ЭЙФЕЛЬДЕН «БӘЙТЕРЕККЕ» ДЕЙІН
Төрт жылдан кейін елімізде «Болашақтың энергиясы» тақырыбымен «ЭКСПО-2017» халықаралық көрмесі өтетіні белгілі. Осыған байланысты 15 маусым күні Францияның Савойя қаласынан «The Sun Trip: Астана ЭКСПО – 2017» веложарысы бастау алды.
Оған Бельгия, Швейцария, Канада, Чехия, Франция азаматтары және қазақстандық велошабандоз Асқар Сызбаев қатысуда. Барлығы 33 адам Франция, Болгария, Румыния, Украина, Түркия, Ресей, Әзербайжан мемлекеттерін көктей өтіп, еліміздің Атырау, Ақтөбе қалаларында ат шалдырып, Астанаға жетуі тиіс.
Бұрнағы күні Раф Ван Холь есімді велошабандоз 38 күнде 7 мың шақырымды артқа тастап, алғашқы болып бас қаламызға «шайтан арбасының» тұмсығын тіреді. Ал, кеше осы жобаға қатысушы Джордж Мойта да келіп жетті. Қалған 31 адам алдағы екі апта ішінде веложарыстың соңғы нүктесіне тоқтайды деп болжануда.
Астанаға жеткен алғашқы велошабандозды «Бәйтерек» монументінің алдында «Астана ЭКСПО-2017» ҰҚ» АҚ және Қазақстан Республикасындағы Франция елшілігінің өкілдері күтіп алды. Бұл жобаның негізін қалаған Флориан Байли де келіп жетті.
Францияның Қазақстандағы Төтенше және өкілетті елшісі Жан-Шарль Бертоне: «Осы шара Францияның Қазақстандағы маусымына сәйкес келіп, екі ел арасындағы қарым-қатынасты нығайтып қана қоймай, оның бұдан әрі дамуына жаңа серпін береді. Екі елде де баламалы энергияны пайдалану ісіне үлкен мән берілуде», – деді.
Раф Ван Холь өз кезегінде: «Қазақстан – өте тартымды ел! Еуропада жатып, Қазақстан туралы естігенім болмаса, мұнда ұлан-ғайыр дала барын білмеген едім. Осы елге қызығушылығым оянғандықтан, сапарға шықтым. Тағы бір мақсатым: жанар-жағармайды пайдаланбай-ақ, табиғатқа еш зиян келтірмейтін көлікпен біраз жерге баруға болатынын дәлелдегім келді. Сол мақсатым орындалғандай», – деп өз-өзіне ырзашылығын білдірді.
Қос мамандық иесі – сәулетші және энергетикалық мәселелер бойынша сарапшы Раф Ван Хольдің айтуынша, бұл көлікті ол өзі ойлап тауып, патенттеп алыпты. Ең бастысы, оның экологияға еш зиян келмеуіне мән берілген.
Қалған велошабандоздардың «шайтан арбалары» да осы тектес болуы керек. Олардың барлығы Астанаға жеткеннен кейін веложарыс өткізу жоспарланған.
Аманғали ҚАЛЖАНОВ