ЕРЕН ЕҢБЕК ЕЛЕНДІ
Астанадағы Сарыарқа ауданының әкімдігінде Еңбек күніне орай еселі еңбек етіп, ел алғысына бөленіп жүрген бір топ азаматқа сый-сияпат көрсетілді.
Еңбек – адам өмірінің мәні. Ешкім де онсыз мұратқа жетіп, биікке шықпайды. Адал термен тапқан нанның да дәмі тәттілеу. «Еңбек ер атандырады» дейді халқымыз. Сондықтан да тіршілікте бағы жанып, абыройы асқандардың барлығы да қажырлы еңбекпен биікке жеткен адамдар деп айтуға болады.
Айтулы шарада Сарыарқа аудан әкімі аппаратының басшысы Ержан ЖАҚЫБАЕВ сөз алып, мерекенің маңызына тоқталды.
– Осыдан үш жыл бұрын елімізде Елбасының жарлығымен Еңбек күні белгіленді. Содан бері ол жоғары деңгейде атап өтіледі. Еңбексіз адам ешқандай жетістікке қол жеткізе алмайды. Елімізде елеулі еңбек етіп жүрген адамдар өте көп. Олардың барлығы да құрметке лайық. Сіздер де өз ұжымдарыңызда алғысқа бөленіп, ел дамуына еселі үлес қосып жүрсіздер. Мерекелеріңіз құтты болсын! Барлықтарыңызға ұзақ өмір тілеймін, – деді Е.ЖАҚЫБАЕВ.
Марапатқа ие болғандар қатарында Сарыарқа аудандық Төтенше жағдайлар бөлімінің қызметкері Мейрамгүл Күнтуарова, Сарыарқа аудандық жергілікті полиция қызметінің маманы Асылхан Қуанышев, №3 Балалар музыка мектебінің ұстазы Сәулеш Қанапиева секілді өз саласының майталман озаттары болды.
Азамат ЕСЕНЖОЛ