بۇگىن ەلوردامىزدا استانا قالاسى اكىمدىگىنىڭ ۇيىمداستىرۋىمەن بوس جۇمىس ورىندارى جارمەڭكەسى بولىپ ءوتتى. جارمەڭكەگە ءبىلىم بەرۋ مەكەمەلەرى مەن دەنساۋلىق ساقتاۋ ۇيىمدارى, قۇرىلىس كومپانيالارى, بالاباقشالار جانە ءتىل كۋرسىن ۇيرەتەتىن مەكەمەلەر, قوناق ءۇي, ءورت ءسوندىرۋ قىزمەتى سونداي-اق, ىشكى ىستەر ورگانى سەكىلدى 30 ءتۇرلى جۇمىس بەرۋشى قاتىسىپ, 300-دەن استام بوس جۇمىس ورنىن ۇسىندى.
استانا قالاسىنىڭ جۇمىسپەن قامتۋ ورتالىعى ماماندارىنىڭ ايتۋىنشا, بۇل جىل باسىنان بەرى التىنشى رەت ۇيىمداستىرىلىپ وتىرعان شارا. «وسى ارالىقتا بارلىعى 175 ادام تۇراقتى جۇمىسقا ورنالاستى. مۇنداي بوس ورىندار جارمەڭكەسى ەلوردامىزدا 2011 جىلدان بەرى, ياعني, استانا قالاسىنىڭ جۇمىسپەن قامتۋ ورتالىعى اشىلعان كۇننەن باستاپ تۇراقتى تۇردە وتكىزىلىپ كەلەدى. وسى ارالىقتا 36 بوس ورىندار جارمەڭكەسى ۇيىمداستىرىلىپ, بارلىعى 30 مىڭنان استام ادام جۇمىسقا ورنالاسقان. تاعى 9,5 مىڭنان استام ادام كاسىبي دايارلىق جانە قايتا دايارلىقتان ءوتتى» دەيدى استانا قالاسىنىڭ جۇمىسپەن قامتۋ ورتالىعىنىڭ ديرەكتورى ولجاس ومار.
جىل سوڭىنا دەيىن تاعى وسىنداي 6 بوس جۇمىس ورىندارىنىڭ جارمەڭكەسى وتەتىن بولادى.
بۇركىت نۇراسىل
