Бизнесін бастағысы келгендерге – тегін курс
Кейінгі кезде кәсіпкерлікке ден қойған жастар көбейгенін көріп жүрміз. Өз ісін бастағысы келген азаматтар ақыл-кеңес сұрап, редакциямызға да қоңырау шалып жатады. Оқырмандарымыздың сұранысына орай «Даму» кәсіпкерлікті дамыту қоры» АҚ Астана қаласы бойынша филиалының директоры Самат Ақылбеков газетімізге қордың тегін курс оқытатын жобасы туралы айтып берген еді.
– Еліміздегі кәсіпкерлікті дамыту бағыттарын жүргізу міндеті жүктелген«Даму кәсіпкерлікті дамыту қоры» АҚ кәсіпкерлерді қысқа мерзімге тегін оқытатынынан кейбір азаматтарымыз хабарсыз екен. Осы жоба туралы айтып берсеңіз?
–Біз кәсібін бастағысы келген немесе ісін жаңадан жүргізе бастаған азаматтарға арнап қысқа мерзімді оқыту курсын ашқанбыз. Бұл – «Бизнестің жол картасы – 2020» бағдарламасының «Кәсіпкерлік әлеуетті күшейту» бағытын жүзеге асыру аясындағы жоба. Оның мақсаты – жұртшылыққа бизнесті жүргізудің негіздерін үйрету. Оқу барысында азаматтар кәсіпкерлік психологиясы, персоналдарды басқару мен бизнесті жүргізудің заңдық аспектілерімен танысып, кәсібін дамытуда ақпараттық-коммуникациялық технологияларды пайдаланудың қыр-сырына қанығады. Сондай-ақ, бизнес-жоспарды қалай құру керектігін, қаржыны қайтіп игеру қажеттігін үйренеді. Оқу мерзімі – екі күн. Оқудың соңында арнайы сертификат беріледі. Кәсіпкерлік негіздері бойынша оқу материал-дары мен стандартты құжаттар пакеті тегін таратылатынын да айта кеткім келеді.
– Оқу курсы тек Астанада ғана жүргізіле ме?
–Тек Астанада ғана емес, Алматыда және еліміздің 14 облысында да оқыту курстарымыз бар.
–Курсқа жазылғысы келген азаматтар қайда хабарласу керек?
– Оқу курсына алдын ала жазылу үшін «Даму» кәсіпкерлікті дамыту қоры» АҚ-ның өңірлік бөлімшесіне хабарласу керек. Мекен-жайы: Астана қаласы, Д.Қонаев көшесі, 12/1. Телефондар: 559-435, 559-434.
Қымбат ТОҚТАМҰРАТ