Балаларға базарлық
Астаналық өнер ошақтары Жаңа жыл қарсаңында кішкентай көрермендерге түрлі қызықты қойылымдарды ұсынуды бастады. Қ.Қуанышбаев атындағы Мемлекеттік академиялық қазақ музыкалық драма театры Е.Шварцтың «Күлше қыз», ал Жастар театры В.Орловтың «Алтын балапан» шығармасының желісімен «Мейірімді жүрек» ертегілерінің премьерасын өткізді. Бұл ертегілерді балдырғандар 30 желтоқсанға дейін тамашалай алады.
Қаллеки театрында қойылған «Күлше қызды» режиссер Жұлдызбек Жұманбай сахналады. Ертегінің қоюшы суретшісі – Шынар Елембаева.
Ертегінің желісі бәрімізге бала кезден таныс. Күлше қыз – өгей шешесі мен оның екі қызынан теперіш көріп, өз үйінде өзі күң болған мейірімді де сұлу қыз. Күндердің күні патша сарайында жас бикештерге арналған сауық кеші өтеді. Күлше қыз да сол кешке барғысы келеді. Бірақ жетімдік пен жоқшылық аяғына тұсау болады. Соңында қайырымды Пері үстіне әдемі көйлек, жалтыраған шыны кебіс кигізіп, сиқырлы күймемен сауық кешіне жібереді. Ол жерде ол өзінің ханзадасын жолықтырады. Бір кебісін жоғалтқан оны ханзадасы сол арқылы ақыры тауып алады.
Күлше қыз бейнесінде дарынды жас актриса Ақмарал Танабаева, ал ханзаданың рөлінде Нұрсұлтан Есен көрінетінін айта кетейік.
«Мейірімді жүрек» ертегісінің қоюшы режиссері – Бейбіт Құсанбаев. Онда балапан мен қасқырдың достығы туралы баяндалады. Дұрысын айтсақ, балапанның мейірімді жүрегіне көкжал тәнті болып, оны бауырына басады. Бұл ертегіде осы екі кейіпкерге қоса, түлкі мен бақалар бейнесі бар. Мейірімділік пен татулықты ту еткен қойылым балаларды сөзсіз қызықтырады. Ертегінің алғашқы көрермендері де бұл қойылымнан жақсы әсер алғанын айтады.
«Мейірімді жүрекке» келіп, Балнұр мен Райана есімді сүп-сүйкімді періштелермен бірге ертегілер еліне сапар шегіп қайттық. Саяхатымыз ұнаған секілді: балалар мәз, оларға қарап, біз де шат-шадыман. Осындай әйбат сезімді бастан кешуге себепкер болған қойылым режиссері – Бейбіт Құсанбаев пен театрдың барша қыз-жігіттеріне таудай алғыс» дейді Назерке Жұмабай атты театр көрермені.
«Мейірімді жүрек» ертегісін 30 желтоқсанға дейін Оқушылар сарайы сахнасынан күнделікті сағат: 10.00, 13.00 және 16.00-де тамашалауға болады.
Аманғали ҚАЛЖАНОВ