Бақылау кеңесінің отырысы өтті
Л.Гумилев атындағы Еуразия ұлттық университетінде Білім және ғылым министрі Бақытжан Жұмағұловтың төрағалық етуімен Бақылау кеңесінің кезекті отырысы өтті.
Кездесу барысында Білім және ғылым министрі Бақытжан Жұмағұлов: «Бақылау кеңестері еліміздің әрбір жоғары оқу орнында үлгі-өнеге эталоны болу қажет» деп атап өтті.
Отырыста ректор Ерлан Сыдықов Л.Гумилев атындағы Еуразия ұлттық университетінің 2020 жылға дейінгі Даму стратегиясын жүзеге асырудағы жұмыстар жайында баяндады. Атап айтсақ, университеттің даму сатылары 4 басым бағытпен айқындалған: бәсекеге қабілетті мамандарды даярлау; университетті Еуразия кеңістігінде зерттеу орталығы ретінде қалыптастыру; кадрлық әлеует пен басқару жүйесін дамыту; инфрақұрылым мен материалдық-техникалық базаны дамыту. Бүгінде осы бағытпен айқындалған жұмыстар жоспардан оза орындалып жатыр деуге толық негіз бар. Алайда, стратегияның кейбір бөлімдерін жүзеге асыру барысында біршама қиындықтар туындауда. Оның ішінде магистратура мен докторантурадағы білім беру бағдарламаларына қатысты жоғары оқу орнының мүмкіндіктерін шектеуі және министрліктің тарапынан арнаулы мамандықтарға деген қажеттіліктің пайызы анықталмағандығы да аталды. Министр осы мәселе төңірегінде әңгіме өрбіте келе, техникалық мамандық иелеріне деген сұранысты тілге тиек етті және өндіріс иелерінің қызығушылық тетіктерін анықтауға кеңес берді.
Ырысты ЖАЛҒАСБАЙ