Jasmina Tüzelova – Binom Tanym mektebınıŋ 4-synyp oquşysy. 5 jasynan bastap än salady. Talantty önerpaz nebärı 9 jasta bolsa da, bırneşe baiqaudyŋ jeŋımpazy atanyp ülgerdı.
Käsıbi deŋgeide än aitudy 6 jasynan qolǧa alǧan Jasmina bos uaqytynda vokalmen ainalysqandy, fortepianoda oinaǧandy, bisermen toqyǧandy ūnatady. Qazırgı taŋda Roza Baǧlanova atyndaǧy №2 balalar muzyka mektebınde 2-synypta oqidy.
Otbasynda bes bala bar. Jasmina – üiınıŋ kenjesı. Bırneşe jyl būryn otbasymen bırge Taşkent qalasynan elordaǧa köşıp kelgen.
Qarapaiym otbasynan şyqqan qyzdyŋ äkesı – on sausaǧynan öner tamǧan ūsta, anasy Gülziia – muzykant, skripkada oinau mamandyǧy boiynşa bılım alǧan. Anasynyŋ aituynşa, Jasminnıŋ önerge jaqyn boluy – äjesınen daryǧan qasiet. «Toi-tomalaqta än şyrqaǧandy ūnatatyn äjesındei Jasminanyŋ da syŋǧyrlaǧan dauysy bar» deidı anasy.
Jasmina – «Central Asia’s Qot Talent» jobasynyŋ jartylai finalisı, 2022 jylǧy «Qazaqstan dauysy. Balalar» baiqauynyŋ qatysuşysy, sondai-aq Reseidegı bırneşe baiqaudyŋ qatysuşysy atandy.
– Būl baiqaularda men ülken täjıribe jinadym. Käsıbi mamandardan sabaq alyp, olardyŋ aldynda än şyrqadym. Köptegen jaŋa dos taptym, – deidı jas änşı.
Jaqyndarynyŋ aituynşa, ömırde mınezı sabyrly, ūiaŋ, janaşyr qyz sahnaǧa şyǧysymen aşyla tüsedı. Al özı sahnany erekşe jaqsy köretının aitady. «Sahna – men üşın bölek älem. Barlyq adamdy syidyra alatyn ülken jürek siiaqty. Menıŋ oiymşa, körermenderdıŋ aldynda tūryp, olardyŋ qoşemetıne bölenu – erekşe sezım» deidı Jasmina.
Anasy Gülziia qyzynyŋ öner jolyn jürek qalauymen özı taŋdaǧanyn aitady.
– Balalarymyzdyŋ betın qaqpai, özderınıŋ ūnatatyn ısımen ainalysqandaryn qaşan da qoldaimyz. Qyzym fortepianoǧa baramyn dep äu basta özı aitqan. Negızınen, üidıŋ kenjesı bolǧan soŋ, erke bolyp östı. Degenmen orynsyz erkelıgı joq. Aǧalaryna, äpkelerıne qolǧanat bolyp jüredı. Özı jan-jaqty. Qai ıstı qolǧa alsa da oŋailyqpen alyp şyǧady. Sabaqty da üzdık oqidy. 2-synypqa deiın taza beske oqydy. Tek keiın baiqaularǧa köp qatysqannan soŋ, törttık baǧalar alyp jür. Bır baiqaudan ekınşısıne qatysu, onyŋ üstıne qosymşa üiırmelermen ainalysu sabaǧyna äser ettı dep oilaimyn. Endıgı kezekte sabaǧymyzdy qolǧa alamyz dep otyrmyz, – deidı anasy.
Jas talant Jasminanyŋ süiıktı pänderı – dene şynyqtyru men aǧylşyn tılı. Özıne denesın şynyqtyryp, sportpen ainalysqan ūnaidy. Äkesı de sportqa jaqyn.
Sondai-aq Jasmina Tüzelova – «Bala dauysy» ūlttyq balalar än baiqauynyŋ altynşy mausymynyŋ gran-pri iegerı. Osy baiqauda oǧan Qazaq ūlttyq öner universitetınde oquǧa grant berıldı.
Anasy «Bala dauysy» baiqauy bererı mol joba ekenın atap öttı. «Byltyrǧy jyl bız üşın jemıstı boldy. «Bala dauysy» jobasynda qyzym eŋ kışkentai qatysuşy boldy. Bılıktı mamandardan bi bilep, än aitudan sabaq aldy. Sol baiqau kezınde Jasminanyŋ bır aptadai tamaǧy auyryp qaldy. Därıgerler än aitpaq tügıl, söileuge de bolmaidy dedı. Baiqauǧa bır kün qalǧanda orkestrmen sahnada bır ret daiyndyq jasady. Bıraq dauysyn şyǧarmai ıştei ǧana bilep, aldyn ala oilastyryp daiyndaldy. Ertesıne osy daiyndyqpen sahnaǧa şyǧyp kettı. Allaǧa şükır, baiqauda jeŋıske jettı. Būl da berılgen bır synaq şyǧar» dedı.
Jas örennıŋ kez kelgen jetıstıgı – bükıl äulet üşın ülken quanyş. Jasminanyŋ armany – tek alǧa ūmtylyp, aǧa-äpkelerınıŋ jolyn quu.
– Bırde anaşym ekeumız Dimaş Qūdaibergennıŋ konsertıne barǧanbyz. Sol kezde maǧan onyŋ dauysy qatty ūnady. Endı sol kısınıŋ aldyna baryp, bırge än şyrqaudy armandaimyn, – deidı ol.
Armanyn maqsatyna ainaldyrǧan kışkentai qyz 2023 jyly Dimaş Qūdaibergennıŋ jetekşılıgımen ötkızılıp kele jatqan «Baqytty bala» jobasyna qatyspaq.
