ءVىى استانا ەكونوميكالىق فورۋمى اياسىندا «جاسىل ەكونوميكانى» دامىتۋ, قورشاعان ورتانى قورعاۋ, «جاسىل» بيزنەس سالاسىنا ينۆەستورلاردى تارتۋ جونىندە القالى جيىن ءوتتى.
ءوندىرىس سالاسىن دامىتپايىنشا, ەكونوميكانىڭ دا ورگە باسپايتىنى بەلگىلى. ال وندىرىستەردىڭ كوبەيۋى قورشاعان ورتاعا وزىندىك زيانىن تيگىزىپ جاتىر. سوندىقتان, ەكولوگيانى دا ساقتاپ, ەكونوميكانى دا العا جىلجىتۋدىڭ ەڭ ءتيىمدى جولى – «جاسىل ەكونوميكانى» دامىتۋ.
جيىنعا قاتىسۋشىلاردى الدىمەن قر قورشاعان ورتا جانە سۋ رەسۋرستارى ءمينيسترى نۇرلان قاپپاروۆ قۇتتىقتاپ, ەلىمىزدىڭ جاسىل ەكونوميكاعا كوشۋ نەگىزدەرىنە توقتالدى. بىلتىر ەلباسىنىڭ جارلىعىمەن «جاسىل ەكونوميكاعا» كوشۋى جونىندەگى تۇجىرىمداما بەكىتىلگەن. بۇعان «قازاقستان – 2050» ستراتەگياسىنداعى مىندەتتەر نەگىز بولعان كورىنەدى. بۇل قۇجاتتىڭ باستى مىندەتى – سۋ, جەر رەسۋرستارىن پايدالانۋ جانە ولاردى باسقارۋ تيىمدىلىگىن ارتتىرۋ, قولدا بار ينفراقۇرىلىمدى جاڭعىرتىپ, جاڭالارىن سالۋ, قورشاعان ورتاعا قىسىمدى جۇمسارتۋدىڭ رەنتابەلدىك جولى ارقىلى حالىقتىڭ ءال-اۋقاتى مەن قورشاعان ورتانىڭ ساپاسىن ارتتىرۋ, ۇلتتىق قاۋىپسىزدىكتى, سونىڭ ىشىندە سۋ قاۋىپسىزدىگىن ساقتاۋ. قازىر بۇكىل الەم وسى سالاعا ايرىقشا ءمان بەرە باستادى. قازاقستان دا جاسىل ەكونوميكانى دامىتۋعا ايرىقشا مۇددەلىلىك تانىتىپ وتىر.
بيزنەس-فورۋمدا ءسوز العان نوبەل سىيلىعىنىڭ لاۋرەاتى, رەسەيلىك عالىم سۆياتوسلاۆ تيماشەۆ «جاسىل ەكونوميكامەن» ۇلتتىق دەڭگەيدە العاش رەت اينالىسا باستاعان قازاقستان ەكەندىگىن ايتا كەلە, بۇل ماسەلەگە سالماقتى قارايتىن كەز جەتكەنىن اتاپ ءوتتى. ونىڭ ايتۋىنشا, قازىر كليمات وزگەرىپ, الەمگە جىلىمىق كەزەڭى كەلە جاتىر. ەندى 10-15 جىلدان سوڭ كليماتتىڭ وزگەرۋىنەن جىل سايىن الەمدىك جالپى ىشكى ءونىم مولشەرى 5 پايىزعا دەيىن كەمۋى مۇمكىن. ال, جاسىل تەحنولوگيانى دامىتۋ –بۇل جاعدايدىڭ الدىن الادى.
بيزنەس-فورۋمدا عالىم-زەرتتەۋشىلەر جاسىل بيزنەستى دامىتۋ تابيعي كاپيتالدى تۇتىنۋدى ازايتىپ, ونىڭ پايدالانۋ تيىمدىلىگىن ارتتىراتىنىنا نازار اۋداردى.
«Smart Green» بيزنەس فورۋمى الاڭىندا «جاسىل كوپىر» ارىپتەستىك باعدارلاماسىن ىلگەرىلەتۋ تەتىكتەرى, كليمات وزگەرۋىنىڭ زارداپتارىن جەڭىلدەتۋدىڭ نارىقتىق قۇرالدارى, تازا سۋعا قول جەتكىزۋ جولىنداعى بيزنەس-شەشىمدەر ماسەلەسى دە تالقىلاندى. سونداي-اق, «جاسىل» رەفورمالاردى وتكىزۋ مەن «جاسىل» بيزنەستى ىنتالاندىرۋ قاجەتتىگى ايتىلدى.
بۇل پانەلدىك سەسسياعا 160-تان اسا ادام قاتىستى. جيىننىڭ سوڭىندا قاتىسۋشىلار جاسىل ەكونوميكانىڭ سان-سالالى باعىتى بويىنشا ارناۋلى ۇسىنىمدار قابىلدادى. بۇلار دۇنيەجۇزىلىك داعدارىسقا قارسى جوسپارعا ەنگىزىلەدى.
