كەشە قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسى «جاسىل قازاقستان» اكتسياسىن وتكىزىپ, نازارباەۆ ورتالىعى عيماراتىنىڭ اۋماعىنا 300 ءتۇپ اعاش وتىرعىزدى.
«جاسىل جەر» جشس قولداۋىمەن وتكەن شاراعا ەلباسى كىتاپحاناسىنىڭ قىزمەتكەرلەرى, وقىرماندارى جانە «كەمەل ەل» جاستار تاربيەسى ورتالىعىنىڭ مۇشەلەرى قاتىستى.
ەلباسى كىتاپحاناسىنىڭ اتقارۋشى ديرەكتورى بەيسەمباي جۇمابەكوۆ «بۇگىن ءبىز ۇجىمىمىزدا جاڭا ءداستۇر باستاپ تۇرمىز. اعاش وتىرعىزۋ شاراسىن جىل سايىن ۇدايى ۇيىمداستىرۋدى قولعا الدىق. بۇل ءبىزدىڭ ەلوردانى كوگالداندىرۋعا, ەكولوگيالىق مادەنيەتتى ناسيحاتتاۋعا قوساتىن وزىندىك ۇلەسىمىز بولادى» دەدى.
«كىتاپحانا قىزمەتكەرلەرى قولىمىزعا كۇرەك الىپ, شارۋاعا بىلەك سىبانا كىرىسىپ كەتتىك. «اتادان مال قالعانشا, تال قالسىن» دەيدى حالىق دانالىعى. استانانىڭ ءار اۋماعىندا اعاش كوپتەپ ەگىلۋدە. بۇل ءىس ءالى جالعاسىن تابادى» دەدى كىتاپحانانىڭ اعا ساراپشىسى قۇرالاي شايكەنوۆا.
