بالا كۇتىمى بويىنشا 4,5 مىڭنان استام ەلوردالىقتىڭ جاردەماقى مەرزىمى ۇزارتىلدى. بۇل تۋرالى وڭىرلىك كوممۋنيكاتسيالار قىزمەتىندەگى بريفينگتە ايتىلدى.
– مەملەكەت باسشىسى 2022 جىلعى 1 قىركۇيەكتەگى قازاقستان حالقىنا جولداۋىندا بالا كۇتىمى بويىنشا جاردەماقى تولەۋ مەرزىمىن 1 جىلدان 1,5 جىلعا دەيىن ۇلعايتۋ تۋرالى تاپسىرما بەردى. وسىلايشا, 2023 جىلدىڭ 1 قاڭتارىنان باستاپ بوسانعان ايەلدەرگە 1,5 جىلعا جاردەماقى تاعايىندادى. ال 2023 جىلدىڭ 1 قاڭتارىنا دەيىن جاردەماقى الىپ وتىرعانداردىڭ تولەمى اۆتوماتتى تۇردە تاعى 6 ايعا ۇزارتىلدى, – دەدى ەڭبەك جانە الەۋمەتتىك قورعاۋ كوميتەتىنىڭ استانا قالاسى بويىنشا دەپارتامەنتى باسشىسىنىڭ الەۋمەتتىك سۇراقتار بويىنشا ورىنباسارى دامەجان سادۋاقاسوۆا. بۇعان دەيىن قازاقستاندا بالا كۇتىمى بويىنشا جاردەماقى الاتىنداردىڭ زەينەتاقى جارنالارى سۋبسيديالاناتىنى ايتىلعان ەدى.
