تاعدىر شەشتى تاڭداۋ
ەل ومىرىندەگى ەڭ ەلەۋلى ساياسي ناۋقان ابىرويمەن اياقتالدى. قازاقستاندىقتار قاپىسىز قالاۋىن ءبىلدىردى. اقوردانىڭ يەسى انىقتالدى. وركەنيەت ورىنە ۇمتىلعان حالقىمىز ءوز تاعدىرىن تاعى دا نۇرسۇلتان نازارباەۆتاي ۇلتىن ۇلىقتاعان ءور تۇلعاعا سەنىپ تاپسىردى.
پرەزيدەنت سايلاۋىنا ءارتۇرلى سەبەپتەرمەن الەمنىڭ ءار شالعايىندا جۇرگەن وتانداستارىمىز دا بەلسەنە قاتىسقانى بەلگىلى. ماسەلەن, ءماسكەۋدەگى قازاقستان رەسپۋبليكاسى ەلشىلىگى جانىنان قۇرىلعان
№215 سايلاۋ ۋچاسكەسىنە كەلۋشىلەر لەگى اق تاڭنان – قارا كەشكە دەيىن تولاستاماعانىن كوزىمىزبەن كوردىك. ازاماتتىق پارىزىن وتەۋگە اسىققان اعايىننىڭ الابۇرتقان جۇزدەرىنەن كوتەرىڭكى كوڭىل-كۇيدىڭ لەبى اڭعارىلادى. ءبىر-بىرىمەن قۋانا قاۋىشقان قانداستارىمىز ءوزارا قازاقشا قاۋقىلداسىپ, ادەمى اسەرگە بولەندى. وسى جاقتا تۇرىپ جاتقانىنا ون جىلعا جۋىقتاعان قاراكوز قارىنداسىمىز كامشات بولىسباەۆا ارمان قۋىپ, الىسقا كەتكەنىمەن ارتتاعى اتاجۇرتىن ءبىر ساتكە دە ەستەن شىعارمايتىنىن ەكپىن تۇسىرە ايتتى.
– قازىرگى تاڭدا الەمدىك قاۋىمداستىقتان ويىپ وتىرىپ ورىن العان تاۋەلسىز قازاقستان مەن ونىڭ كورەگەن كوشباسشىسى نۇرسۇلتان ءابىشۇلى نازارباەۆ تۋرالى رەسەيلىكتەردىڭ اۋزىنان جىلى ءسوزدى ءجيى ەستيمىن. سونداي ساتتەردە كەۋدەمدى ماقتانىش كەرنەيدى. كەشەگى كەڭەستىك رەسپۋبليكالار اراسىندا وق بويى وزىق تۇرعان مەرەيلى مەملەكەتىمىزدىڭ ابىروي-بەدەلى اسقاقتاي بەرگەي!
ال, كوستروما قالاسىنداعى اسكەري اكادەميانىڭ كۋرسانتى راقىش جۇماباەۆ كەلەشەكتە قارۋلى كۇشتەرىمىزدىڭ قاتارىن تولىقتىرماق. ەلىمىزدىڭ ەرتەڭىن ايقىنداۋدا ايرىقشا ورىن الاتىن تاعدىرشەشتى تاڭداۋ جاساۋعا مۇمكىندىك تۋعانىنا ريزاشىلىق تانىتقان جاس سارباز بۇل سايلاۋدىڭ ساناعا سالماق سالار زور جاۋاپكەرشىلىگىن جەتە سەزىنەتىنىن جەتكىزدى.
رەسەي فەدەراتسياسىنىڭ ۇكىمەتى جانىنداعى قارجى ۋنيۆەرسيتەتىنىڭ ستۋدەنتى اسەل تاۋباەۆانىڭ ويىنشا, وسى سايلاۋدا ءبىز ەلباسىن تاڭداپ قانا قويماي, بۇكىل ەلىمىزدىڭ الداعى ۋاقىتتا قالاي داميتىنىن ايقىنداۋعا ۇلەس قوسامىز. سوندىقتان, ءاربىر قازاقستاندىقتىڭ وسىعان وراي ورنىقتى كوزقاراسىن بىلدىرگەنى ءجون.
اتالمىش سايلاۋ كوميسسياسىنىڭ توراعاسى ۆيكتور تەمىرباەۆتىڭ ايتۋىنشا, ماسكەۋدەن باسقا, رەسەيدىڭ سانكت-پەتەربۋرگ, قازان, ومبى, استراحان سەكىلدى قالالارىنداعى ءبىزدىڭ ديپلوماتيالىق ميسسيالارىندا قازاقستاندىق ازاماتتاردىڭ داۋىس بەرۋىنە جاعداي جاسالعان. ولاردىڭ ۇزىن-سانى ءۇش مىڭ ادامنىڭ ۇستىندە كورىنەدى. بۇلارعا ءىسساپاردا جۇرگەن, قىدىرىپ كەلگەن جەرلەستەرىمىزدى قوسساق, سايلاۋشىلار سانى بىرشاماعا جەتەرى انىق.
توقسان اۋىز ءسوزدىڭ توبىقتاي ءتۇيىنىن ايتساق, بۇل كۇنى ماسكەۋدەگى ۋچاسكەگە سايلاۋشىلاردىڭ 95 پايىزدان استامى كەلىپ, ولاردىڭ 99,73 پايىزى نۇرسۇلتان نازارباەۆتىڭ كانديداتۋراسىن قولداپ داۋىس بەرگەن.
تالعات باتىرحان