Батыста жұмысқа тұрарда да, университетке түсерде де бағадан гөрі волонтерлік қызмет көбірек бағаланады. Бізде де осындай құндылықты дәріптейтін орта құру қажет. Бұл туралы Нұр-Сұлтан қаласының әкімі Алтай Көлгінов жергілікті үкіметтік емес ұйым өкілдерімен кездесуінде мәлімдеді.
«Ұлттық волонтерлік желі» ұйымының атқарушы директоры Татьяна Миронюктің айтуынша, қазіргі уақытта аталған ұйымға 8 мыңдай студент тіркелген екен.
Жиынға келген ҮЕҰ қатарында отбасылық зорлық-зомбылыққа тап болғандарды құтқаратын ұйымдар да болды. Мәселен, Анна Рыль мен оның «Қорғау Астана» қоры он бес жылдан астам уақыт бойы осындай қиындыққа ұшыраған әйелдер мен балаларға, құжаты жоқ азаматтарға, адам саудасының құрбандарына, сондай-ақ мигранттарға жәрдемдесіп келеді.
– Жыл сайын біздің көмегімізге жүгінетіндер саны өсуде. Биылдың өзінде 700-ге жуық астаналық тұрғынға кеңес беріп, тиісті тұрғыда қол ұшын бердік. Олардың арасында көбісі – отбасы мүшелерінен жәбір көрген әйелдер. Мұнымен қоса, біздің мекеме тіркеуге тұрғызып, құжаттарды қалпына келтіруге де көмектеседі, – деді ол.
Аннаның айтуынша, қазіргі таңда ұйым орналасқан ғимарат тар болғандықтан, көп адамды қабылдауға мүмкіндік жоқ. Өз кезегінде қала басшысы бұл мәселені шешуге атсалысатынын жеткізді.
Бұдан бөлек, қала басшысы әлеуметтік кәсіпкерліктің жарқын үлгісін танытып жүрген елордалық азамат, «Green Tal» шеберханасының негізін салушы Эмин Аскеров, «Тәуелсіз өмір» ДОС» қоғамдық бірлестігінің үйлестірушісі Ардақ Отарбаев, «Жас кәсіпкерлер кеңесі» қоғамдық ұйымының төрайымы Айнұр Әмірхан секілді бірқатар ҮЕҚ өкілдерінің баяндамаларын тыңдап, олардың жұмыстарына оң баға берді.
– Биыл қаладағы белсенді ҮЕҰ саны өткен жылмен салыстырғанда 2 есеге, яғни 273-тен 471-ге дейін артты. Қоғам үшін пайдалы жобаларды ілгерілететін ҮЕҰ бар екені қуантады, – деді елорда басшысы.
