ەلوردادا قازاقستان اۋماعىندا تۇتقىندالىپ, قازا تاپقان جاپوندىقتارعا ارنالعان ەسكەرتكىش اشىلدى. ونىڭ اشىلۋ سالتاناتىنا وسى ەلدىڭ دەنساۋلىق ساقتاۋ, ەڭبەك جانە ءال-اۋقات مينيسترلىگىنىڭ دەلەگاتسياسى كەلدى. قازاقستان تاراپىنان ەلوردا اكىمىنىڭ ورىنباسارى ەرلان بەكمۋرزاەۆ, قر سىرتقى ىستەر مينيسترلىگى مەن ەسىل اۋدانى اكىمدىگىنىڭ وكىلدەرى قاتىستى.
جاپون قۇرباندارىنىڭ قۇرمەتىنە مونۋمەنت ورناتۋدى جاپونيا ەلشىلىگى باستاما ەتىپ كوتەرگەن بولاتىن. جات ەلدەگى لاگەرلەردە تۇتقىندالىپ, قازا بولعان تۇتقىندارعا بۇرىنعى كەڭەستىك ەلدەردە 16 ەسكەرتكىش ورناتىلعان. قازاقستاندا ورناتۋ تۋرالى بىلتىردان بەرى ايتىلدى. اقىرى «Arda-Art» كومپانياسى كەلىسىمشارت نەگىزىندە ءۇش ايدا ەلوردادا اتالعان ەسكەرتكىشتى جاساپ, ورناتتى. ەسكەرتكىش «تريۋمفالنىي» تۇرعىن ءۇي كەشەنى جانىنداعى اللەياعا قويىلدى. سالتاناتتى جيىنعا قاتىسقان «ALJİR» مەموريالدى-مۋزەي كەشەنىنىڭ ديرەكتورى سامات تەرگەنباەۆ بۇل ەسكەرتكىشتىڭ تاريحي ماڭىزى جوعارى ەكەنىن جەتكىزدى.
– كەڭەس وداعى كەزىندە كوپتەگەن جاپوندىقتار ءبىزدىڭ جەرىمىزگە تۇتقىن رەتىندە جەر اۋدارىلىپ, وتانىنا ورالۋدى ارمانداۋمەن ءوتتى. بۇل ەسكەرتكىش سولارعا ارناپ جاسالدى. «ALJİR» لاگەرىندە كەڭەس وداعىنىڭ وكىلىنە تۇرمىسقا شىعىپ, جازىقسىز جازالانعان جاپون ايەلى وتىردى. 1946 جىلى ول بوستاندىققا شىقتى. ودان كەيىنگى تاعدىرى قالاي بولعانى بەلگىسىز. ال بۇگىنگى ءىس-شارا قازاقستان مەن جاپونيا اراسىنداعى ءوزارا قارىم-قاتىناستىڭ وزىق ۇلگىسىن كورسەتتى, – دەدى مۋزەي ديرەكتورى.
