Астанамен құрдас ансамбль
Ерке Есілдің жағасына елорда қондырылғанда шаһар мәдениетін бас қала мәртебесіне сай биік деңгейге көтеру мақсаты қойылды. Астанаға жан-жақтан ел танитын білікті, тәжірибелі мамандар шақырылып, жаңа ұжымдар құрыла бастады. Бастапқы кезеңде құрылған өнер ұжымдарының бірі – «Сарыарқа» халық музыка ансамблі.
Астананың Мемлекеттік академиялық филармониясына қарайтын аталмыш ансамбльге биыл Астанамен қатар 20 жыл толды. Осыған орай «Астана» концерт залында «Рухани жаңғыру» бағдарламасы аясында «Ән жырым «Сарыарқа» 20 жыл» атты есеп беру концерті өтті.
Осы күндерге өнер ұжымы ауыз толтырып айтарлықтай жетістіктермен жетті. Құрылғанына бір жыл толар-толмастан Францияның Дижон қаласында өткен халықаралық шығармашылық фестивалінің жүлдегері атанды. Бұдан кейін Қытай, Түркия, Ресей, Германия, Ұлыбритания, Бельгия, Голландия елдеріне барып, табысты өнер көрсетті. «Ғасырлар сазы» атты республикалық фольклорлық этнографиялық ансамбльдердің фестиваль-байқауында бірінші орынды иеленді. Ансамбльдің көркемдік жетекшісі – Тоғжан Жахин.
«Сарыарқаның» сазы ескен бұл кеште Тәттімбеттің «Саржайлау», Төлеген Момбековтың «Салтанат», Кенен Әзірбаевтың «Жаса Қазақстаным», Тоғжан Жахинның «Думанды Сарыарқа» шығармалары орындалды.
Кеште осы өнер ұжымының қалыптасуына зор үлес қосқан Қазақстанның еңбек сіңірген қайраткері Гүлзира Бөкейхан, Мәдениет саласының үздігі Нұрай Танабаев, халықаралық және республикалық байқаулардың лауреаттары Күнсұлу Тұрлыбекова, Данияр Мұқан, Нұрсұлтан Оспанұлы, Нұрлан Тілеужан, Перизат Тұрарова әндерді әуелетті. «Шалқыма» халық музыкасы және эстрада би ансамбльдері мың бұралған бимен концертті көркемдеді.