Астана қаласының әкімі Бақыт Сұлтанов Өзбекстанның Олий Мәжілісінің заң шығару палатасы спикері Нурдинжон Исмоиловпен кездесті.
Кездесуде Қазақстан мен Өзбекстан арасындағы қарым-қатынастық нығайып келе жатқандығы сөз болды. Кейінгі жылдары екі ел арасындағы сауда-экономикалық әріптестік жаңа деңгейге көтерілген. Айталық, соңғы 9 айдың ішінде екі мемлекет арасындағы тауар айналымы 2 млрд долларға жеткен. Елорда басшысының айтуынша, өткен жылы Астана мен Өзбекстан арасындағы тауар айналымы 288 млн АҚШ долларын құраған. Оның ішінде экспорт – 174 млн, импорт – 114 млн АҚШ долларын қамтыған. Астана қаласының әкімі екі ел үкіметінің көлік-логистика инфрақұрылымын дамытуға қатысты қабылданған құжаттар екі тараптың тауар айналымын одан әрі ұлғайта түсетініне сенім білдірді.
«Астана – әлемдегі ең әдемі қалалардың бірі. Қазақстан Президенті Нұрсұлтан Назарбаевтың
тәуекелшілдігінің арқасында осындай әсем қала салынды. Бұл шаһар маған да ұнайды. Оған жел де, аяз да кедергі келтірмейді» деді Нурдинжон
Исмоилов. Сонымен қатар спикер Қазақстан Президентінің «Ұлы даланың жеті қыры» атты мақаласынан үлкен әсер алғандығын жеткізді. Ол сондай-ақ, өз сөзінде Өзбекстанның бас шаһары Ташкенттің Астананың ең бірінші серіктесі болғанын, осы жылы екі ел астанасының арасында сауда-экономика, ғылыми-техника және мәдени әріптестік туралы уағдаластыққа қол қойылғанына 20 жыл толғандығын атап өтті.
