ЭССЕ ТАҚЫРЫБЫ – «ЭКСПО-2017»
Оқушылар сарайында «Менің «EXPO-2017» көрмесіне қосар үлесім. Қазақстан экономикасын өзімнің болашақ кәсібім арқылы «жасылдандырудың» жолдары» атты эссе байқауында жеңімпаз атанған қаладағы мектеп, колледждердің он бес түлегін марапаттау рәсімі өтті.
Бұл байқау «Астана ЭКСПО-2017» ұлттық компаниясы «MyChina» білім беру орталығымен ынтымақтаса отырып, ҚР Білім және ғылым министрлігінің қолдау көрсетуімен ұйымдастырылған еді. Аталған байқау 1 сәуір мен 1 мамыр аралығында өткізілді.
Ұйымдастырушылар бір ай ішінде 2000-ға жуық мектепті аралап, осы уақыт аралығында 654 өтініш қабылдаған. Оның ішінде байқау талаптарына жауап беретін 445 жұмыс таңдалынып алынып, қазылар алқасына ұсынылған.
Оқушылар эссені «EXPO» көрмесін өткізудің менің елім үшін маңыздылығы», «Қазіргі заманғы әлем үшін «жасыл технологиялардың» маңыздылығы» және «Менің кәсібім және Қазақстанның индустриялық-инновациялық дамуына менің қосар үлесім» тақырыбында жазды.
Байқау комиссиясы екі апта бойы жұмыстарды қарап, қатысушылардың эссе тақырыбын қаншалықты терең әрі нақты ашып көрсете алғанына баға берді. Жеңімпаздар қатарында мектептегі түрлі пәндер бойынша халықаралық және республикалық Олимпиадалардың жүлдегерлері, шығармашылық байқаулардың лауреаттары, ғылым жобалардың авторлары болды. Іріктеу кезінде оларға айтарлықтай мән берілді.
Нәтижесінде, эссені сәтті жазған он оқушыға Қытайдың Тау-кен ісі және технологиялар университетінде оқуға грант берілді. Ал, бес оқушы Миландағы «ЭКСПО» көрмесіне баруға жолдама алды. Сондай-ақ, «Транстелеком» компаниясы да қатысушыларға естелік сыйлықтар тапсырды.
Жақсы СӘТҰЛЫ