Елорда күніне орай Нұр-Сұлтан қаласының әкімдігі қаланың әнұраны, елорда туралы ең үздік ән, сондай-ақ Қазақстан астанасының логотипі мен ұранының ең үздік брендбугін жасау бойынша шығармашылық байқау жариялады.
Патриотизм сезімін асқақтатып, қаланың үздік рәміздерін жасау, сондай-ақ ұлттық өнерді ұлықтау және оны кеңінен насихаттау мақсатында өткізілетін бұл байқауға кәсіби және әуесқой композиторлар, ақындар, музыкалық және шығармашылық топтар, дизайнерлер, суретшілер, сондай-ақ республиканың тұрғындары мен қала тұрғындары өз шығармаларын жібере алады. Байқау 2019 жылғы 27 мамырдан 24 маусымға дейін жүргізіледі. Әндерді кез келген жанрда және әртүрлі орындаушылар үшін жазуға болады. Байқауға берілген әндер бұрын жарияланбаған болуы шарт саналады. Байқаудың жеңімпазы дипломмен және 3000000 теңгемен марапатталады.
