Астанада қандай мамандықтар сұранысқа ие? Бас қалада қандай тегін курстар бар? Жұмысқа тұру үшін қай мекемеге хабарласу қажет?
Кеше Жастар сарайында өткен бос жұмыс орындары жәрмеңкесінде қала тұрғындарына бір мыңға жуық қызмет түрі ұсынылды.
Дәстүрлі шараға 60-тан аса жұмыс беруші қатысып, қала тұрғындары білім, денсаулық, өндіріс, құрылыс және қызмет көрсету саласындағы бос орындармен танысты.
– Бұл – жыл басынан бері өткізілген жұмыс жәрмеңкесінің оныншысы. Қорытынды мониторинг олардың көмегімен 300-ден көп адам тұрақты жұмысқа тұрғанын көрсетіп отыр. Қазан айында тағы екеуін ұйымдастыру жоспарда бар, – дейді Жұмыспен қамту орталығының баспасөз хатшысы Дидар Садықов.Бос орынның көбі құрылысшыларға, мектепке дейінгі мекеме тәрбиешілеріне, дәрігерлерге тиесілі.
Бос орынның көбі құрылысшыларға, мектепке дейінгі мекеме тәрбиешілеріне, дәрігерлерге тиесілі. Мысалы, жаңадан ашылған өндіріс орны техникалық мамандарға сұраныс білдіріп отыр. «Бір сағат ішінде шамамен 30 адам келді. 15 шақты түйіндеме қызықтырып үлгерді. Басты талабымыз – жоғары білім. Ал технолог, инженер-құрылысшылардың өндіріс орнындағы еңбек өтіліне міндетті түрде қараймыз» дейді кадр бөлімінің қызметкері Раушан Сейтқалиева.
Елордалық балабақшалар да бұл шараға тұрақты келетіндердің бірі. Себебі қаламызда осы саладағы мамандардың жетіспеушілігі байқалады. Осыған орай, жәрмеңке аумағында «Мектепке дейінгі мекеме тәрбиешісі» мамандығы бойынша кәсіби курстарға жазылу жүргізілді. Бұл бағдарлама тегін оқытылады әрі қатысушыларға 16759 теңге көлемінде шәкіртақы төленеді. Осы сұраққа қызығушылық танытқандар Астана қалалық Жұмыспен қамту орталығына жүгіне алады.
Айта кетейік, 1 қыркүйектегі жағдай бойынша Жұмыспен қамту орталығына биыл 9 125 адам келді. Олардың 81 пайызға жуығы әлеуметтік қолдау шараларына ілікті. 5 180 адам жұмысқа орналастырылып, 486 жас азамат «Жұмыспен қамту-2020 жол картасы» бағдарламасы шеңберінде жастар практикасына жіберілді. Ал әлеуметтік жұмыс орындарына 107 адам орналастырылса, қайта даярлау және біліктілікті арттыру курстарынан 623 астаналық өтті.
Мәдина Қайратқызы