Астананың ардақты айымдары
Ел Тәуелсіздігінің 25 жылдығына орай биылғы наурыз айында «25 пайдалы іс» республикалық акциясы бастау алды. ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия ұйытқы болған акция аясында отбасылық құндылықтар мен саламатты өмір салтын насихаттау, өскелең ұрпақ тәрбиесіне ерекше көңіл бөлу, түрлі мақсаттағы қайырымдылық шараларын өткізу көзделді.
Бұл акциядан Астанадағы С.Сейфуллин атындағы Қазақ агротехникалық университеті де тыс қалып отырған жоқ. Ағымдағы апта басында 11 мыңға жуық студентті оқытып жатқан оқу орнында тәлім-тәрбиелік мәні зор кездесу ұйымдастырылды. Жастар іскерлігін танытып, ел арасында абыройға кенелген, тәуелсіздігіміздің туы биікте желбіреуіне үлес қосқан әйелдер қауымымен жүздесті.
«С.Сейфуллин атындағы Қазақ агротехникалық университеті» АҚ басқарма төрағасы Ақылбек Күрішбаев жүргізген кездесуге кешегі Ақмоланың, бүгінгі Астананың өркендеуіне еңбек сіңірген айымдар қатысты. Солардың бірі – қоғам және мемлекет қайраткері Светлана Жалмағамбетова.
«Еліміз азаттық алған 25 жылдық кезеңде мен үш жерде жұмыс істеппін. Тәуелсіздіктің елең-алаңында Ақмола облысы әкімінің орынбасары қызметін атқардым. Тоқсаныншы жылдардағы ел басына түскен қиындықтар әлі есімде. Екінші жағынан, ұлттық сананың оянуының куәгерімін. Сол кезде Целиноград қаласын Ақмола атауына ауыстыру, шаһарда қазақ театры мен мешітті ашу мәселелері көтерілді. Әрине, қарсылықтар да болмай қоймады. Әсіресе, Тәуелсіздік декларациясы қабылданғанда көптеген пікірталастар орын алды. Бір сөзбен айтқанда, тәуелсіздік бізге оңай келген жоқ. Халық ауыр әлеуметтік жағдайды да бастан өткерді. Соның бәрінен абыроймен шыға білдік» деді Светлана Жақияқызы. Мәртебелі қонақ Астана Арқа төсіне көшкен жылдарды, сондағы елеулі уақиғаларды да еске алды.
Тіл жанашыры ретінде көпшілікке танымал, бүгіндері де осы жолдан таймай Ш.Шаяхметов атындағы Тілдерді дамытудың республикалық үйлестіру-әдістемелік орталығы директорының кеңесшісі болып отырған Оразкүл Асанғазықызы Сарыарқа ауданы әкімінің орынбасары, Астана қаласы Тілдерді дамыту басқармасының басшысы қызметтерін атқарды. V шақырылымдағы ҚР Парламенті Мәжілісінің депутаты болды.
«Ақмола облысы әкімінің орынбасары қызметін атқарған Светлана Жақияқызы және Оңтүстік Қазақстан облысы әкімінің орынбасары болған мен 1994 жылдың шілде айында АҚШ-та оқуда болдық. Астана ауысатыны жөніндегі хабар бізге сол жаққа жетті. Біз келгенге дейін Ақмолада 14 пайыз қазақ қана тұрған екен. Қалада орыс тілі үстемдік құрды. Елбасының көреген саясатының арқасында бүгін, Тәуелсіздігіміздің 25 жылдығында Астана қаласы тұрғындарының 75 пайызы – қазақпыз. Мектеп оқушыларының 85 пайызы – қазақ. Қазір елордада балабақша жетпей жатыр деп ренжіп жатады. Мен, керісінше, оған қуанамын. Бұл елге ел қосылып отырғандығының, бала туу көрсеткіші өскендігінің белгісі» деді О.Асанғазықызы.
Оның Сарыарқа ауданы әкімінің орынбасары болып тағайындалғандағы алғашқы ісі – Сәкен Сейфуллиннің туған күнін тиісті дәрежеде атап өту болды. Қаладағы көшелердің қазақылануына да Оразкүл Асанғазының үлкен үлесі барын ел біледі. «Карл Маркс көшесін Кенесары атына ауыстырдық. Сол уақытта бұған қарсы болғандар орыстілді газетке «Кто такой Кенесары?» деген мақала да жариялады. Кенесарының кім екенін танытайық деп Алматыдан ғалымдарды, жазушыларды шақырып, Кенесары көшесінің мерекесін өткіздік. Бастапқыда 27 көше өзгертілді. Солардың бәрінің мерекесін ұйымдастырдық. Біз келгенде 1 ғана қазақ мектебі болатын. Қазір 10 ғана орыс мектебі қалды, 80 мектептің барлығында қазақ сыныптары бар» деді тіл жанашыры.
С.Сейфуллин атындағы Қазақ агротехникалық университетінің мақтанышы, осы оқу орнының экономика факультетін тәмамдаған Орталық сайлау комиссиясының мүшесі қызметіне Есіл ауданы әкімі қызметінен ауысқан Сәбила Мұстафина кезінде Астана қаласы әкімінің орынбасары болды. Қала тарихына оның аты тұңғыш әйел орынбасар ретінде жазылды. Сәбила Сапарқызы мен Орталық сайлау комиссиясының тағы бір мүшесі, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия төрайымының орынбасары Ләззат Сүлейменова, ІV-V шақырылымдағы ҚР Парламенті Мәжілісінің депутаты Светлана Ферхо ғибратты әңгімелерді қозғады. Соңында студенттер қонақтарға сұрақтарды қойып, өнерлерін көрсетті.
Аманғали ҚАЛЖАНОВ