جاقىندا پارلامەنت سەناتىنىڭ دەپۋتاتى نۇرلان ورازالين ۇكىمەت اتىنا جۋرناليستەر قاۋىمىنا قامقورلىق كورسەتۋ جونىندە ساۋال جولدادى. رەداكتسيامىزعا وسى تاقىرىپتى قاۋزاعان ماقالا كەلىپ ءتۇستى. وندا اۆتور جوعارى وقۋ ورنىنداعى وقۋ اقىسىنىڭ قىمباتتىعىن قوزعاپ, جاس جۋرناليستەر الدىنان كەزدەسەر الەۋمەتتىك قيىندىقتار جايىندا پىكىر ءبىلدىردى.
مەملەكەت باسشىسى نۇرسۇلتان نازارباەۆ «قازاقستان-2050 ستراتەگياسى: قالىپتاسقان مەملەكەتتىڭ جاڭا ساياسي باعىتى» اتتى جولداۋىندا: «سوڭعى 12 جىلدا جوعارى ءبىلىم الۋعا بەرىلەتىن گرانتتار سانى 182 %-عا ۇلعايدى» دەگەن بولاتىن. راس, تەگىن ءبىلىم الاتىن ستۋدەنتتەر قاتارى ارتتى, الايدا اقىلى بولىمدە وقيتىنداردىڭ سانى دا ازايماي تۇر.
ەلىمىزدە وقۋ اقىسى ەڭ قىمبات جوعارى وقۋ ورىندارىنىڭ باسىندا 2009 جىلى نەگىزى قالانعان نازارباەۆ ۋنيۆەرسيتەتى تۇر. وندا ءبىلىم العىڭىز كەلسە, جىلىنا 21500 اقش دوللارىن تولەۋىڭىز قاجەت. ءوزىم وقيتىن ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىنىڭ اقىلى بولىمىندەگى ستۋدەنتتەر تولەيتىن ءبىر جىلدىق وقۋ اقىسى 630 000 تەڭگەنى قۇرايدى. وسى قاراجاتتى 4 جىلعا كوبەيتكەن كەزدە
2 520 000 تەڭگە شىعادى. بۇل تەك وقۋ اقىسى ەكەنىن ەستە ساقتاڭىز.
ەندى وسى 2 520 000 تەڭگەنى ستۋدەنت بانكتەن نەسيە الىپ تولەدى دەيىك. ءتورت جىلدان سوڭ ستۋدەنتىمىز جۋرناليست ماماندىعىن يەلەنىپ, جوعارى وقۋ ورنىن اياقتايدى. سودان كەيىن جاس مامان جۇمىس ىزدەۋ ماشاقاتىنا كىرىسەدى. وسى ورايدا دا ول ءبىراز سىناقتارعا ءتوزۋى ءتيىس. توقتالا كەتەتىن بولساق, بىرىنشىدەن, وقۋدى ەندى بىتىرگەن ستۋدەنتتى ەشبىر جۇمىس ورنى قابىلداۋعا قۇلىق تانىتپايدى, ەكىنشىدەن, كەشە عانا قولىنا ديپلوم ۇستاعان ستۋدەنتتەن ەڭبەك ءوتىلىن تالاپ ەتەدى.
ءساتى ءتۇسىپ, جاس مامان جۇمىسقا ورنالاسادى دەيىك. رەسپۋبليكامىزدا ءجۋرناليستىڭ ورتاشا جالاقى مولشەرى – 63 163 تەڭگە. ول بانكتەگى نەسيەنى 5 جىلعا, ياعني, 60 ايعا رەسىمدەپ العان. مەنىڭ ەسەپتەۋىم بويىنشا جاس مامان ەش پايىزسىز تەك بانكتەن العان اقشاسىن عانا قايتارادى. سوندا ءار اي سايىن جالاقىسىنىڭ 42 000 تەڭگەسىن نەسيەگە تولەيدى. بۇل العان جالاقىسىنىڭ 66, 5%-ىن قۇراپ وتىر. وسىلاي جۇمىسىن ىستەپ, نەسيەسىن تولەپ جۇرگەن ۋاقىتىندا «پاتەر, تۇرعىن ءۇي, وتباسى» دەگەن سوزدەر ونىڭ جانىنا مازا بەرمەيتىن, ءتۇن ۇيقىسىن ءتورت بولەتىن قول جەتپەستەي ارمانعا اينالادى.
تاعى ايتىلاتىن ءبىر ءجايت – باسپانا ماسەلەسى. ەگەر جاس جۋرناليست ەلوردا تۇرعىنى بولىپ, اتا-اناسىمەن بىرگە تۇرسا, ودان اسقان باقىتتى جان جوق شىعار. ال, الىس شالعايدان ارمان جەتەگىندە ەلورداعا ءبىلىم ىزدەپ كەلگەن جالىندى جاستىڭ جاعدايى تىم اۋىرلاۋ. نەسيە, پاتەراقى, ءجۇرىپ-تۇرۋى, ىشەر اسى, كيەر كيىمى – وسىنىڭ بارلىعى جاس ماماننىڭ باسىن اۋىرتادى. كوزدى اشىپ-جۇمعانشا 5 جىل نەسيەسىن تولەپ بولىپ, 27 جاسقا تولعان ازامات «ۋف» دەيدى. الداعى ۋاقىتتا كۇتەر جايلار بۇرىنعىدان الدەقايدا اۋىر ەكەنىن سەزە باستايدى. وقۋىن جالعاستىرىپ, ماگيسترانت اتانۋ دا ويىندا بار. تارازىنىڭ كەلەسى باسىندا –
وتباسىن قۇرىپ, شاڭىراق كوتەرۋ. كەرەگەسىن كەرىپ, ءۇيلى-جاراندى بولۋ ءۇشىن دە باسپانا قاجەت. ەكى جولدىڭ بىرەۋىن تاڭداۋ كەرەك. جاستارىمىزدىڭ ءبىرازى وقۋىن جالعاستىرىپ, وتباسىن قۇرۋ ماسەلەسى جايىنا قالىپ جاتادى. سوندا قازاق حالقىنىڭ سانى قالاي وسەدى؟
ارنا ابسەيىتوۆا,
ل. گۋميلەۆ اتىنداعى ەۇۋ ستۋدەنتى
