Дауысы ерекше өнерпаз, бірнеше республикалық және халықаралық фестивальдерде топ жарған дарынды әнші Димаш Құдайберген Мәскеудегі «Большая опера-2016» байқауына қатысқан опера дүлдүлі Сүндет Байғожинге қолдау көрсетіп, онымен бірге таяуда ән салған еді. Димаштың өзі де қараша айында Қытай елінде басталған «I am a singer» – «Мен әншімін» атты байқауға барып келді.
Әншінің хабарлауынша, халық әні «Дайдидау» мен шетел тілінде екі әнді орындаған оның өнерін қазылар алқасы жоғары бағалап, финалдық кезеңге өткізді. Жалпы алғанда, финал алдағы жылдың қаңтар-сәуір айларының аралығында өтеді. Онда алты қытайлық әнші мен өзге елдің бір өнерпазы бағы мен бабын сынайды. Сол жалғыз өнерпаз – өзіміздің Димаш Құдайберген болып отыр.
Бұл байқауға қазақ әншісін ҚР Мәдениет және спорт министрлігі аттандырды. Димаш финалда орындайтын әндерді қазылар алқасы белгілейді. Байқау ұйымдастырушылары да әділдікті көздеп, қазылар алқасының құрамын қатысушылардан жасырын ұстауда. Алдындағы кезеңдерден сүрінбей өткен Димаш Құдайберген қазір дайындыққа кірісіп кетті. Оған сәттілік тілеп, келесі жылдан ақжолтай жаңалықты күтеміз.
«Астана Опера» мемлекеттік опера және балет театрының жетекші солисі Сүндет Байғожинге келсек, өкінішке қарай, ол «Большая опера-2016» байқауының финалына өте алмады. Он бірінші кезеңге дейін жеткен ол соңғы турда Джоаккино Россинидің «Севиль шаштаразы» операсынан Фигаро каватинасын және композитор Серафим Туликовтың «Родина» әнін орындады. Ал, жалпы алғанда, байқау бойы қазақ әншісі қазылар алқасын өнерімен тәнті етіп келді. Соның ішінде Ахмет Жұбанов пен Латиф Хамидидің «Абай» операсындағы ұлы ақынның ариясын өте әсерлі орындады.
Жалпы алғанда, «Большая опера-2016» байқауына 7 мемлекеттен 12 әнші қатысты. Финал 26 желтоқсан күні Мәскеудің Үлкен театрында өтеді. Оған Тигран Оганян, Ксения Нестеренко және Юрий Городецкий атты үш әнші өтті. 2014 жылы бұл байқауда «Астана Опера» театрындағы Сүндеттің әріптесі Салтанат Ахметова топ жарғанын естеріңізге сала кетейік. Ал Сүндеттің өзіне мойымауын тілейміз. Осыған дейін талай елді өнерімен бағындырған әншінің алар асулары әлі алда деп білеміз.
Аманғали ҚАЛЖАНОВ
