءمۇشايرا وتكىزبەكپىز. جۇلدەسى دە قوماقتى بولماق. ازىرگە دەمەۋشىلەرمەن كەلىسسوزدەر جۇرگىزىلۋدە. بۇل دا اقىندارىمىزدىڭ شابىتىن شارىقتاتىپ, جازارلارىن كوبەيتەدى دەگەن ويدامىز. وسى ورايدا, كىتاپحانا ديرەكتورى جاننا شايمۇحامبەتوۆا مەن ونىڭ ورىنباسارى عاليا بوكەيقىزىنا جاس قالامگەرلەردىڭ اتىنان ۇلكەن العىسىمدى بىلدىرگىم كەلەدى. جاناشىر اپالارىمىز اركەز ءىسىمىزدىڭ وڭ شەشىمىن تابۋىنا كۇشتەرىن اياعان ەمەس.
اسحات رايقۇل
