8-16 قاراشا كۇندەرى وتەتىن اۋىر اتلەتيكادان الەم چەمپيوناتىنا قازاقستان قۇراماسى تاس-ءتۇيىن دايىن. بۇل تۋرالى ۇلتتىق قۇرامانىڭ باس باپكەرى الەكسەي ني مالىمدەدى. ول جارىسقا قاتىساتىن سپورتشىلاردىڭ ءتىزىمىن جاساقتاپ, كەم دەگەندە ەكى التىن الۋعا بولاتىنىن ايتتى. ازيا ويىندارىنا قاتىسقان الماس وتەشوۆ, ماريا گرابوۆەتسكايا, سەرگەي يستوميندەر بەلگىلى سەبەپتەرمەن بۇل بىرىنشىلىككە قاتىسپايتىن بولدى.
الماتىدا وتەتىن جارىسقا ءبىزدىڭ ەلدىڭ اتىنان ارلي چونتەي (56 كەلى), البەرت ليندەر (69 كەلى), كيريلل پاۆلوۆ (77 كەلى), ۆلاديمير سەدوۆ (-94), رۇستەم سىباي (94 كەلى), يليا يلين (105 كەلى), يبراگيم بەرسانوۆ, سەليمحان ابۋباكاروۆ (+105 كەلى) سەكىلدى جىگىتتەر ونەر كورسەتەتىن بولادى. ال قىزداردان جاساقتالعان قۇرامامىزدىڭ قاتارىندا مارگاريت ەليسەەۆا (48 كەلى), زۋلفيا چينشانلو (53 كەلى), ساۋلە سادۋاقاسوۆا (58 كەلى), كارينا گوريچەۆا (-63), مايا مانەزا (63 كەلى), جازيرا جاپپارقۇل (69 كەلى), سۆەتلانا پودوبەدوۆالار (75 كەلى) بار. سونداي-اق, ەكى قۇرامعا دا قوسالقى زىلتەمىرشىلەر تىركەلدى. ولار – ەرمەك ءومىرتاي (85 كەلى) مەن جاسۇلان قىدىرباەۆ (105 كەلى) جانە اننا نۋرمۋحامبەتوۆا (75 كەلى) مەن گۇلناز ناۋرىزوۆا (69 كەلى).
ءبىزدىڭ قۇراما بۇل سىندا 2016 جىلى ريو دە جانەيرودا وتەتىن وليمپياداعا باستايتىن جولدامانى كوبىرەك جەڭىپ الۋ ءۇشىن ۇپايدى مەيلىنشە مول جيناۋدى جوسپارلاپ وتىر. ال نەگىزگى ەرەجە بويىنشا, ءاربىر مەملەكەتتىڭ جازعى ويىندارعا ون (6 ايەل, 4 ەر) سپورتشىدان ارتىق اپاراتىن مۇمكىندىگى جوق.
دايىنداعان: نۇريسلام قۇسپانعالي
