Осындай ұранмен С.Сейфуллин атындағы Қазақ агротеxникалық университетінің жастары Елбасының кеше жарыққа шыққан «Ұлы даланың жеті қыры» мақаласына үн қосу мақсатында флешмоб ұйымдастырды.
«Хан Шатыр» сауда, ойын-сауық орталығында өткен патриоттық шара барысында ұлттық нақыштағы киім киген 200-ден аса студент бір уақытта би билеп, домбырамен күйлер орындады.
– Ұл-қыздарымыз ел Президентінің әр бастамасын назардан тыс қалдырған емес. Алдағы жылдың «Жастар жылы» болып жариялануы шәкірттеріміздің тарапынан үлкен қолдауға ие болды. Енді, міне, Мемлекет басшысының жаңа мақаласында айтылған идеялар да олардың рухына рух қосып, жігерін жаныды. Бүгінгі іс-шара – соның айқын дәлелі, – деді аталмыш университеттің Қазақстан тарихы кафедрасының меңгерушісі Өмірбай Бекмағанбетов.
