«Қайсар тұлға» ұлттық сыйлығын тапсыру аясында Астана қаласына «Ең үздік спорттық аймақ» сыйлығы берілді.
Қазақстанның паралимпиадалық құрамасы биыл Инчхонда өткен ХІ Азия ойындарында 7 жарыстан алтын, 6 күміс және 11 қола жүлде ие болды. Осы көрсеткішпен командалық есепте 11-орыннан көрінді. Ал елордалық спортшылар жеті алтын медаль, бір күміс және үш қола жүлдемен оралды.
Құрлықтың байрақты бәсекесінде ел намысын абыроймен қорғаған астаналық спортшылар туралы айтар болсақ, жүлдеге қол созған сайыпқырандардың бәрі Астана қаласында осыдан он екі жыл бұрын құрылған «Қайсар» мүмкіндігі шектеулі жандарға арналған спорт клубының мүшелері. Аталмыш клубтың жүзу спорты бойынша жаттықтырушысы «Қайсар тұлға» сыйлығымен екінші мәрте марапатталса, арбада отырып билеу бапкері Әлия Түсіпбекова да үздік жаттықтырушы атанды.
Азия ойындарында абсолютті рекорд жасаған да астаналық спортшы болды. Атап айтқанда, жүзу жарыстарында сынға түскен Әнуар Ахметов Азия ойындарының бес дүркін чемпионы атанды. Сонымен қатар, үш рет Азиада рекордын жаңартты. Мұндай көрсеткішті бұған дейін бірде-бір спортшы бағындырған емес. Дүбірлі жарыстың жеңімпаздарын марапаттау барысында Әнуарға «Қайсар тұлға» сыйлығымен қатар жеңіл автокөлік тарту етілді. Инчхон айдынында жүзуден екі дүркін чемпион атанған Әлібек Уақпаев, жүлдегерлер қатарынан көрінген Сиязбек Далиев пен Руслан Өтебалиев те арнайы сыйлыққа ие болды.
Қазақстан құрамасы сапында ел намысын қорғаған астаналық бишілер де жақсы нәтижелерімен қуанта білді. Мәселен, арбамен билейтін Ардақ Отарбаев, Айдана Бегленова және Қарлығаш Тынабекова көрерменнің көзайымына айналды. Жеңіс тұғырынан көрінген бұл бишілер де «Қайсар тұлға» сыйлығын алды. Сондай-ақ, бірқатар астана-лық спортшылар арнайы жүлделерге ие болды. Атап айтқанда, Руслан Өтебалиев «Спорт үміті», Ардақ Отарбаев «Паралимпиадалық спорттың медиалық тұлғасы», ал Қарлығаш Тынабекова «Параспорт аруы» атанды.
Астана қаласының Туризм, дене тәрбиесі және спорт басқармасына паралимпиадалық спорт түрлерін дамытуға қосқан үлесі үшін «Алғыс хат» табыс етілді.
– Біздің спортшылардың жеңісті нәтижелері – тек елордамыз ғана емес, бүкіл Қазақстан үшін де үлкен абырой. Спортшылар мен бапкерлердің атынан Астана қаласының әкімдігіне алғыс айтамын. Спортшылар олимпиадалық лицензияларды да жеңіп алды. Рио-де Жанейрода өтетін Паралимпиадалық ойындарда да осындай үздік нәтижелерге қол жеткізетінімізге сенімдімін, – дейді Астана қаласындағы мүмкіндігі шектеулі спортшыларға арналған «Қайсар» спорт клубының директоры Аллаберген Алдоңғаров.
Ғалым ҚОЖАБЕКОВ
