«قازاق ەلى» مونۋمەنتى الدىنداعى الاڭدا استانا قالاسىنىڭ اكىمى ادىلبەك جاقسىبەكوۆ ۇلتتىق بىرىڭعاي تەستىلەۋدەن سۇرىنبەي ءوتىپ, ءوز بىلىمدەرىن دالەلدەگەن ەلوردا مەكتەپتەرىنىڭ بيىلعى 112 تۇلەگىنە «التىن بەلگى» تابىستادى. سالتاناتتى شاراعا قر پارلامەنتى مەن قالالىق ءماسليحات دەپۋتاتتارى, قالا باسشىلىعى, ءبىلىم جانە عىلىم مينيسترلىگىنىڭ وكىلدەرى قاتىستى.
– مەملەكەت باسشىسى نۇرسۇلتان نازارباەۆتىڭ ەرەكشە نازارىنىڭ ارقاسىندا جاس ۇرپاققا ساپالى ءبىلىم, سانالى تاربيە بەرۋ ءۇشىن بارلىق جاعداي جاسالىپ جاتىر. ەلىمىزدىڭ بولاشاعى سىزدەردىڭ قولدارىڭىزدا. كەلەشەكتە مەملەكەتىمىزدى جانە استانامىزدى ودان كوركەيتۋ ىسىنە ءوز ۇلەستەرىڭىزدى قوساسىزدار دەپ سەنەمىن, – دەدى ءا.جاقسىبەكوۆ.
ەلوردا مەكتەپتەرىندەگى ءبىلىم بەرۋ دەڭگەيى جىلدان جىلعا ارتىپ كەلەدى. بۇگىنگى تاڭدا استانا ءبىلىم ساپاسى جاعىنان وزگە وڭىرلەردەن وق بويى وزىپ, ءبىرىنشى ورىنعا شىقتى. بۇعان 2011-2020 جىلدارعا ارنالعان قر ءبىلىم سالاسىن دامىتۋدىڭ مەملەكەتتىك باعدارلاماسىنىڭ باس قالادا تابىستى جۇزەگە اسىرىلىپ جاتقاندىعى سەپ بولۋدا. جاقىندا عانا بەكىتىلگەن قر ءبىلىم جانە عىلىم مينيسترلىگى مەن استانا قالاسىنىڭ اكىمدىگى اراسىنداعى 2015-2017 جىلدارعا ارنالعان مەموراندۋم ەلورداداعى ءبىلىم بەرۋ ءىسىن جاڭا ساپالىق دەڭگەيگە شىعارىپ وتىر. تۇلەكتەردى قۇتتىقتاي كەلە, قالا باسشىسى اتالمىش سالادا جانە الداعى ۋاقىتتا قولعا الىناتىن جۇمىستار جايىنان حابار بەردى.
ونىڭ ايتۋىنشا, ەلورداداعى ءبىلىم سالاسىنىڭ ينفراقۇرىلىمدىق دامۋ جاعدايىنا بارىنشا كوڭىل بولىنۋدە. استانانىڭ ون جەتى جىلدىق تاريحى ىشىندە 44 مەكتەپ بوي كوتەردى. بيىل تاعى 5075 ورىنعا شاقتالعان جالپى ءبىلىم بەرەتىن بەس مەكتەپ پەن 1050 ورىندىق قوسىمشا عيمارات سالىنباق.
بىلتىر ەلورداداعى «التىن بەلگى» يەگەرلەرىنىڭ سانى 94 بولسا, بيىل وسى كورسەتكىش 112-گە دەيىن ارتا تۇسكەن. ۇلتتىق بىرىڭعاي تەستىلەۋدىڭ قورىتىندىسى بويىنشا استانا قالاسى ورتاشا ەسەپپەن 86,26 بالل كورسەتكىشىن باعىندىرىپ, بيىل تۇڭعىش رەت ءبىرىنشى ورىنعا شىقتى. وسىنىڭ ءوزى استاناداعى ءبىلىم ساپاسىنىڭ ءوسۋى تۋرالى اڭگىمەنىڭ جالاڭ ءسوز ەمەس ەكەنىن دالەلدەيدى. بۇعان قوسا, بيىل 35 تۇلەك ۇزدىك اتتەستات يەگەرى اتاندى. 399 وقۋشى حالىقارالىق وليمپيادالار مەن عىلىمي جارىستارعا قاتىسىپ, 238-ءى ءتۇرلى مەدالدەرمەن ماراپاتتالدى.
وسىنداي مالىمەتتەردى كەلتىرگەن قالا اكىمى ەلوردادا ەلىمىزدەگى الدىڭعى قاتارلى جوعارى وقۋ ورىندارى ورنالاسقاندىعىن, ولاردا ستۋدەنتتەرگە زاماناۋي تالاپتارعا ساي ءبىلىم بەرەتىن جەتەكشى وتاندىق پەداگوگتار جۇمىس ىستەيتىندىگىن ايتا كەلە, مەملەكەتىمىزدە بالاماسى جوق نازارباەۆ ۋنيۆەرسيتەتىن مىسال رەتىندە العا تارتتى.
ءسان-سالتاناتى جاراسقان شارادا ۇلكەن ومىرگە قادام باسقان تۇلەكتەر دە ايانىپ قالمادى. ولاردىڭ اراسىندا ۇلتتىق بىرىڭعاي تەستىلەۋ قورىتىندىسىندا ەڭ جوعارى 125 بالل جيناعان №59 ورتا مەكتەبىنىڭ تۇلەگى ريانا مۇستافينا شارشى توپتان سۋىرىلىپ شىعىپ, ءسوز سويلەدى.
– ەلباسى ءوز جولداۋىندا «قازاقستاننىڭ بولاشاعى – جاستاردىڭ قولىندا» دەپ, بىزگە ۇلكەن سەنىمىن ارتىپ وتىر. قازاقستاننىڭ وركەندەپ دامۋى, الدىڭعى قاتارلى وتىز مەملەكەتتىڭ قاتارىنان كورىنۋ ءۇشىن ايانباي ەڭبەك ەتەمىز. ەلوردامىز – بىرلىك پەن ىنتىماقتىڭ, تاۋەلسىزدىك پەن ەركىندىكتىڭ سيمۆولى بولىپ, تاڭىمىزدى – ارايعا, كۇنىمىزدى – يگىلىككە بولەيتىن قالاعا اينالىپ, كوركەيە بەرسىن! ءبىزدىڭ جەتىستىگىمىز – استانانىڭ جەتىستىگى. ءبىز وتانىمىز بەن سۇيىكتى قالامىزدىڭ الدىندا, ۇستازدارىمىز بەن اتا-انالارىمىز الدىندا ۇلكەن جاۋاپكەرشىلىك الىپ, جاڭا ومىرگە قادام باسقالى وتىرمىز. بولاشاقتا ەلىمىز بەن استانامىزدىڭ گۇلدەنۋىنە بارىنشا ۇلەس قوسامىز, – دەدى ريانا جالىندى لەپپەن.
تۇلەكتەردى وليمپيادا چەمپيونى يۋري مەلنيچەنكو, «التىن بەلگى – 2014» يەگەرى, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ حالىقارالىق قاتىناستار فاكۋلتەتىنىڭ ستۋدەنتى نازگۇل ەسەن قۇتتىقتاپ, اق جول تىلەدى. قر حالىق ءارتىسى نۇرجامال ۇسەنباەۆا, اعايىندى جۇگىنىسوۆتەر اننەن شاشۋ شاشتى. اسپانعا ارماندار ورىندالۋىنىڭ بەلگىسىندەي كوك جانە قىزىل شارلار ۇشىرىلدى. «التىن بەلگىنىڭ» يەگەرلەرى ءداستۇرلى مەكتەپ ءۆالسى سازىمەن سامال جەلپىگەن گۇلدەي ىرعالىپ, جايقالا بيلەدى…
