بۇگىندە استانادا كۇن جىلىنا سۋ باسىپ كەتەتىن 100-دەن استام جەرتولە بار. قار ەري باستاسا, وسى جەرتولەلەرگە لاي سۋمەن بىرگە شىبىن-شىركەي دە ۇيمەلەگىش. مۇندا الدىمەن جەتەتىن – ماسالار.
تۇرعىنداردىڭ بەرەكەسىن الاتىن جەرتولە ماسالارىمەن جىل بويى كۇرەس جۇرگىزىلەدى. بىراق كوكتەم كەلە, بۇل جاندىكتەردەن مەزى بولعان جۇرشىلىقتىڭ شاعىمى دا كوبەيە تۇسەدى. الماتى مەن سارىارقا اۋداندارى بويىنشا 70 ءۇيدىڭ جەرتولەسى سۋعا تولىپ كەتەدى. وعان جاۋاپتى پيك-تەر دەر كەزىندە شارا قولدانۋعا اسىقپايدى. ءتىپتى, تۇرعىنداردىڭ شاعىمىن قۇلاعىنا ىلمەيتىندەر دە بار. ايتالىق, «نۇرگۇل», «ۋيۋت-2008», «شولپان», «ۋيۋت-3», «نۇر-جەڭىس», «سۇلتان», «اقبۇلاق ا», «اراي-2», «كوجابەكوۆا» جك, «كيزاتوۆ», «باتىر-كسۆ» جشس سىندى پاتەر يەلەرىنىڭ كووپەراتيۆتەرى ەلدىڭ ارىزىن ەلەمەي وتىر.
جالپى قالا اۋماعىندا جەرتولە ماسالارىنا قارسى وڭدەۋ جۇمىستارىن ۋاقىتىندا وتكىزبەۋ اشىق اۋماقتاردا ماسالاردىڭ سانىنىڭ كوبەيۋىنە اكەلىپ سوعادى. بۇل جاندىككە كوپشىلىك اسا ءمان بەرمەگەنىمەن, ول ءتۇرلى ۆيرۋستاردى تاسىمالداۋشى بولىپ تابىلادى.
ماسا اعزاسىندا ءتۇرلى ۆيرۋستار ءبىرنەشە كۇننەن بىرنەشە ايلارعا دەيىن ءومىر سۇرەدى. كوپ ۆيرۋستار ماسا اعزاسىندا «قىستاپ», كوكتەمدە ءجاندىك قاۋىپتى تاسىمالداۋشىعا اينالادى. ال كەيبىر ۆيرۋستار ماسالاردىڭ ءبىر ۇرپاعىنان ەكىنشى ۇرپاعىنا جۇمىرتقالارى ارقىلى بەرىلىپ وتىرادى. سوندىقتان ماسالار تۇرعىنداردىڭ مازاسىن قاشىرماۋ ءۇشىن پيك-تەر ءوز قارجىسى ەسەبىنەن الدىن-الۋ شارالارىن ۇيىمداستىرۋعا كەلىسىم-شارت جاساۋعا ءتيىس. جەرتولە ماسالارىن جويۋ جانە سول توڭىرەكتى وڭدەۋ جۇمىستارىن ارنايى رۇقسات قاعازى بار ۇيىمدار عانا جۇرگىزە الادى.
ماسالاردى جويۋ جۇمىستارى بيىل ءساۋىر مەن قىركۇيەك ايلارى ارالىعىندا جۇرگىزىلەتىنىن ەستەرىڭىزگە سالامىز. وسى شارالاردى وتكىزۋگە پيك باسشىلارىنان تالاپ ەتكەندەرىڭىز ءجون. ويتكەنى بۇل ەڭ الدىمەن ءسىزدەردىڭ دەنساۋلىقتارىڭىز بەن جايلى ءومىرىڭىز ءۇشىن جاسالادى. ەگەر تۇرعىن ۇيلەر مەن ءوندىرىس وشاقتارىندا قاجەتتى سانيتارلىق –گيگيەنالىق جاعدايلار ساقتالماسا, ماسالاردان جىل بويى ارىلا الماۋىڭىز مۇمكىن. وسىعان بايلانىستى قانداي دا ءبىر ساۋالدارىڭىز بولسا, مىنا تەلەفونعا حابارلاسۋىڭىزعا بولادى: 316 – 017
ناعيما شاتاەۆا,
استانا قالاسى بويىنشا تۇتىنۋشىلاردىڭ قۇقىقتارىن قورعاۋ دەپارتامەنتىنىڭ
ءبولىمى باستىعى
