قازىر ناعىز بابىندا تۇرعان «بارىس» حوككەي كلۋبى بەسىنشى رەت قاتارىنان جەڭىسكە جەتتى. بۇرناعى كۇنى «بارىس» ءوز ايدىنىندا ەكاتەرينبۋرگتىك «اۆتوموبيليست» كومانداسىن قابىلداپ, جاۋاپسىز ءتورت گول سوعىپ, باسىم ءتۇستى.
ەلوردالىقتار ماتچ باستالىسىمەن ەنتەلەي العا ۇمتىلدى. ءۇستى-ۇستىنە سوققىلاعان شابۋىل كوپ ۇزاماي ناتيجەسىن بەردى. كيريلل پانيۋكوۆتىڭ لاقتىرعان شايباسىن قاقپاشى قاعىپ تۇسىرگەنىمەن, الەكساندر ءليپيننىڭ سوققىسىنا تويتارىس بەرە المادى.
كەلەسى جيىرما مينۋتتا ەكاتەرينبۋرگتەن كەلگەن قوناقتاردىڭ ءسال ەتى تىرىلە باستاعانداي كورىنگەن. بىراق برەندون بوچەنسكي ۇرىمتال ءساتتى پايدالانىپ, بوس جاتقان بۇرىشقا شايبانى توعىتا سالدى. ارتىنان نايدجەل دوۋس ەسەپتى ەسەلەپ كەتە جازدادى. كوپ ۇزاماي ول اقىرى دەگەنىنە جەتىپ, سەن-پەر مەن داللمەن باستاعان شابۋىلدىڭ تاماشا نۇكتەسىن قويدى.
ءۇشىنشى اينالىمدا دا استانالىقتاردىڭ اسىعى الشىسىنان ءتۇستى. تاعى ەكى گول سالدى. كەۋدەسىن «وققا» توسقان, سول وتكەندەگى «مەرۆەشناك» كلۋبىنىڭ 29 سوققىسىنا توتەپ بەرگەن «بارىس» قاقپاسىن كۇزەتكەن حەنريك كارلسسون بۇل جولى تاباندىلىعىنان تايمادى. ءيا, سول كەزدەگىدەي قاقپاسىن قۇرعاق ساقتاپ قالا الدى.
ەسەپ – 4:0. بۇل ناتيجە «بارىستى» پلەي-وفف ايماعىنان ءبىر-اق شىعاردى.
الەكساندر ليپين,
«بارىس» كومانداسىنىڭ ويىنشىسى:
– ءبىز بۇل ويىنعا تىڭعىلىقتى دايىندالدىق. قارسىلاسىمىز – پلەي-وفف جولىنداعى كولدەنەڭ كەدەرگىمىز. التى ۇپاي ءۇشىن بولعان ايقاستا مۇرنىمىزدان قان كەتكەنشە قارسى تۇرۋ كەرەك بولدى. وسىعان دەيىن بۇلارعا ەكى رەت ەسە جىبەردىك. جىگىتتەر وزدەرىن جاقسى ۇستادى. ءبارى جارادى. كارلي تەكتەن-تەك ەڭ ۇزدىك ويىنشى اتانعان جوق. ول – قازىر, ءسوزسىز, كوماندانىڭ ءبىرىنشى قاقپاشىسى. ءبىزدىڭ الاڭدا جاساعان قاتەلىكتەرىمىزدىڭ بارلىعىن سول تازالاپ وتىرادى. سوندىقتان وسى جەڭىستىڭ ۇشتەن ەكى بولىگى – سونىڭ ەڭبەگى.
