كەشە م.وتەمىسۇلى اتىنداعى وقۋشىلار سارايىندا قازاقستان رەسپۋبليكاسى پارلامەنتى سەناتىنا استانا قالاسىنان جاڭا دەپۋتاتتى سايلاۋ ءوتتى. وعان ەلوردالىق ءماسليحاتتىڭ بارلىق دەپۋتاتتارى قاتىستى.
بۇعان دەيىن حابارلاعانىنداي, پارلامەنت سەناتىنا دەپۋتاتتار سايلاۋ قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ جارلىعىنا سايكەس «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنىڭ 69-بابى مەن كونستيتۋتسيانىڭ 44-بابىنىڭ 2-تارماقشاسىنا سايكەس, 2014 جىلدىڭ 1 قازانىنا بەلگىلەنگەن بولاتىن.
قالالىق سايلاۋ كوميسسياسىنىڭ توراعاسى مارات اۋباكىروۆتىڭ ايتۋىنشا, باستاپقىدا استانا قالاسىنان سەنات دەپۋتاتتىعىنا كانديدات رەتىندە ءتورت ادام تىركەلگەنىمەن, سايلاۋالدى ناۋقانى كەزىندە سەرىك قانافيننەن ءوز كانديداتۋراسىن الىپ تاستاۋ جونىندە ءوتىنىش كەلىپ تۇسكەن. وسىلايشا, سەنات دەپۋتاتتارىن سايلاۋ جونىندەگى ارناۋلى بيۋللەتەنگە استانا قالاسىنان ءۇش كانديدات – سەرىك جاقسىبەكوۆ, الەكساندر سمورودين, بەيسەمبەك قاراتاەۆ تىركەلدى.
– سەنات دەپۋتاتتارىن تاڭداۋ جاناما سايلاۋ قۇقى نەگىزىندە جاسىرىن داۋىس بەرۋ ارقىلى جۇزەگە اسادى. جاناما سايلاۋ قۇقى – پارلامەنت سەناتى دەپۋتاتتارىنىڭ سايلاۋىندا داۋىس بەرۋگە تەك قانا تاڭداۋشىلار, ياعني, ءماسليحاتتار دەپۋتاتتارى عانا قاتىسادى دەگەندى بىلدىرەدى. ەلورداداعى داۋىس بەرۋ ىسىنە 25 تاڭداۋشى قاتىسىپ, بارلىق داۋىستى ەسەپتەگەننەن كەيىن قالالىق ءماسليحات دەپۋتاتتارىنىڭ باسىم بولىگى ءوز داۋىستارىن سەرىك جاقسىبەكوۆكە بەرگەنى بەلگىلى بولدى. وسىلايشا, س.جاقسىبەكوۆ جالپى داۋىستاردىڭ 23-ءىن جيناسا, ا.سمورودينگە ەكى تاڭداۋشى عانا داۋىس بەرگەن. ال, ب.قاراتاەۆقا داۋىس بەرگەندەر جوق,- دەدى قالالىق سايلاۋ كوميسسياسىنىڭ توراعاسى.
قالالىق ءماسليحاتتىڭ دەپۋتاتى زەينوللا شيبكەنوۆ سايلاۋعا العاشقىلاردىڭ ءبىرى بولىپ كەلدى.
– بۇگىن مەن ءوز تاڭداۋىمدى جاسادىم. مەنىڭشە, پارلامەنتتىڭ جوعارعى پالاتاسىندا ءبىزدىڭ قالانى وتە جاقسى بىلەتىن, وسى جەردە تۋىپ-وسكەن, وسى قالانىڭ وركەندەۋىنە ۇلەس قوسقان ازامات وتىرۋى كەرەك دەپ ەسەپتەيمىن. سوندىقتان, ءوز داۋىسىمدى ەلوردا تۇرعىندارىنا, تۇتاستاي العاندا, قازاقستاندىقتارعا قولۇشىن بەرە الاتىن ازاماتقا بەردىم, – دەدى دەپۋتات.
حالىقارالىق باقىلاۋشىلار سەنات دەپۋتاتتارىن سايلاۋعا جوعارى باعا بەردى. بۇل رەتتە ازەربايجان ورتالىق سايلاۋ كوميسسياسى ءتوراعاسىنىڭ ورىنباسارى ناتيك مامەدوۆ: «ءبىز بۇگىن استاناداعى سايلاۋ ۇدەرىسىن بايقاپ, اشىق ءارى دەموكراتيالىق جولمەن وتكەنىنە كۋا بولدىق. سەنات دەپۋتاتتىعىنا سايلاۋ قازاقستان حالقى ءۇشىن ۇلكەن ماڭىزعا يە. سەبەبى, بۇگىن سايلانعان دەپۋتاتتار ەل مۇددەسى ءۇشىن قىزمەت ەتەتىن بولادى» دەدى.
باسقا باقىلاۋشىلار دا سايلاۋ وتكىزۋدە قازاقستاننان ۇلگى الاتىن تۇستار بارىن اتاپ ءوتتى. جالپى, قالالىق سايلاۋ كوميسسياسىنىڭ توراعاسى سايلاۋ بارىسىندا ەشقانداي ەسكەرتۋ تۇسپەگەنىن جانە زاڭ بۇزۋ كورىنىستەرىنىڭ بولماعانىن جەتكىزدى.
گۇلبارشىن وكەشقىزى
